Ölkə futbolu
Klubları yersiz xərcə salan limit
“Neftçi” və “Qəbələ”nin Topaz Premy…
“Neftçi” və “Qəbələ”nin Topaz Premyer Liqasındakı hazırkı limitdən narazı olması aydındı. Onların buna görə AFFA-ya müraciət edib, 6+5 qərarına yenidən baxılmasını istəməsini də xəbər vermişdik.
Futbolinfo.az xəbər verir ki, klublar bunun üçün konkret səbəb göstərib. Bakılılar səviyyəli yerli oyunçu qıtlığından əziyyət çəkir və uğur qazanmaq üçün əcnəbilərə güvənməyi lazım bilir. Lakin indiki halda, hətta Vitali Vernidub və Rafael Santosun zədəli olduğu vaxtda da bir sıra güclü oyunçularını ehtiyatda saxlamağa məcbur olur. Baqali Dabo və Teo Uiks yalnız əvəzetmədən meydana daxil olursa, David Petrzkieviç daim ehtiyatda oturur, Rikardinyo 2017-ci ildə yalnız 1 dəfə (o da ilk turda) meydana çıxıb. Futbolçuya 3 ay maaş ödəyib, onun adını hətta iştirak ərizəsinə salmamaq isə heç də sərfəli deyil.
Təbii ki, burada klubu günahlandırmaq, limitdən xəbərdar ola-ola niyə bu qədər əcnəbi almasına görə qınamaq olar. Lakin iş ondadı ki, avrokuboklarda bu futbolçuların hamısı start heyətində yer alırdı. Avropa Liqasında hər hansı limit olmadığından əcnəbilər mütəmadi oynamaq şansı qazanırdı. Elə komandanın uğurlu nəticə göstərməsinin, ardıcıl 2 il qrup mərhələsinə düşməsinin də səbəbi bu idi. “Qəbələ”nin növbəti mövsümdə də avrokuboklara vəsiqəni nəzəri cəhətdən təmin etdiyini əsas götürsək, əcnəbilərin saxlanılması başadüşüləndi. Çünki avrokubokdan avrokuboka heyəti dəyişmək olmur.
Ölkədə limitin olması, avrokubokda isə uğurun əsasən əcnəbilərin hesabına qazanılması faktı qəribə vəziyyət yaradıb. Ya klublar legioner sayını azaldıb, qitə yarışlarında nəticələrini zəiflətməli, ya da yersiz israf sayəsində əcnəbiləri ehtiyatda oturtmalıdı. Elə bunu nəzərə alan “Qəbələ” xərc çəkdikləri futbolçulardan istifadə etmək üçün AFFA-nın limiti ən azı 7+4-ə qaldırmasını gözləyir.
“Neftçi” avrokuboda oynamasa da, bu komandanın da ciddi problemi var. Bakılılar məhz limitə görə Maksim Vaylonu heyətə qoymağa məcburdu. Boyan Baykoviç havayı maaş aldığı bir vaxtda bu gənc qolkiper 1 dövrəyə 3 ciddi səhv edib və son turda “Zirə”yə məğlubiyyətin əsas səbəbkarı olub. Təkcə bu fakt göstərir ki, klubları limitlə sıxmaq yersizdi. Bir çox ölkələr tətbiq etdikləri bu təcrübədən imtina edib. Vaylonu limit xatirinə oynatmaqla onu futbolçu etmək olmayacaq.
Milli komandanı, futbolumuzun gələcəyini düşünürüksə, bunun üçün çempionat iştirakçılarına əngəl yaratmaq yox, uşaq futboluna qayğını artırmaq lazımdı. Hətta limitin 6+5 şəklində olması da milli komandamıza heç nə qazandırmadı, əksinə, klublara mane oldu. Uşaq futbolundakı xaosun nəticəsidi millililərimizə yenə dağıstanlılar, türklər, ölkə xaricində yetişmiş azərbaycanlılar, eləcədə Riçard Almeyda dəvət olunur. Deməli, problemin həlli limitdə deyil.
AĞA