Xaqani Məmmədovun təlimatları…

Xaqani Məmmədov yenə “at oynatdı”, meydan oxudu. Hakimlər Komitəsinin sədri bu dəfə “Xəzər TV”də “möhtəşəm” açıqlamaları ilə diqqət mərkəzinə düşdü. Topaz Premyer Liqasının 16-cı turunda baş verən rüsvayçılıqlara “don geyindirməyə” çalışan Məmmədov yenə də futbol camiəsini kor və savadsız göstərməyə çalışdı.

Ən unudulmaz epizod Orxan Məmmədovun AZAL – “Qarabağ” matçında Sadio Tounkaraya göstərdiyi vərəqələrlə bağlı idi. Hakimlər Komitəsinin sədrinin ilk sarı vərəqə zamanı futbolçunun ayaq üstə olmamasına şərhi: “Gəlin, bu məsələni şişirtməyək. Bu, metodiki səhvdi”.

Xaqani müəllim, qaydalara əsasən futbolçuya rəsmi xəbərdarlıq göstərilərkən, onun hakimlə üz-üzə dayanması nəyə görə vacibdi? Onun üçün ki, cəzaya məruz qalan oyunçu sarı vərəqə aldığını və bundan sonra ehtiyatlı davranmalı olmasından məlumatlanmalıdı! Orxan Məmmədov isə yerdə qıvrılan oyunçuya sarı vərəqə verib, hadisə yerindən uzaqlaşır. Bəlkə Tounkara heç bu epizodu görməyib? Bəlkə Tounkara elə bilib ki, həmin an sarı vərəqə İlqar Ələkbərova göstərilib? Belə metodiki səhv olmur, futbol təsərrüfatının “gözünə kül üfürməyin”! 

Bəlkə Məmmədov futbolçunun nəyə görə hakimlə üz-üzə dayandıqdan sonra sarı vərəqəylə cəzalandırılmalı olduğunun səbəbini bilmir? Bilir, özü də əla bilir! Çünki qanundan istədiyin kimi istifadə etmək üçün, onu əzbər bilməlisən. Məmmədov da qaydaları əla bilir… Ancaq istiqamətini öz xeyrinə dəyişmək üçün.

Tounkaranın aldığı ikinci sarı vərəqə isə… Ad tapmaq olmur. Məmmədovların (həm Orxanın, həm də Xaqaninin) möhtəşəm açıqlamaları: “Cərimə meydançasında qapıçı toxunulmazdı”!

Əvvəla, dedikləri qapıçı meydançasına şamil olunur. Yəni, 6 metrə! İndi də həmin toqquşmanı xatırlayaq. İlqar Qurbanov və Sadio topu təqib edirlər. “Qarabağ”ın müdafiəçisi malili futbolçudan öndə olsa da, Tounkara yüksək sürət hesabına müdafiəçini qabaqlamağa çalışır. Əks istiqamətdən topa tərəf şığıyan İbrahim Şehiç komanda yoldaşının köməyinə qaçır. Topu ələ (ayağa) keçirmək istəyən AZAL-ın futbolçusu son anda Qurbanovu qabaqlasa da, qolkiper sıçrayışla topu ələ keçirir. Ətalət qanununa uyğun olaraq, “təyyarəçilər”in oyunçusu qaçdığı istiqamətdə daha bir neçə addım atır. Belədə Şehiçə toxunmaması qeyri-mümkündü!

Xaqani Məmmədov da bunu əlində bayraq edib ki, Şehiçə toxunuş var. Bunu HK sədri deməsəydi, əlavə kameralar olmasaydı, anlamaq çətindi ki? Epizodun davamında Tounkara yerdə qalan əlcək sahibinə yaxınlaşıb, üzrhaxlıq edir. Bununla da insidentin böyməməsi üçün ən düzgün addımı atmış olur. Lakin Orxan Məmmədov fərqli yol seçir və futbol ictimaiyyətinin “tüstüsünü başından çıxarır”.

Deyək ki, Orxan səhvi edib, bunu da futbol ictimaiyyəti gördü, tənqid atəşinə tutdu və ümid etdi ki, analoji səhvlər bir daha təkrar olunmayacaq. Bəs, Xaqani Məmmədov nə danışır? “UEFA-nın ən son təlimatlarına əsasən…”

Bu, UEFA-nın təlimatları yalnız Azərbaycana şamil olunur? Özü də yalnız hakim belə absurd qərar verdikdən sonra? İşdi, ikinci sarı vərəqə göstərilməsəydi, UEFA-nın son təlimatları “rezko” dəyişəcəkdi. Buna tam əmin olun. 

Sonda Yeni il öncəsi Elxan Məmmədovla müsahibə zamanı AFFA-nın baş katibinin dediyi bir ifadəni xatırlatmaq istəyirəm: “Xaqani Məmmədovun kommunikasiya problemi var”.

Dəqiq belədi! Hakimlər Komitəsinin sədri hakim səhvini pərdələmək əvəzinə, etiraf etsəydi ki, həmsoyadı düzgün qərar verməyib, məsələ bu qədər şişməzdi. İndi isə qoy sevə-sevə həqiqətləri oxusun.

CEYHUN ƏLİYEV