Ölkə futbolu
Oxşar qələbələr: Şüvəlandan Qəbələyədək
Oxşar qələbələr: Şüvəlandan Qəbələyədək Bə…
Oxşar qələbələr: Şüvəlandan Qəbələyədək Bəzən Cüneyt Çakırın Türkiyə superliqasında bərbad idarə etdiyi oyunların epizodlarına baxıb, təəccüblənirdim. Axı, qitə səviyyəsində ən məsuliyyətli oyunlara təyinat alan bu FİFA referisi niyə ən bəsit səhvlərə yol versin ki? Türkiyə çempionatı Çempionlar Liqası oyunlarından, yığmaların qarşılaşmalarından daha çətin mübarizəyə meydan olurmu?
Səbəb çox sadədi: Türkiyə çempionatında olan təzyiq heç yanda yoxdu. Qitəmiqyaslı yarışlarda rahat olan hakim ölkəsində adi epizoddakı səhvin nəyə səbəb olacağını gözəl bilir. Az qala bütün ailəsi müzakirə olunur, hər hərəkəti izlənilir.
Bizdə də Türkiyədəki kimidi – futbol yoxdu, əvəzində müzakirə edilməli xeyli mövzu var. Yeyilənləri, sovrulanları gizlətmək, bunun hakim səhvi üzündən reallaşdığını önə şəkmək üçün daha çox kənar məsələlər müzakirə olunur. Səhv qərar, işbirliyi, sifariş yoxdumu? Var! Amma bunlar böyüdüldüyü qədər deyil.
Müqayisə aparmaq istəməzdim, amma təkcə Əliyar Ağayevlə bağlı oxşar vəziyyət gözümüzün önündədi. Ötən mövsüm bir sıra beynəlxalq matçlardan alnıaçıq çıxan hakimimiz Premyer Liqada elə uşaq səhvlərinə yol verirdi ki, onun istedadına şübhə edirdin. Klubların təzyiqi, sosial şəbəkələrdə daimi müzakirə, mətbuatın qınağı Əliyarı az qala sındıracaqdı.
Bu gün izlədiyimiz 2 matçda yenə aləm bir-birinə dəydi. Əvvəlcə Şüvəlanda Orxan Məmmədov özündən qırmızı vərəqə icad etdi. Sadio Tounkara "Qarabağ"ın qapıçısı İbrahim Şehiçə hətta toxunmadığı halda meydandan qovuldu. Bundan yararlanan "Qarabağ" da azlıqda qalan autsayderin müqavimətini qısa müddətdə qırdı.
Sosial şəbəkələrdə müzakirələr qızğın vaxtında ikən növbəti bomba Qəbələdə partladı. Fariz Yusifov "Neftçi"nin qapısına ofsayddan vurulan qolu hesaba almaqla meydan sahiblərini sevindirdi.
Beləcə çempionluğa iddialı hər iki komanda qalib gəldi, AZAL-la "Neftçi"nin isə haqqı tapdandı. Əksi olan zaman nə baş verərdi? Deyək ki, Tounkaraya vərəqə göstərilməsə və ya "Qəbələ"nin qolu hesaba alınmasaydı, nə olardı? Yəqin ki, o zaman "Qarabağ"la "Qəbələ" şikayət edəcək, hakimləri günahlandıracaqdı. Necə ki, indi bunu AZAL-la "Neftçi" edir.
Hakimlərin "təmiz" olduğunu iddia etmirəm, amma onların da səhv etməsi mümkündü. Bunu qərəz yox, səhv kimi qəbul etməliyik. Doğrudu, səhvlər bir qayda olaraq, iddialıların işinə yarayanda şübhələnməyə bilmirsən. Ötən mövsümlərdə hakim hesabına çempion olanları, bu işdə əli olduğu üçün futboldan qovulanları unutmamalıyıq. Lakin dünənə görə bugünküləri də qaralamaq nə dərəcədə doğrudu? Bəlkə klub rəhbərləri öz eyiblərini pərdələmək üçün şou yaradır – "Qarabağ"ın lehinə olanda "Qəbələ", "Qəbələ"nin lehinə səhv olanda "Qarabağ" əlinə saz götürür?
Adi bir epizodla fikrimi əsaslandırım. Şüvəlandakı matçda Sadio Tounkaranın qırmızı vərəqə alması "Qarabağ"ın işinə yaradı və "Qəbələ" bundan narazı qaldı. Ancaq oyundan sonra AZAL-ın baş məşqçisi Tərlan Əhmədovun dedikləri başqa ünvana atılan daş idi: "Növbəti turda "Qəbələ" ilə oynayırıq, yəqin hakim buna görə ona qırmızı vərəqə verdi".
İndi Orxan Məmmədov kimə işləyir? "Qarabağ"a, "Qəbələ"yə, yoxsa ikisinə birdən?..
Bəlkə klublar özləri də təmiz olmadığından hamıdan şübhələnirlər? Axı, bir turda hər iki iddialının hakimin səhvi hesabına qələbə qazanması təsadüf ola bilməz.
AĞA
- Ölkə futbolu2024-04-19 21:00
“Sumqayıt” avrokubok iddiasını davam etdirir
- Premyer-liqa2024-04-19 18:26
“Turan Tovuz” “Sumqayıt”a böyük hesabla məğlub oldu
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq