“Zirə”də yeni dönəm: Şükürovu Abbasov əvəz edir?

“Zirə” yenə itirdi. Bu dəfə autsayderlə oyunda qələbə qazanılmadı. Arxada qalan 9 oyundan sonra komandanın xal ehtiyatı 11-lə ölçülür. Ötən mövsümü gümüş medalla bitirən komanda üçün bu nəticə fiaskodu. “Qəsəbəlilər” arxada qalan oyunların 4-də məğlub olub, daha ikisində isə 1 xala sevinib.

Uzağa getməyək, elə ötən mövsümə nəzər salaq. Premyer Liqada keçirdiyi ilk mövsümdəcə “Zirə” adından söz etdirməyi bacarmışdı. Komanda eyni sayda oyundan sonra 4 qələbə və 4 heçəyə imza atmış, yalnız 1 qarşılaşmadan (o da son 3 mövsümün əvəzsiz çempionu “Qarabağ”la oyunda) məğlubiyyətlə ayrılmışdı. 

İndi isə sıralarında heç kimin ehtiyac duymadığı oyunçuları toplamış AZAL səddini belə keçmək kimi minimal vəzifənin öhdəsindən gələ bilmirlər. Niyə? 

Sualın cavabı çoxşaxəlidi. Əvvəla, heyətlə bağlı qeydlərimizi etməliyik. Fakt budu ki, Bonilya – Tato tandeminin nə qədər güclü olduğu indi turnir cədvəlindən aşkar sezilir. Özü də deməyin ki, çempionat yeni başlayıb, bitiminə 19 tur qalıb, artıq bu gün – sabah yarılanacaq. Yeni gələn futbolçuların köhnələri əvəz edə bilməməsi artıq faktdı. Deməli, seleksiya işləri ötən mövsümlə müqayisədə daha uğursuz aparılıb.

Daha bir məqam “Zirə”nin ötən mövsüm ciddiyə alınmaması ilə bağlıdı. Elitaya yenicə vəsiqə qazanan komandaya rəqibləri mövsümün əvvəlində barmaqarası yanaşırdı. Qış fasiləsindən sonra isə “qəsəbəlilər”lə oyunlarda heç kim özünü oda-alova atmaq istəmədi. Axı, komandanın avrokuboklarda iştirak etməyəcəyi dəqiqləşmişdi. Ağrımayan başa isə heç kim dəsmal çəkmək eşqinə düşmədi.

Nəhayət, nəticələrin pisləşməsini şərtləndirən daha bir fakt haqda. Ötən mövsümlə müqayisədə, Premyer Liqa iştirakçılarının sayı azalıb. Belədə hər klub istənilən rəqiblə görüşdə xal ehtiyatını zənginləşdirmək üçün cani-dildən vuruşur. Elə AZAL-ın son nümunəsi dediklərimizin əyani sübutudu.

Göründüyü kimi, “Zirə”nin ötənilki nəticənin təkrarlaması inandırıcı deyil. Komandanın hazırkı durumu heç də “qara zolaq” adlandırıla bilməz. Mövcud faktorlar “qartallar”ın real potensialına uyğun yerdə qərarlaşdıqlarını göstərir. 

Əlbəttə, klub rəhbərliyi bu cür nəticələrdən razı qala bilməz. Nəticə uğursuz olduqda isə ilk növbədə bütün diqqətlər baş məşqçiyə yönəlir. Adil Şükürovun ötənmövsümkü başgicəlləndirici, həm də təsadüfi uğuru artıq unudulub. İndi ondan ən pis halda avrokuboklara vəsiqə verən yerlər tələb olunur ki, mövcud futbolla bunu həyata keçirmək real deyil.

Baş məşqçinin kreslosunun laxlamasını söyləmək üçün Nostradamus olmağa ehtiyac yoxdu. Ancaq mövcud durumda hansısa məşqçini kənardan gətirmək cari mövsümü silmək anlamına gələcək. “Zirə” rəhbərliyi isə çətin ki, hadisələrin bu cür gedişatı ilə razılaşa. 

Deməli, baş məşqçini “evin içi”ndən axtaracaqlar. Hazırda “Zirə”də çalışanları nəzərdən keçirdikdə isə bu posta ən real namizəd kimi Ayxan Abbasov görünür və bu barədə ilkin siqnallar da var. Akademiyaya, uşaq komandalarına nəzarət edən Abbasovun namizədliyi xeyli vaxtdı rəhbərlik səviyyəsində müzakirə olunur. Proqnozumuzun nə dərəcədə reallaşacağını zaman göstərəcək. Ancaq qarşıdakı 4 oyundan 3-də “Zirə”nin hazırda turnir cədvəlinin ilk “3-lüy”ündə qərarlaşan komandalarla qarşılaşacağını nəzərə alsaq, hadisələrin gedişatını çox gözləməli olmayacağımızı söyləyə bilərik.

FƏRİD