Ölkə futbolu
Yenilənən "Neftçi": transferlər nə vəd edir?
Qış transfer pəncərəsinin açılmasını gözləyən Pr…
Qış transfer pəncərəsinin açılmasını gözləyən Premyer Liqa təmsilçilərinin azarkeşləri arasında hamıdan çox “Neftçi” fanatları maraqlı idi. Mövsümün ilk yarısında “qara kabus” yaşamış azarkeşlər məlhəmin 2-ci dövrədən sonra tapılacağına böyük ümidlər bəsləyirdi.
Elə baş məşqçi Elxan Abdullayevin hər uğursuzluqdan sonra “bu komandanı mən yığmamışam” deməsi də “ağ-qaralar"a real bəraət qazandırırdı. Vəli Qasımovdan qalan mirasa möhtac baş məşqçi 2-ci dövrənin gedişatında xırda islahatlara start verdi. Ancaq köklü dəyişikliklər etmək üçün transfer pəncərəsi gəlməli idi. Bəs, bu dövrdə “Neftçi” gözlənilən addımları atırmı?
Komandanın müdafiə xəttindəki boşluqlar mövsümün ilk turundan “göz oxşamağa” başlamışdı. Bu, 2-ci dövrənin son turunadək davam etdi. Orta hesabla hər oyuna 2 qoldan artıq buraxan (ümumilikdə 30 top) komandanın müdafiəçiləri həqiqətən də faciəvi səhvlər edirdilər. Özü də söhbət yerli və ya əcnəbilərdən getmir. Hamısı eyni gündə idi. Elə bu üzdən də Azərbaycanın 1-ci divizionunda belə oynamağa layiq olmayan Dario Melnyak yola salınanlar sırasında oldu. Vançe Şikovdan çox şey gözlənilsə də, o da ortaya nə səviyyə qoydu, nə də əzmkarlıq.
İndi isə “ağ-qaralar” yeni simalara qovuşmaqdadı. Başlayaq, elə ən başağrılı yerdən – müdafiə xəttindən. Georgi Navalovski – Gürcüstan yığmasının 31 yaşlı futbolçusu bir dəfə Azərbaycan çempionluğunu yaşayıb. 2010-cu ildə o, “İnter”in heyətində qızıl medallara qovuşub. Maraqlıdı ki, Navalovski Rusiyanın 1-ci divizionunda da çempionluq sevincini dadıb. Ən yüksək əyarlı medallara o, “Anji”nin heyətində qovuşub. Ümumilikdə (yığma karyerasındakı oyunlar daxil, ölkədaxili kubok matçları istisna) peşəkar karyerası ərzində 291 oyun keçirən Georginin təcrübəsi “Neftçi” üçün böyük üstünlük olacaq.
Bu xəttin daha bir debütantı Kirill Petrovdu. 26 yaşlı ukraynalı müdafiəçinin karyerası əsasən vətənində keçsə də, o, Polşa və Qazaxıstan təcrübəsinə də sahibdi. Onun Ukraynanın U-19 yığmasının heyətində Avropa çempionu tituluna yiyələnməsinə bəlkə də kölgə salmaq olardı. Məsələn, “əsas fiqurların yanında o da çempion olub” deməklə. Ancaq məsələ burasındadı ki, 2009-cu ildə Petrov həmin Avropa çempionatının ən yaxşı oyunçusu seçilib. Özü də final mərhələsinin bütün oyunlarına gələcək qitə çempionlarını kapitan sarğısı ilə məhz Kirill çıxarıb.
“Neftçi”nin hücum xəttinin gücləndirilməsi də prioritet məsələlərdən biri kimi dayanıb. 14 oyuna vurulan 9 qolun əlavə şərhə ehtiyacı yoxdu. Lakin hücumçunun fərqlənməsi, fəal olması üçün sanballı yarımmüdafiə xəttin olmalıdı. Zdenek Folprext – Avropa Liqasının qrup mərhələsində turnir cədvəlində “Qarabağ”dan geri qalan, lakin çempionumuzdan 4 xal alan “Slovan”ın yarımümdafiəçisi “ağ-qaralar”da icarə əsasında oynayacaq. Bu transferi bu cür dəyərləndirmək olar: “Yüz dəfə eşitməkdənsə, bir dəfə görmək yaxşıdı”. “Slovan”ın “Qarabağ”a qarşı hər iki oyununu izləyən Elxan Abdullayev də məhz bu məsələ riayət edib.
26 yaşlı yarımmüdafiəçi Slovakiyanın bütün aşağı yaş qrupları üzrə yığma komandalarının formasını geyinməklə, sıradan bir oyunçu olmadığını sübuta yetirib. “Neftçi”də oyunu alınacaqmı? İndidən bu suala cavab vermək olduqca çətindi. Yarımmüdafiənin gücləndirilməsi üçün heyətə cəlb olunan daha bir futbolçu İqnassio Herreradı. Komandanın hücum potensialını bəlkə də məhz 29 yaşlı hücumameylli yarıımüdafiəçi müəyyənləşdirəcək. Onun Çilidən olması maraqlı mənzərəyə səhnə açır. “Neftçi”nin Nikolas Kanaleslə bağlı xatirələri ancaq müsbət mənada qalıb. İqnassio da ümidləri doğrultsa, yəqin ki, “Neftçi” tezliklə Bakı-Ceyhan-Santyaqo borusu ilə çilili futbolçuların Azərbaycana gətirilməsini təmin edəcək.
Nəhayət, Namiq Ələsgərov haqda. Istedadlı futbolçu uzunmüddətli zədədən sonra “Kəpəz”də parlasa da, “Qarabağ”a qayıtdıqdan sonra rəqabətə davam gətirmədi və tədricən formasını itirdi. Zədədən sonra əla forma yığan vingerin əsas problemi oyun praktikasından əziyyət çəkmək olub ki, “Neftçi”də o, bu sarıdan korluq görməyəcək. Ələsgərov əvvəlki formasını yığa bilsə, indidən əminliklə söyləyə bilərik ki, bundan həm “Neftçi” qazanacaq, həm Azərbaycan futbolu.
İndi “ağ-qaralar”ı düşündürən əsas məsələlərdən biri keyfiyyətli hücumçunun alınmasıdı. Bu, baş versə, “Neftçi” əvvəlki əzəmətini qaytara biləcək. Doğrudu, komanda Araz Abdullayevi buraxıb, əvəzində planlaşdırdığı kimi, Ağabala Ramazanovu ala bilmədi. Lakin yarımmüdafiə xətti bütün hallarda maraqlı vəhdət təşkil edir: Latın Amerikası, Avropa və Qafqaz üslubu. “Ağ-qaralar”ın forvarda böyük ehtiyacı var. İdealda isə 2 hücumçu alınmalıdı. Çünki zədə və kart limitindən heç kim sığortalanmayıb.
Hələliksə, “Neftçi” mövsümün ikinci yarısına hazırlıqlarını davam etdirir. Özü də “iki cəbhə” üçün: axı, kubokun yarımfinalçıları sırasında paytaxt təmsilçisinin də adı var. Adlara görə, “Neftçi” həqiqətən uğurlu transferlər həyata keçirib. İndi bunu vahid mezanizmə çevirmək lazımdı. Baş məşqçinin seçəcəyi dəst-xətt, verəcəyi taktiki tapşırıqlar komandanın uğurlarında həlledici rol oynayacaq. Qarşıda isə son 21 gün qalır…
CEYHUN ƏLİYEV
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-22 08:34
Musa “Yurqorden” dəftərini bağladı?