Ölkə futbolu
Rəşadın təbəssümlü vidası
“Ölkə futbolunun siması” dedikdə, ilk ağlagələn…
“Ölkə futbolunun siması” dedikdə, ilk ağlagələn millimizin və “Qarabağ”ın kapitanı Rəşad Sadıqov olur. Cari mövsüm başa çatdıqdan sonra kapitan “butslarını mismardan asacaq”. Gizlətsə də, etiraf etməsə də, bu, reallaşacaq. Az qala hər 2 oyundan birini buraxan mərkəz müdafiəçisi gücünü qoruyaraq oynayır və yolun sonuna çatıb.
Əslində, 2016-2017-ci illər Sadıqovun karyerasını bitirmək üçün ən münasib dövrdü. 34 yaşlı müdafiəçi üçün məhz bu mövsümü ən uğurlu hesab etmək üçün kifayət qədər əsas var. Zədələr daha çox oynamasına imkan verməsə də, o, bütün məhrumiyyətlərə baxmayaraq, ən parlaq dövrünü yaşayır.
Sadıqov millimizin dünya çempionatının seçmə mərhələsində keçirdiyi 4 qarşılaşmadan 2-də meydana çıxıb. Maraqlıdı ki, tsikldə əldə olunan hər iki qələbə məhz Rəşad meydanda olarkən yaşanıb – həm San-Marino, həm də Norveçin əliboş qaldıqları matçlarda. Elə tsikldə millimizin vurduğu qollar da məhz Sadıqovun döyüşdə iştirak etdiyi 90 dəqiqələrdə baş verib. Bəli,Sadıqov forvard deyil. Ancaq heç kim dana bilməz ki, o, meydanda olanda hücum xəttində də oyunumuz daha inamlı alınır.
Milliylə bağlı daha bir zəruri qeyd. Komandanın pley-offa çıxıb-çıxmayacağını zaman göstərəcək. Ancaq indidən deyə bilərik ki, bu milli tariximizin ən uğurlu komandasıdı. Tsiklin sonunda rekord sayda xallar bunu sübut edəcək. Və belə bir zamanda karyeranı başa vurmaq hər futbolçuya nəsib olmur.
Maraqlıdı ki, Sadıqovun karyerasını bitirmək üçün münbit şərait tək yığmadakı uğurları ilə bağlı deyil. “Qarabağ”la ardıcıl 3 dəfə çempionluqların ardınca Avropa Liqasının qrupuna düşmüş müdafiəçi ilk dəfə bu mötəbər turnirin 1/16 final mərhələsində kapitan sarğısı ilə çıxmış azərbaycanlı kimi də adını tarixə yazdıra bilər.
Elə arxada qalan Avroliqa matçlarında da “Qarabağ”ın əldə etdiyi nəticələrdə Rəşadın rolu danılmaz olub. Təkcə “Slovan”la Bakıdakı qarşılaşmanı yada salsaq, kifayət edir ki, kapitanın klubunda necə də önəmli fiqur olduğunu görək. Son dəqiqədə vurulan qol “süvarilər”in məğlubiyyətdən qurtulmasını təmin etdi. Bu topun müəllifi nə hücumçu deyildi, nə də hücumları quranlar: yenə də səhnəyə Sadıqov çıxmışdı. Bəlkə də məhz həmin oyun və həmin qol ağdamlılarda özünəinam yaratdı. Hər halda, “Qarabağ” artıq yeni rekorda imza atıb: indiyədək heç bir klubumuz Avroliqa qrupunda 7 xal toplamamışdı. Finişə isə hələ 2 tur qalıb.
Yuxarıdakı qeydlərin toplum şəkli ilə indiyədək heç bir azərbaycanlı futbolçu lovğalana bilməyib. Yaş da öz işini görür. Sadıqovun pul xatirinə karyerasını davam etdirəcəyi mümkünsüzdü. Başıuca karyera yaşamış biri üçünsə eyni şəkildə də getmək ən böyük arzu ola bilər.
Bəli, Rəşad mövsümün sonu futbolçu karyerasını başa vuracaq. Ancaq futboldan gedəcəyi mümkünsüzdü. O, ya məşqçi, hə də klub funksioneri kimi sevimli peşəsinə sadiq qalacaq.
Heç vaxt oyun zamanı üzündə təbəssüm görmədiyimiz Rəşad “Slovan”a vurduğu qola çılğınlıqla sevindi, millinin qələbələrindən sonra yoldaşlarına sarıldı. Təəssüf ki, gedəcək… Amma yaxşı ki, təbəssümlə gedəcək…
CAVAD