Emin Cəfərquliyev: “Qırmızı verilibsə, demək ki, var idi”

Topaz Premyer Liqasının 16-cı turu çərçivəsində baş tutan AZAL – “Qarabağ” (1:2) matçından sonra meydan sahiblərinin kapitanı Emin Cəfərquliyev futbolinfo.az saytının əməkdaşının suallarını cavablandırıb:

– Matç istədiyimiz kimi başladı. Erkən qol vurduq. Bundan yaxşı balanğıc ola bilməzdi. Hesabı qorumaq üçün arxaya çəkildik ki, bu, bəlkə də bizim səhvimiz idi. Çünki məşqçimizdən belə tapşırıq almamışdıq. Daha sonra isə azlıqda qaldıq.

– Qırmızı vərəqə ilə bağlı nə deyə bilərsən? Hakim haqlı idi?
– Bu haqda danışmaq istəmirəm. Hakimin tərəfini tutsam, komanda yoldaşımın tərəfini tutmamış sayılıram. Qırmızı verilibsə, demək ki, var idi. Çünki ilk sarını danışığa görə aldı, ikincidə isə hakimin öz qərarı idi. Həmin vaxt epizoddan da uzaq idim. 

– Buraxılan 2-ci qol sanki komandanı həvəsdən saldı…
– Həvəsdən saldı deməzdim, sadəcə, “Qarabağ”la 11-11-ə oynamaq çətindi, qaldı ki, azlıqda qalasan. Bizə çətin oldu və boşluqlar əmələ gəldi. 

– Növbəti turda çətin “Qəbələ” səfərinə yollanacaqsız və rəqib çempionluq uğrunda mübarizə aparır.
– Bizim üçün fərqi yoxdu. Bu gün son Azərbaycan çempionu “Qarabağ”a qarşı oyunumuzu da gördünüz. Öz oyunumu göstərəririk. Xal qazanmaq lazımdı. “Qəbələ” ilə matçda da bunu etməyə çalışacağıq. Başqa variantımız yoxdu. Son pillədən qurtulmaq istəyiriksə, bunu etməliyik.

ELMAR ABDULLA-ZADƏ