Ölkə futbolu
Lorenso üçün "namaz fasiləsi": “Bakıda varlılar çox varlı, kasıblar çox kasıbdı”
“Zirə”nin portuqaliyalı futbolçusu Migel Lorenso …
“Zirə”nin portuqaliyalı futbolçusu Migel Lorenso ölkəsinin mətbuatına müsahibə verib. Futbolinfo.az xəbər verir ki, o, ölkəmizdə yaşamasından, bura gəlişindən danışıb.
Migel öncə Azərbaycana transferi haqqında fikirlərini bildirib: “Mənim Azərbaycana getmək variantım çoxdan var idi. Lakin Azərbaycan klubu ilə Portuqaliya “Setubal”I arasında danışıqlar yaxşı keçmədi. Bir neçə həftə sonra isə müzakirələr yenidən başladı və hər şey ürəyimiz istəyən kimi alındı. Nəhayət, Bakıya gəldim. Amma burada zədə aldım və üzüldüm. İndi hər şey qaydasındadı”.
Futbolçu ölkəmizə gəlməzdən öncə Azərbaycanın harada yerləşdiyini belə bilmədiyini deyib: “Azərbaycan haqqında heç nə bilmirdim. Ümumiyyətlə, belə ölkə tanımırdım. İnternetdə axtarış apardım və gördüm ki, asan olmayacaq. Mədəniyyət, yemək fərqlidir. Əvvəlcə Bakıda yalnız yaşayırdım. Sonra isə sevgilim yanıma gəldi. O, özünə iş tapdı və burada qalır. Hər şey indi ürəyimizcədir”.
Lorenso Bakı haqqında fikirlərini də bölüşüb: “Bakı gözəl şəhər, inkişaf etmiş paytaxtdır. Gözəl binaları və parkları var. Amma təzadlı şəhərdi. Çünki varlılar çox varlı, kasıblar isə çox kasıbdı. Orta təbəqədən insanlar yoxdu. Bu şəhərdə əla restoranlar var. Çoxlu toyuq yeyirlər. Bu da mənim üçün yaxşıdı. Rusdilli insanlar çoxluq təşkil etsə də, klubda tərcüməçimiz var”.
Portuqaliyalı oyunçu ilk dəfə Azərbaycana gələrkən müsəlman ölkəsi olduğuna görə narahatlıq keçirdiyini də etiraf edib: “İlk dəfə bura gələndə narahat idim. Çünki müsəlman ölkəsində oynayacaqdım. Düşünürdüm ki, qadınlara çoxlu məhdudiyyətlər qoyulub, azadlıq demək olar ki, yoxdu. Amma tamam fərqli şeylər gördüm. İnsanlar heç də ərəb ölkələrindəki kimi yaşamırlar. Lakin yenə də Portuqaliyaya nisbətən qapalıdırlar. Bu, normaldı”.
Lorenso həmyerlisi, “Kəpəz”də çıxış edən Serjio Koşta ilə münasibətlərinin yaxşı olduğunu dilə gətirib: “Bakıda səhərlər sevgilimlə gəzməyə çıxırıq, yemək yeyirik. Vaxt olanda bazarlığa gedirik. Planlarımız da hava şəraitinə görə dəyişir. Hava yaxşı olmayanda yatıram. Serjio Koşta ilə görüşürük. O, bizim dili bilir və birlikdə gəzirik”.
Migel Azərbaycan futbolunun inkişaf etmədiyini deyib: “Orada futbol çox fərqlidi. Taktiki və texniki cəhətdən Portuqaliyadan geri qalırlar. “Qarabağ” və “Qəbələ”ni çıxsaq, futbol keçmişdə qalıb”.
Sonda futbolçu komanda yoldaşlarının namaz qılmasına toxunub: “İlk dəfə “Zirə”də çıxış edəndə hakim fasilə fitini verən kimi futbolçular hərəsi bir tərəfə qaçdı. Qayıdanda meydanda mən və yalnız əcnəbi futbolçular var idi. Çox qəribə idi. Sonra aydın oldu ki, onlar namaz qılmağa gediblər. Hər şey mənə yad gəlirdi. Çünki futbolda fasilə ikinci hissədəki strategiyanı müəyyənləşdirmək üçündü. İndi isə hər şey təbii gəlir”.
Qeyd edək ki, Lorenso cari mövsümün əvvəlindən komandadadı.