“Bir qalanın sirri” – NİYƏ DƏ YOX!?

Noyabrın 11-nə 16 gün qalır. Futbolumuzun görmədiyi günə düşməsi indi ayları, günləri, saatları saymağa sövq edir. Özü də ola mövcud vəziyyətdə komandamız üçün olduqca vacib qarşılaşma. Şimali İrlandiya səfərindən 1 xalla qayıtmaq da işimizə yarayır. Əvvəla, belədə, hazırkı mövqeyimizi qoruyacağıq. İkincisi də ona görə ki, səfərdə oynayacağıq.

Seçmə mərhələnin təqvimi bizim üçün o qədər uğurlu alınıb ki, Şimali İrlandiya ilə matç üçün noybardan gözəl vaxt tapmaq mümkün deyil. Futbolçularımızın formasının zirvə nöqtəsi kimi məhz noyabr və aprel aylarını göstərmək olar. Britaniyalılarla qarşılaşma da məhz noyabr ayına təsadüf edəcək.

Komandamızın ənənəvi ağrılı yeri start fitindən sonrakı 10-12 dəqiqə qalmaqdadı. Sözsüz ki, istənilən komanda səfərdə meydan sahiblərinin təzyiqi ilə qarşılaşır. Ancaq yığmamızda bu, özünü daha qabarıq şəkildə büruzə verir. Robert Prosineçkinin diqqət yetirməli olduğu məqamlardan biri də məhz “start həyəcanının boğulması” olmalıdı.

Yığmamızın üstün tərəflərindən danışarkən, ilk növbədə 270 dəqiqə ərzində qapısının toxunulmazlığını qorumasını qabartmalıyıq. Bunda bütün futbolçulıarın xidməti olsa da, ilk növbədə Kamran Ağayev və “Qarabağ”ın “dəmir kvartet”i  – Maksim Medvedev, Bədavi Hüseynov, Rəşad Sadıqov, Arif Daşdəmirov yada düşür. Prosineçkinin güvəndiyi bu isimlərin oyununun uğurlu alınmasının başlıca səbəblərinin biri də eyni komandada çıxış etmələridi. Xüsusilə, ilk 3-lük uzun illərdi çiyin-çiyinə çıxış edir ki, bu da biri-birlərini gözüyumulu anlamalarına köməklik göstərir. 

Artıq ən pessimist azarkeşlər də səbrsizliklə Şimali İrlandiya – Azərbaycan oyununun başlama saatını gözləyir. İnam var, özü də böyük. Rəqibin son Avropa çempionatının final mərhələsinə yüksəlməsinə də hörmətlə yanaşmaq lazımdı. Ancaq bundan öncəki rəqibimiz kim idi bəs? Məgər Çexiya da eyni turnirdə mübarizə aparmırdı? Özü də həmin matçda Bədavi zədə səbəbindən iştirak etmirdi. Britaniyada isə Hüseynov Rəşad Sadıqovla çiyin-çiyinə müdafiənin mərkəzinin keşiyində dayanacaq.

Başlıca məqsəd mövcud duruma görə, 2-ci pillə uğrunda mübarizədə əsas rəqibimiz olan Britaniya təmsilçisi ilə səfər görüşündən xalla qayıtmaqdı. Deməli, qapımızdan qol buraxmasaq, arzumuz reallaşacaq. Hələ qol vursaq, lap “fontan” olar. Ancaq ilk növbədə qış fasiləsinə 2-ci pilləni qorumaq məqsədi ilə müdafiəni düşünməliyik. Bu heyətin uşaqları isə bunu bacarar. Niyə də yox!? 

CEYHUN ƏLİYEV