Müsahibə
Rasim Ramaldanov: “Əliyar Ağayev də qırmızı vərəqə vermək istəmirdi”
Topaz Premyer Liqasının 18-ci turunda “Qəbələ” səfə…
Topaz Premyer Liqasının 18-ci turunda “Qəbələ” səfərdə “Zirə” ilə 2:2 hesablı heç-heçəyə razılaşdı. Futbolinfo.az xəbər verir ki, “Qəbələ”nin heyətində debüt oyununu keçirən və qırmızı vərəqə alan Rasim Ramaldanov jurnalistlərin suallarını cavablandırıb:
– Oyuna hazır idik. Ağır keçəcəyini bilirdik. 3 xal üçün meydana çıxmışdıq. Qismət belə imiş.
– Azlıqda qalsanız da, son dəqiqələrdə qol vurduz. Həmin qoldan sonra arxayınlıq var idi?
– 2-ci qolu vuranda sonra dedim ki, artıq qalib gələrik. Soyunub-geyinmə otağına yollanmışdım. Heç onların bərabərlik qolunu görmədim.
– İlk oyununu keçirdin. Həyəcan var idi?
– Xeyr, həyəcan yox idi. Yavaş-yavaş uyğunlaşıram.
– Qırmızı vərəqə aldığın epizodla bağlı nə deyə bilərsən?
– Ondan əvvəl məni sarı vərəqə ilə cəzalandırmışdı. 5-10 dəqiqə sonra da 2-ci sarını göstərdi. Özüm də bilirəm ki, meydandan qovulmalı deyildim. Əliyar Ağayev də məni 2-ci dəfə sarı vərəqə ilə cəzalandırmaq istəmirdi. Yan xətt hakimi olan Zeynal Zeynalov bayrağını qaldırdı və ona işarə etdi. Fikrimcə, səhv qərardı. Etiraz etsəm də, xeyri yoxdu. Hakim qərarını vermişdi.
– "Qəbələ" son zamanlar hakimlərdən narazılıq edir. Evdə keçirdiyiniz son iki oyunda hakimlər AZAL və "Neftçi"nin əleyhinə qərarlar verib. Səncə, hakimlərin bu qərarları nəylə bağlıdı?
– Hakimlərin idarəçiliyi haqda danışmaq istəmirəm. Onların öz sədrləri var. Özləri bilər.
– Roman Qriqorçuk sənə irad bildirmədi?
– Xeyr. Bu haqda danışmadıq.
– Növbəti turda "Qarabağ"a qarşı oynayacaqsız. Mərkəz müdafiəçilərindən sən cəzalı, Vernidub və Santos isə zədəlidir…
– Baş məşqçi buna bir əlac tapar. Düzdür, çətin olacaq.
– Debüt qarşılaşmanda qırmızı vərəqə almaq necə hissdi?
– Təbii ki, heç kimə xoş gəlməz. Xoşagəlməz an idi. Məncə, düzgün olmadı. Mənə dəstək verməkdənsə, meydandan çıxarmağı yaxşı olmadı. Hakimlərə demirəm. Sadəcə, ilk oyunda meydandan qovulmamalı idim.
– Bir müddət Gürcüstanda oynadın və yenidən Azərbaycan çempionatına qayıtdın. Dəyişən nə var?
– Nə mənada? Hakimlər barəsində bir daha deyirəm ki, danışmayacam. Hər şeyə aydınlıq gələcək və təkrara baxacaqlar.
– 2-ci qoldan sonra qol sevincini qışqıraraq qeyd etdin. Qələbə qazansaydız, qırmızı vərəqən də sığortalanacaqdı…
– Sevinirdim və deyirdim ki, qələbə qazanarıq. Qismət belə imiş.
ELMAR ABDULLA-ZADƏ
- Ölkə futbolu2024-04-19 21:00
“Sumqayıt” avrokubok iddiasını davam etdirir
- Premyer-liqa2024-04-19 18:26
“Turan Tovuz” “Sumqayıt”a böyük hesabla məğlub oldu
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq