"Qarabağ"a qardaş payı, "Qəbələ"nin İnqilabı

Qəribə vəziyyətdi. Ağlayan, şivən salan, bununla təzyiq göstərən mükafatını alır, öz eyiblərini başqalarının günahları ilə pərdələyir, aciz olan, səsini çıxarmayan zərbə dalınca zərbə alır.

Tur hələ davam edir, lakin çempionluq yarışının favoritləri dünən növbəti ev qələbələri ilə qiyabi mübarizəni davam etdirdi. "Qəbələ" və "Qarabağ"ın qələbələri eynihesablı olsa da, 3 xal əldə etmək üsulları fərqli oldu.

Günün ikinci matçında "Qarabağ" daim, son 4 matçda məhz 2 qolla yendiyi "Zirə"yə yenə eyni aqibəti yaşatdı. Hər iki hissənin startında vurulan qollar ağdamlıları rahatlatdı, qonaqların yeni baş məşqçisi Ayxan Abbasovu isə karyerasının ilk xal itkisinə məruz qoydu. Gərgin keçməyən matçda cəmi 1 sarı vərəqə göstərildi, "Qarabağ" matçın sonunu məşqə çevirdi, ciddi müqavimət görmədən yoluna davam etdi.

Ağdamlıların daim lazımsız oyunçularını ya icarəyə, ya da birdəfəlik göndərdiyi "Zirə"ylə çox bağlılıqlarını tapmaq olar. Qəsəbə komandasını faktiki, "Qarabağ"ın kapitanı Rəşad Sadıqov idarə edir. Bu komandaları qardaş saymağa imkan verən digər özəl səbəblər də var. Müqavimətsiz təslim olan "qartallar"ın bəzi oyunçularına gözlənilmədən istirahət verməsi də müəmmalı idi – sanki onlar növbəti turdakı "Qəbələ" ilə oyun üçün qorundular. O "Qəbələ" ki, çemionluq yolunda "Qarabağ"ın əsas rəqibidi.

"Qəbələ"nin qələbəsi daha çətin alındı. "Qırmızı qaralar" hesabı açandan sonra çətin duruma düşdülər. 10 nəfərlə qalan AZAL-ın haqqı tapdanmasaydı, qonaqlar penalti vurmalı idi. Amma meydan sahiblərinin hücumusu Daniel Subotiçin öz cərimə meydanalarında voleybol oynamasını hakimlərdən başqa hamı gördü. İnqilab Məmmədovun bu "dəstəy"indən yararlanan "Qəbələ" son dəqiqələrdə daha bir qol vurub qələbə qazandı.

Maraqlıdı, son vaxtlar hakimlərdən ən çox narazılıq edən də "Qəbələ"di, onların xidmətindən yararlanan da. Deyəsən, səs-küy salmaq, etiraz etməklə "qırmızı qaralar" hakimlərin gözünü qorxutmağa, onlara təzyiq göstərməyə nail olub. Elə olmasaydı, ardıcıl 2 matçda hakim səhvləri onlara 6 xal qazandırmazdı. Klub rəsmiləri sosial şəbəkələrdə "Qarabağ"ın lehinə olan hakim səhvlərini gündəmə çevirməklə, rəsmi sayt vasitəsilə "hakimlərin səhvi ilə qazanılan xallar bizə lazım deyil" deməklə iz azdırırlar.

3-cü dövrə başlayanı "Qəbələ" 3 matç keçirib. "Sumqayıt"la oyun heç-heçə bitib; "Neftçi" ilə matçda qonaqların penaltisi verilməyib, üstəlik, qələbə gətirən qol ofsayddan vurulub; AZAL-la görüşdə rəqibin bərabərliyi təmin edəcək penaltisi təyin edilməyib. Kəsəsi, hər 2 qələbə hakim səhvi nəticəsində reallaşıb. Həm də hər 3 oyun ev matçı olub.

"Qəbələ" özünü mübahisələrə, qərəz axtarmağa o qədər aludə edib ki, komanda futbol oynamağı unudub. Bu gedişlə bəhanələrin arxasında gizlənən Roman Qriqorçukun məyus olacağı günə çox qalmayıb. Komandada işlər yaxşı getmir, bu gedişlə artıq hakimlər də onları xilas edə bilməyəcək, növbəti üsyanda kimsə qəbələlilərə inanmayacaq. "Qırmızı qaralar" əsl futbolla xal qazana bilmir, daha güclü rəqiblərlə görüşlərdə büdrəmələr qaçılmazdı. Aylıq büdcəsi "Qəbələ"nin istənilən legionerinin yarım aylıq maaşı qədər olan AZAL belə bu komandadan daha məzmunlu futbol sərgiləyirdi. Ona görə də klub rəhbərliyi Qriqorçukun "aerodrom" papağını qarşısına qoyub fikirləşməlidi.

Hər 2 favorit qış fasiləsindən sonra eyni miqdarda xal toplayıb. Bütün mübahisələrdə də hakim səhvləri məhz onların xeyrinə olub. Haqqı tapdananlar öz yerində, görünən odur ki, rəqiblər büdrəməmək üçün imkanlarından maksimum istifadə edir. Yəqin ki, çempionluğun taleyi şəxsi görüşlərdə həll olunacaq. 2 belə matçdan birincisi isə elə bu ay Qəbələdə olacaq.

FƏRİD