Ölkə futbolu
“Qarabağ” üçün tarixi an: Salonikidə finala bərabər döyüş
“Qarabağ”ın Avropa Liqasında PAOK-u üstələməsi …
“Qarabağ”ın Avropa Liqasında PAOK-u üstələməsi (2:0) təmsilçimizin növbəti mərhələyə adlamaq şanslarını xeyli artırdı. 4 xalla qrupda 2-3-cü pillələri bölüşən ağdamlılar 2 il əvvəli xatırladır. AL-in 2014/15 mövsümündə də Qurban Qurbanovun yetirmələri 3 turdan sonra 4 xal toplamışdı. Qazanılan nəticələrin ardıcıllığı da elə indiki kimi idi. İlk oyunda evdə heç-heçənin ardınca, İtaliyada alınan məğlubiyyət. Yeganə fərq isə 3-cü matçda qazanılan qələbənin 2 il əvvəlkindən fərqli səfərdə yox, evdə əldə edilməsi idi.
O zaman “Qarabağ” son 3 oyunundan 2-ni evdə, 1-ni isə səfərdə keçirəcəkdisə, bu dəfə əksinə olacaq. Əvəzində rəqiblərin 2014-cü ildəki kimi qoruxlu olmamasıdı. O baxımdan ki, “Dnepr”i PAOK-dan, “Sent Etiyen”i isə “Slovan”dan üstün saymaq olar. Əbəs yerə deyil ki, elə həmin mövsümün sonunda ukraynalılar AL-in finalına adını yazdırmışdı. Bundan başqa, ötən 2 il ərzində “Qarabağ”ın daha da təcrübə qazanması əvvəlki səhvləri buraxmaması üçün böyük rol oynaya bilər. Nəzərə alsaq ki, “süvarilər” son turda “Fiorentina” ilə qarşılaşacaq, qrup lideri olan apenninlilər son tura böyük ehtimalla vəsiqəni təmin edib, gələcək. Necə ki, bunu 2 il əvvəl Milan “İnter”i etmişdi. Qrup lideri kimi Bakıya gələn “göy-qaralar” ikinci heyətlə meydana çıxmaqla “Qarabağ”ın uğur qazanmasına zəmin yaratmışdı. Amma çexiyalı referi Miroslav Zelinka verdiyi yanlış qərarla ağdamlıları pley-offdan məhrum etmişdi.
Ötən mövsüm “Tottenhem”, “Anderlext” və “Monako” kimi komandalarla rəqib olan təmsilçimiz bu güclü komandalarla oyunlarda artıq 2 turdan sonra qrup 2-cisi idi. Bu cür səviyyəli kollektivlərlə oyunlarda qazanılan təcrübədən sonra “Qarabağ” 2-ci eşelon təmsilçiləri ilə matçlarda özünü suda balıq kimi hiss etməlidi.
İndi Qurbanovun yetirmələri növbəti turda Salonikidən qələbə ilə qayıtsa, növbəti mərhələ şanslarını daha da artıra bilər. Belə olan halda, elladalıları 3 xal qabaqlayacaq təmsilçimiz şəxsi oyunlarda da onlardan üstün olacaq. Bu da öz növbəsində PAOK-la xalların eyni olacağı halda “Qarabağ”ın daha üst sırada dayanacağı deməkdi.
Unutmayaq ki, yunanların qalan 2 oyundan biri İtaliyada keçiriləcək ki, “bənövşələr”dən xal alacaqları real görünmür. Deməli, Azərbaycan çempionu növbəti tur qalib gələrsə, “1 gülləylə 2 dövşan” vurmuş olacaq: həm xal ehtiyatını zənginləşdirəcək, həm də PAOK-u 1/16 finala namizədlər sırasından silmiş olacaq. Belədə, qalacaq yalnız “Liberets”. Çexiyadan da gətiriləcək mümkün 1 xal, Slovan təmsilçisinin də “qəbristanlığ”a göndərilməsi demək olacaq.
Göründüyü kimi, bu dəfə bütün yollar Salonikiyə aparır. PAOK-la səfər qarşılaşması “Qarabağ” üçün həlledici xarakter daşıyacaq. Nəzərə alsaq ki, yunanlar evdə Bakıdakı məğlubiyyətin acısını çıxmağa çalışacaqlar, həmyerlilərimiz əks-hücumda istəklərinə çata bilərlər. Qısası, PAOK – “Qarabağ” matçı “süvarilər” üçün finala bərabər olacaq. Qalib gəlsələr, daha bir yeni tarixin qapılarını açacaqlar.
ELMAR ABDULLA-ZADƏ
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Milli komanda2024-05-04 15:39
Millimiz UEFA İnkişaf Turnirində ikinci oyununda da uduzdu
- Ölkə futbolu2024-05-04 10:19
“Araz-Naxçıvan”ın baş məşqçisi: “Rəqib tapmaq çətinləşir”
- Premyer-liqa2024-05-04 18:59
Samir Abasov: “Bu, “Qarabağ”la matçdakı yorğunluqdan irəli gələ bilər” – VİDEO