Paytaxt klubları və əzəli rəqiblər üz-üzə

Bu gün Topaz Premyer Liqasında 19-cu tura start veriləcək. Futbolinfo.az xəbər verir ki, ənənəvi olaraq, yenə turun iki görüşü ilk, qalanı isə ikinci oyun günündə baş tutacaq.

İlk oyun gününün hər iki görüşü Bakıda keçiriləcək. Hesabat turu “İnter” və “Zirə” arasındakı paytaxt derbisi ilə start götürəcək. Ardından “Neftçi” əzəli rəqibi “Kəpəz”lə qarşılaşacaq.

Topaz Premyer Liqası
19-cu tur
18 fevral

“İnter” – “Zirə”

Hakimlər: Orxan Məmmədov, Vaqif Musayev, Akif Əmirəli, Ziya Nəsirov.
AFFA nümayəndəsi: Arif Fərəcov.
Hakim-inspektor: Kərim Ağayev.
Bakı. “İnter Arena”, 15:30.

Liderlərdən uzaq düşməməyə çalışan "İnter" üçün "Zirə" ilə oyunda xal itkisi arzuolunmaz sayılacaq. Bu komandaların duellərində meydan sahibi komanda heç vaxt uduzmayıb. “İnter” 4 oyundur meydanı qolsuz tərk etmir. Cəmi 6 dəfə üz-üzə gəlmiş tərəflərin oyunlarında daha çox (4 dəfə) heç-heçə qeydə alınıb. Komandaların hərəsi bir qələbəyə sevinib. Elə top fərqində də bərabərlik hökm sürür. Bu gün hansısa komanda qalib gəlsə, bu ənənə də pozulmuş olacaq.

Maraqlıdır ki, cari mövsümdə baş tutan hər iki matç eyni – 1:1 hesablı heç-heçə ilə nəticələnib. İlk dövrədə Ağabala Ramazanov "bankirlər"i hesabda önə keçirsə də, meydan sahibləri 90+2-ci dəqiqədə Viktor İqbekoyinin vurduğu qolla qələbəni əldən vermişdilər. Zirədə keçirilmiş son qarşılaşmada da öncə "İnter"i Ramazanov kimi qışda bu klubdan ayrılan Ruslan Abışov sevindirmiş, rəqib isə Yovan Krnetanın 90+3-cü dəqiqəsində vurduğu qolla bərabərliyə nail olmuşdu. Bir sözlə, "Zirə" "İnter"i bu mövsüm yalnız son saniyələrdə vurulmuş qollarla qələbədən məhrum edib. Bu dəfə necə olacağı maraqla gözlənilir.

Statistika: 6 oyun, +1, =4, -1, top fərqi 4-4

1-ci dövrə: 1:1
2-ci dövrə: 1:1
 
“Neftçi” – “Kəpəz”

Hakimlər: Rauf Cabbarov, Nahid Əliyev, Rahil Ramazanov, Əliyar Ağayev.
AFFA nümayəndəsi: Sakin Məmmədzadə.
Hakim-inspektor: Füzuli Nəcəfov.
Bakı. “Bakcell Arena”, 18:00.

Azərbaycanın iki ən köklü klubunun dueli həm də turnir cədvəlində qonşu olan komandaların görüşü kimi də dəyərləndirilə bilər. Qış fasiləsindən sonra ardıcıl məğlubiyyətlərlə üzləşən Şahin Diniyevli "Kəpəz"dən fərqli, daha uğurlu çıxışı ilə diqqət çəkən Elxan Abdullayevin "Neftçi"si son turda hətta turnir cədvəlində Gəncə təmsilçisini qabaqlamağa nail oldu. Bir sözlə, bu qarşılaşmanı 6 xallıq matç da adlandırmaq olar. Təbii ki, "ağ-qaralar" uğurlu seriyanı davam etdirməyə, gəncəlilər isə uğursuz gedişata son qoymağa çalışacaqlar.

Statistikaya da nəzər saldıqda, "Neftçi"nin daha üstün olduğunu görürük. İndiyə qədər keçirilmiş 45 oyundan 21-də bakılılar, 17-də isə gəncəlilər 3 xala seviniblər. Top fərqində də paytaxt klubunun ciddi üstünlüyü var. Maraqlı tendensiyalardan da biri odur ki, meydan sahibi olan komanda ardıcıl 5 oyunu qolsuz tərk etməyib.

Son iki oyunda meydan sahibi olan tərəf 2 cavabsız qolla qalib gəlib. Bu mövsümə təsadüf edən həmin oyunlardan birincisində "Neftçi" Denilson Pereyra və Katalin Tiranın vurduğu qollarla qalib gəlmişdi. Gəncədəki görüşdə isə Orxan Əliyevlə Julien Ebah elə ilk yarıdaca qələbəni təmin etmişdilər. Ənənə davam etsə, Bakıdakı görüşdə yenə "ağ-qaralar" ən azından uduzmamalıdırlar. Hər halda indiki "Kəpəz"in yüksəlişdə olan əzəli rəqibini məğlub etməsi heç də inandırıcı görünmür.

Statistika: 45 oyun, +21, =7, -17, top fərqi 69-43

1-ci dövrə: 2:0
2-ci dövrə: 0:2