Premyer-liqa
“Qəbələ”ni yıxan yetirmələri
Dünən keçirilən "Sumqayıt" – "Qəbələ&…
Dünən keçirilən "Sumqayıt" – "Qəbələ" qarşılaşmasındakı olaylar heç də "Bakcell Arena"dakı "Neftçi" – "Qarabağ" matçından əhəmiyyətsiz deyildi. "Kapital Bank Arena"da oynanılan görüş "Qəbələ" üçün qorxunc Hollivud filmlərinin ssenarisini xatırlatdı.
“Qırmızı-qaralar"ın “labaratoriyası”nda (akademiyasında) həkimlər (məşqçilər) tərəfindən yetişdirilən “zombilər” (futbolçular) sanki nəzarətdən çıxıb və "ağ xalatlılar" ("Qəbələ") indi onların qarşısını almaqda çətinlik çəkirdi. Sonucda komanda futbolumuza bəxş etdiyi gənclər tərəfindən vuruldu.
İkinci hissənin ilk dəqiqəsində yayda "Qəbələ"dən icarəyə götürülən Yusif Nəbiyev doğma komandasını meydanın mərkəzinə dəvət etdisə, matça əlavə edilmiş dəqiqələrdə bu dəfə Amil Yunanov onu yetişdirib, futbolçu edən komandanı məyus etdi. Hər iki halda qol vuran futbolçuların bunu çılğın şəkildə qeyd etməməsini təqdirəlayiq hal kimi qeyd etmək lazımdı.
Akademiyanın yetirmələri təkcə "Sumqayıt"ın yox, elə "Qəbələ"nin də heyətində meydana çıxmışdılar. Bunlardan Tellur Mütəllibovu xüsusi qeyd etmək lazımdı. 20 yaşlı cinah yarımmüdafiəçisi soyuqqanlılığı ilə seçilirdi. Meydanda mübarizə aparan futbolçu heç də təcrübəli komanda yoldaşlarından geri qalmırdı. Hesabda geridə olan "Qəbələ"nin baş məşqçisi Roman Qriqorçukun taktiki gedişinə görə məhz o, yerini akademiyanın başqa bir yetirməsi olan Sadiq Quliyevə verdi. Arxa xətt oyunçusu isə "Qəbələ"ni qələbədən edən səhvlə yadda qaldı.
Quliyev penaltiyə kimi artıq bir dəfə kobud səhvə yol verməklə diqqəti cəlb etmişdi. Məhz onun gözdən qaçırdığı Yunanov qapıçı ilə təkbətək çıxsa da, zərbəsi tirdən döndü. Son saniyələrdə isə qapıya gedən topu əllə qarşılayan müdafiəçi komandasını qələbədən etdi.
Yəqin ki, "Qəbələ" rəhbərliyi bu matçdan sonra ikili hisslər keçirir. Sevindirici hal odu ki, akademiyanın yetirmələri artıq özünü sübut edir. Onlar üçün üzücü məqam isə odu ki, bu xeyri "qırmızı-qaralar" yox, başqaları görür.
Bu oyunda "Sumqayıt"ın apardığı düzgün seleksiya işlərini də xüsusi qeyd etmək lazımdı. Mirabdulla Abbasov, Yusif Nəbiyev, Amil Yunanov kimi futbolçuları tapıb, üzə çıxaran, ən əsası, onlara oyun praktikası qazandıran komanda bunun faydasını görür. Milli komandalara ehtiyat qüvvənin hazırlanması, gənc futbolçuların üzə çıxarılması kimi prioritet vəzifəsi olan “Sumqayıt” faydalı iş əmsalını müəyyən dərəcədə ortaya qoya bilir. Amma həmin oyunçuların klubun öz yetirməsi olmaması üzücü məqamdı.
“Qəbələ”ni belə yetirmələrinə görə alqışlamaq lazımdı. Hər iki qolun müəllifi, üstəlik, penaltiyə səbəb olan epizodda ötürmə verən də klubun sabiq oyunçusu idi. Onların indi başqa komandada olmasına görə Roman Qriqorçuku da günahlandırmaq olmaz. Həmin Sadiq ötən il “Zirə”də özünü doğrultduğu üçün bu il heyətdə saxlanıldı, icarəyə göndərilmədi. Ancaq müdafiəçi güclü rəqabət üzündən ehtiyatda qalmağa məhkumdu, daim oynamayanda isə belə səhvlər qaçılmaz olur. Yusiflə Amil də avrokubokda legionerlərin kölgəsində qalacaq, arabir şans qazananda isə belə oynamayacaqdılar. Ona görə də onların icarəyə verilməsi normaldı. Eybi yox, qoy, “Qəbələ”ni cəzalandırsınlar, amma futbolçu kimi yetişsinlər.
ELMAR ABDULLA-ZADƏ
- Milli komanda2024-05-03 08:00
Vay(ss) bizim halımıza?
- Müsahibə2024-05-02 15:51
Dodo “Qəbələ”yə kömək etmək istəyir: I Liqada da oynamağa hazırdır
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Digər idman növləri2024-05-03 13:25
Tanınmış idmançılarla – öncə master-klas, sonra birgə məşq