“Qarabağ”ın olmayan gecə

“Ötən tur səfərdə PAOK-u üstələməsi qrupun autsayderi ilə səfərdən də qənaətbəxş nəticəylə dönəcəyimizdən xəbər vermir. Çünki Liberets təmsilçisinin qrupda əldə etdiyi yeganə xal Bakıdakı matçda yaşanıb. Özü də həmin qarşılaşmada “Slovan”ı qələbədən 1 dəqiqə ayırırdı. Həm də etiraf etmək lazımdı ki, paytaxtımızdakı qarşılaşmada Çexiya klubu sərgilədiyi atletik futbolla texnikalı ağdamlıları cari qrup mərhələsində ən zəif oyununu göstərməyə məcbur etmişdi. Hətta İtaliyada alınan 1:5 hesablı məğlubiyyət də qrupdakı ilk matç qədər uğursuz adlandırıla bilməz” – bu sətirlər “futbolinfo”da “Slovan”la Çexiyada dünən baş tutan oyundan 2 gün əvvəl işıq üzü görmüşdü…

Liberetsdə keçirilən görüş meydan sahibləri üçün ən arzuolunan şəkildə başladı. Rəşad Sadıqovun yoxluğunu unutdurmağa çalışan Bədavi Hüseynov – Maksim Medvedev tandemi müdafiənin mərkəzini 11 dəqiqə qoruya bildilər. Cinah ötürməsindən sonra Eqon Vux möhtəşəm “qaranquş” zərbəsi ilə uzaq küncü nişan aldı. Bu cür epizodlarda zərbə endirənin ustalığı nə qədər yüksək olsa da, bəxt böyük rol oynayır. Çünki topu uçaraq havada başla uzaq küncün götürülməyən nöqtəsinə göndərmək olduqca müşkül məsələdi.

“Süvarilər”in bu komandayla oyunun alınmamasını ilk oyunda da görmüşdük. Üstəlik, futbolda belə bir deyim var: “komandanın günü deyil”. Bax, dünənki gecə də “Qarabağ”ın deyildi. Bu cür oyunlarda kim(lər)sə oyunu üzərinə götürməli, komandanı arxasınca aparmalıdı. Çempionumuzun sıralarında isə bu özəlliyə malik №1 Rəşad Sadıqov da meydanda yox idi. 

Yaranan epizodlar, mövqe səhvləri, nəticənin bu qədər acınacaqlı alınması, məşqçinin hansı rotasiyalara əl atması – bütün bunlar “arxadan atılan daş” effektindən başqa bir şey deyil. Elə “Fiorentina”nın PAOK-a evdə uduzması kimi. Çünki:
1) “Qarabağ” artıq “Slovan”a uduzub
2) “Qarabağ”ın hansı hesabla məğlub olmasının turnir cədvəli baxımından heç bir əhəmiyyəti yoxdu
3) Mövcud turnir cədvəlinə uyğun hərəkət etmək lazımdı

Üzücü məqamlardan biri də Maksim Medvedevin səbəbkarı olduğu penalti epizoduna görə sarı vərəqə alması oldu. İndi ağdamlılar vərəqə limitini aşan komandanın bu aparıcı müdafiəçisinin də xidmətindən “Fiorentina”ya qarşı matçda yararlana bilməyəcək. Üstəlik, Miçel Madeyra da eyni aqibətlə üzləşdi.

Başqa sözlə “Qarabağ”ın baş məşqçisini düşündürən məqam “Fiorentina” ilə matçda hansı taktiki sxemdən yararlanmalı, heyətdə kimləri oynatmalı olduğu olmalıdı. Təqribi plan bəllidi. Ancaq bu barədə oyundan bir gün öncə bəhs edəcəyik.

CEYHUN ƏLİYEV