Premyer-liqa
Kim daha şanslıdı: “Qarabağ – 21, “Qəbələ” -19?
“Qəbələ”nin “Qarabağ” üzərində qaza…
“Qəbələ”nin “Qarabağ” üzərində qazandığı qələbədən sonra qızıl medallar uğrunda mübarizə zirvə həddinə çatdı. İndi çempionluq yarışmasında şanslar bərabərdi. Ən azından turnir cədvəlindəki vəziyyət bu cür fikir irəli srmk üçün əsas verir. Bəs, qarşıdakı 9 tur bu rəqabətdə hansı komandanı daha şanslı edir? Gəlin birlikdə izləyək.
Artıq növbəti turda ikihakimiyyətliyə son qoyula bilər. “Qarabağ” evdə cari mövsüm məğlub edə bilmədiyi “İnter”i qəbul edəcək. Qurban Qurbanovun yetirmələri bu sindroma son qoya biləcəklərmi? “İnter”də durum bir o qədər də ürəkaçan olmasa da, Zaur Svanadzenin 5 müdafiəçili modelinin çempiona başağrısı gətirəcəyini əminliklə söyləyə bilərik. Doğrudu, ağdamlılar üçün bu matç həm də prinsipial xarakter daşıyacaq. Necə də olmasa, cari mösvümdə məğlub edə bilmədikləri yeganə rəqibə qarşı oynayacaqlar. Amma bu oyunda “süvarilər”in xal itirmə ehtimalı kifayət qədər yüksəkdi.
20-ci turda “Qəbələ”ni də ciddi sınaq gözləyir. Roman Qriqorçukun yetirmələri qarşılaşacaqları “Kəpəz”dən aşkar güclü olsalar da, onların rəqibi tək Şahin Diniyevin yetirmələri olmayacaq. Gəncədəki meydançanın vəziyyəti barədə hansısa şərh yazmağa ehtiyac yoxdu. Kala-kötürlü meydanda yaradıcı futbol oynamaq isə olduqca müşküldü. Buna baxmayaraq, “qırmızı-qarlar”ın Gəncə səfərindən 3 xalla dönəcəklərini proqnozlaşdıra bilərik.
21-ci turda “Qarabağ” “Sumqayıt”ın qonağı olacaq. Adəti üzrə Qurbanovun yetirmələri “Gənclik şəhəri” təmsilçisi ilə oyunlarda özlərini “suda balıq” kimi hiss edirlər. Böyük ehtimalla, bu dəfə də istisna təşkil etməyəcək və ağdamlılar çətinlik çəkmədən hesablarına 3 xalı yazdıracaqlar.
“Qəbələ” isə “İnter”i qəbul edəcək ki, bakılılar nə qədər iddialı olsalar da, səfərdən xalla ayrılacaqları inandırıcı görünmür. Hər halda, qış fasiləsində 2 aparıcı üzvünü itirməsi komandaya ucuz başa gələ bilməz. Ard-arda 2 ağır oyunun yükünü isə seyrəlmiş heyətin daşıması real görünmür.
22-ci turda “Qarabağ” AZAL-ı qəbul edəcək. Çətin ki, finiş xəttində Tərlan Əhmədovun komandası ağdamlılarla oyunda sensasiyaya imza ata bilə.
Roman Qriqorçukun komandası üçünsə “Neftçi”səfəri cəhənnəmə çevrilə bilər. “Ağ-qaralar” 3-cü dövrədə Qəbələdə baş tutan matçda rəqiblərinə dişlərini göstərməyi bacarmışdı. İndi isə doğma arenada bundan da artığını etməyə çalışacaqlar. “Qırmızı-qaralar”ın bu oyunda 3 xal qazanmayacağını düşünürük.
23-cü turda “Qarabağ” “Zirə”nin qonağı olacaq. Həmin “Zirə”nin ki, tarixi ərzində bir dəfə də olsun Ağdam təmsilçi üzərində qələbə qazana bilməyib. Böyük ehtimalla, çempion bu dəfə də aktivinə 3 xal yazdıracaq.
