Həqiqət anı yetişdi: tarixi stadiondan yaşayın!

Bir gün qaldı. “Qarabağ”ın “Fiorentina”ya  qarşı tarixi oyununa 1 gün qaldı. Azərbaycan çempionu həlledici döyüşdə maksimum güclə çıxış etməlidi. Meydana çıaxcaq futbolçular, ehtiyat skamyasında əyləşəcək onların komanda yoldaşları, baş məşqçi və köməkçiləri bu “müharibə”dən üzüağ çıxmaq üçün əllərindən gələni edəcəklərinə heç kimin şübhəsi yoxdu…

Hava yaman soyuqdu. Sabah 0 dərəcə civarında olacaq. Əlbəttə, belə bir soyuqda 2 saata yaxın tribunada oturmaqdansa, televizorun düyməsini lazımı kanala yönəldib, isti mürəbbəli çaydan içə-içə feyziyab olmaq havanın hərarəti baxımından daha rahat görünə bilər. Ancaq rəhmətlik Hacıbaba Bağırov demiş, “bəs, eşq, bəs, məhəbbət”. 

Bəli, əziz azarkeş, sabah sənin axşamın olmalıdı! Sabah “Fiorentina”ya qarşı “12-ci oyunçu” sən olmalısan! “Hava soyuqdu”, “oyun gec qurtaracaq” deyib, yaxanı kənara çəkməməlisən. Sən “Neftçi”nin, “Qəbələ”nin, “İnter”in, lap elə AZAL-ın fanatı ola bilərsən. Ancaq sabah “Qarabağ” Ağdamı deyil, Azərbaycanı təmsil edəcək. Sabah “Qarabağ” Avropa nəhənginə qarşı vuruşacaq. Sabah “Qarabağ”ın sənə, mənə, hər bir azərbaycanlının dəstəyinə ehtiyacı olacaq. 

Zirvələri fəth etmək istəyirsənsə, populist çıxışlar edib, dünyaya “çəhrayı eynək”lə baxmaq zamanı deyil. Reallıq budu ki, rəqibin çıxış etdiyi çempionat Azərbaycan Premyer Liqası ilə müqayisə oluna bilməz. Reallıq budu ki, “Fiorentina”nın heyəti həm fərdi, həm də kollektiv olaraq “Qarabağ”dan xeyli üstündü. Reallıq budu ki, iki komandanın illik büdcəsini müqayisə etmək özlüyündə ağılsızlıq olar. Topladıqda italyanların cütlüyün aşkar favoriti olduğunu söyləyə bilərik.

Deməli, “Qarabağ” meydanda fiziologiyanı üstələyən məfhumlardan istifadə etməlidi. Başqa alternativ yoxdu. Bura ilk növbədə əzmkarlıq, motivasiya, fədakarlıq daxildi. Aydın məsələdi ki, rəqib oyunun müəyyən hissələrində tempi də artıracaq, təzyiqi də. Bax, həmin anlarda “Qarabağ”ın arxasında dayanan kütlə lazımdı.

Ki, futboçular bu dayağı, bu qüvvəni hiss edib, yorğunluğu unutsunlar. Ki, futbolçular döyüşdə tək olmadıqlarını görsünlər. Ki, aşırılması mümkün olmayan dağı birlikdə devirmək gücünü özündə tapsın.

Bu cür oyuna görə, saatlarla tıxacda da qalmağa dəyər, soyuqlayıb, yatağa düşməyə də. Bu cür oyunlar futbolçular kimi, azarkeşlərin də yaddaşlarına əbədi həkk olunur. Necə ki, “Qarabağ” Azərbaycan futbolu tarixində ilk dəfə avrokubokda mərhələ adladığı oyunun şahidləri indi də İsrail “Makkabi”sinə qarşı görüşü xatırlayanda, göz bulaqlarını quru saxlaya bilmirlər. Həmin vaxt Müşfiq Hüsenov @CO vuruşurdu, bu dəfə Rəşad Sadıqov@CO rəqibini əzməyə çalışacaq. 

Əlbəttə, sabahkı qarşılaşmanın çəkisi daha ağırdı. Çünki sabah yeni tarix yazıla bilər. Özü də həlledici döyüş “uzaq sahillərdə” deyil ki, sonradan hansısa fanat özünə bəraət qazandırıb, ölkə xaricinə yollana bilməməsini qabarda. Bu tarixi hər bir azarkeş canlı-canlı yaşamağa borcludu. “Qarabağ” onsuz da borcunu verib. Bu cür komandalarla mübarizədə son turadək 1/16 finala yüksəlmək şansını qorumaqla. Uduzsalar belə, komandanı top atəşinə tutmağın əleyhinəyik. Əlbəttə, vuruşaraq, uduzsalar. Ancaq vuruşacaqlarına da zərrə qədər şübhəmiz yoxdu. 

Məğlub olsalar, “döyüşü uduzdular”, qalib gəlsələr “müharibəni uddular” desək daha düzgün olar. Ancaq futbolsevərlərimiz çempionumuzun yanında olmağa borcludu. Əks halda, sənin mənim, dostumuzun nə haqqı var ki, “mən futbol adamıyam” desin?

İndi seçimini özün et, ey Azərbaycan fanatı! Səfərbərlik isə zirvə nöqtəsinə çatdı: hər kəs və hər şey “Qarabağ” üçün!

CEYHUN ƏLİYEV