Premyer-liqa
Mərkəzi matça doğru: Qurbanov üçün 3 variant
Qış fasiləsindən sonra hamının səbrsizliklə gözlədiyi ma…
Qış fasiləsindən sonra hamının səbrsizliklə gözlədiyi matça 1 gün qaldı. Artıq 2 gündür ki, futbolinfo.az “Qəbələ” – “Qarabağ” matçına həsr olunmuş yazılar dərc edir. Budəfəki mövzumuz qonaqların baş məşqçisi Qurban Qurbanovun güvənəcəyi start heyətinin araşdırılmasıdı.
Təcrübəli mütəxəssisin xidmətindən yararlana biləcəyi futbolçuların siyahısına baxdıqda, bir neçə model üzə çıxır. İlk növbədə onu qeyd edək ki, Rəşad Sadıqovun oynama şansı cüzidi və bu səbəbdən də heç bir variantda onun start heyətdə yer alacağını müzakirəyə çıxarmayacağıq. Belədə, mərkəzdə Bədavi Hüseynovla kimin tandem təşkil edəcəyinə dair sualın rəsmi cavabı iki olsa da, Elvin Yunuszadəli heyətin meydana çıxacağını yaxına belə buraxmaq istəmirik. Hər halda, Qurban Qurbanov özünə düşmən kəsilməz. Deməli, Maksim Medvedev “təcili yardım” obrazında çıxış edərək, ezam olunacaq müdafiənin mərkəzinə. Bu xətt üzrə digər iki müdafiəçi isə Ansi Aqolli ilə İlqar Qurbanov olacaq.
Qabaqcadan qeyd edək ki, təklif etdiyimiz 3 variantda “toxunulmaz” statusa yalnız müdafiə xəttinin oyunçuları layiq görülüb. Hətta qapı xəttinin kimə etibar ediləcəyini belə əminliklə söyləmək olmur. Əlbəttə, İbrahim Şehiç daha sanballı qolkiperdi. Ancaq həm legioner, həm də 21 yaşlı futbolçu limiti “süvarilər”in çalışdırıcısını dilemma qarşısında qoyur.
Beləliklə, başlayaq Şehiçli variantlardan. Dino Ndlovunun həlledici zərbə vurmaq bacarığı və təcrübəsi Mahir Mədətovu nəzərəçarpacaq dərəcədə üstələyir. Qurbanov cənubi afrikalıya şans tanısa, yerli gənc limit məsələsini Coşqun Diniyevlə dolduracaq və belədə, Qara Qarayev təcrübəli mütəxəssisin yanındakı kreslolardan birini qızdırmaqla məşğul olacaq. Diniyev yarımmüdafiənin mərkəzində Mişel Madera və Riçard Almeydayla trio təşkil edəcək. Cinahlarda isə son zamanlar nəzərəçarpacaq dərəcədə artıran Əfran İsmayılov və və Reynaldonun gedişindən sonra “ağ gün”ə çıxan Muarem Muarem qərarlaşa bilər.
Təqdim edəcəyimiz ikinci versiyada Mahir Mədətov cinah yarımmüdafiəçisi kimi forma geyinir. O, Əfran İsmayılovun yerinə çıxır və belədə, Qara Qara üçün yaşıl işıq yanır. Belədə, ehtiyatda qalacaq Coşqun oyun darıxdırıcı olsa, arxasını meydançaya çevirib, Qəbələ meşələrini seyr etməklə də məşğul ola bilər.
Nəhayət, təqdim edəcəyimiz 3-cü versiyada Qurbanov Şəhrudin Məməhəmmədəliyevli start heyəti qurur. Bu cür variantda baş məşqçinin bütün aparıcı skripkaları orkestrdə yer almış olur: Şəhrudin – Ansi, Maksim, Bədavi, İlqar – Muarem, Miçel, Qara, Riçard, Əfran – Dino. Ancaq bu variantı da ideal adlandırmaq olmaz. Hər halda, meydan oyunçuları daha zəhmli görünsə də, “Qəbələ”qonaqların qapısı ağzında qol imkanları yaratmağı bacaran ifaçılara sahibdi. Belədə, çərçivə qoruyucusunun təcrübəsi olduqca önəmlidi.
Hər üç variantı tərəzinin gözünə qoyduqda, təqdim etdiyimiz birinci versiya bizə daha inandırıcı görünür: İbrahim Şehiç – Ansi Aqolli, Maksim Medvedev, Bədavi Hüseynov, İlqar Qurbanov – Muarem Muarem, Coşqun Diniyev, Miçel Madera, Riçard Almeyda, Əfra İsmayılov – Dino Ndlovu.
Oyunun start fitinə 25 saata yaxın vaxt qalır. Qurbanovun hələ də ideal 11-liyi müəyyənləşdirmək üçün vaxtı var. Sabah isə bizi soyuq qışda qaynar 90 dəqiqə gözləyir.
CEYHUN ƏLİYEV