Qriqorçukun komandası 23-cü turda ilk baxışdan rahat oyun keçirəcək. Amma Allahın lənətlədiyi “AZAL Arena”da o qədər ayaqlar sınıb ki… Həm də əyalət təmsilçisinin ən ciddi problemi zəif rəqiblərə qarşı oyunlarda lazımınca motivasiyola bilməməsidi. Başqa sözlə, “qırmızı-qaralar”un bu matçda planlaşdırmadıqları xal itkisinə məruz qalacaqlarını düşünürük.
24-cü turda hər iki komandanın itkisiz irəliləyəcəyini düşünürük. “Qəbələ”nin evdə “Zirə”dən, “Qarabağ”ın isə “Kəpəz”dən üstün olacağını düşünürük.
25-ci turda çempionluq uğrunda mübarizə aparan bu iki kollektiv üz-üzə gələcək. Bu oyuna dair fikir bildirmək olduqca çətin məsələdi. Çünki komandalar yuxarı-aşağı eyni səviyyədədilər. Görüşün Suraxanıda baş tutması “süvarilər”ə cüzi üstünlük qazandırır. Amma “qırmızı-qaralar”ın prinsipial oyunlara necə motivasiya olduqları haqda hər kəs bilir. Biz ən primitiv versiyanın üzərində dayanırıq – heç-heçə.
26-cı turda “Qarabağ”ı ağır “İnter” səfəri gözləyir. Qarşılaşmanın süni örtüklü meydançada keçirilməsi meydan sahiblərinə əlavə üstünlük qazandırır. Ancaq Qurbanovun yetirmələrinin ustalıq səviyyəsi əlbəttə ki, “İnter”i üstələyir. Bu matçda da bərabərliyin qeydə alınacağını düşünürük.
Həmin gün “Qəbələ”ni daha bir Gəncə səfəri gözləyir. Yəqin ki, həmin vaxta qədər yaz nəfəsi meydançanın durumuna da müəyyən təsirini göstərər. Belədə, “qırmızı-qaralar”ın qalib gəlmək şansı yüksələcək ki, böyük ehtimalla, onlar bunu bacaracaq.
27-ci turda “Qarabağ” “Sumqayıt”ı çətin ki, Suraxanıdan sağ-salamat buraxa. Hər halda, bütün münəccimlər ulduzların ağdamlıların xeyrinə göstərdiyini iddia edir.
“Qəbələ” isə “İnter”i qəbul edəcək ki, sona 1 tur qalmış xal itirməsi real görünmür. Hər halda, turnir cədvəli ən yüksək əzmkarlıq üçün motivasiya verəcək.
Sonuncu turda “Qarabağ” “Neftçi”nin qonağı olacaq. Bu oyunda çempiona qələbə lazım olsa, onlar nəyin bahasına olursa-olsun, istəklərinə çatacaqlar. Çünki “Neftçi”nin heyəti yeni-yeni formalaşır və bu komandadan stabil çıxış gözləmək hələ ki, tezdi.
“Qəbələ”nin Sumqayıt səfəri haqda isə eyni nikbinliyi göstərə bilməyəcəyik. Çünki Samir Abasovun komandasının “qırmızı-qaralar”a qarşı oyunu alınır. Əlbəttə, məğlub ola bilərlər, ancaq “Sumqayıt”ın evdə ciddi müqavimət göstərəcəyini düşünürük. Ehtimal edirik ki, bu matçda heç-heçə qeydə alınacaq.
İndi isə proqnozumuza əsasən xalları hesablayaq. Qarşıdakı 9 turda “Qarabağ”ın 21, “Qəbələ”nin isə 19 xal yığacağını düşünürük. Əlbəttə, bu, proqnozxarakterli yazıdı və yalnız fundamental təhlilə söykənib. Kimin hansı nəticələrə imza atacağını isə aprelin 29-da biləcəyik.
CEYHUN ƏLİYEV
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Premyer-liqa2024-04-12 20:56
“Sumqayıt”la “Zirə”dən heç-heçə