Müsahibə
Mirheydər Səfiyev: “Sponsor tapılsa, Premyer Liqada oynamağa hazırıq”
“Mil-Muğan”ın prezidenti Mirheydər Səfiyevin futbolinf…
“Mil-Muğan”ın prezidenti Mirheydər Səfiyevin futbolinfo.az saytına müsahibəsi:
– Komandamızın vəziyyəti yaxşıdı, normal təminatlarımız var. Matçlarımız da pis keçmir. Amma bir neçə görüşdəki məğlubiyyətimiz komandamızın turnir cədvəlindəki mövqeyinə təsir edib. Elə də çox narazılığımız yoxdu.
– Çətinliyiniz əsasən nələrdə olur?
– Baş məşqçimiz Aqil Məmmədov komandaya bir az gec gəlib deyə, vaxt azlığından futbolçu seçimimiz tam istədiyimiz kimi olmayıb.
– Futbolçuların qalması üçün bazada şərait necədi?
– Şəraitimiz var. Futbolçuların qalmağa, yeməyə yerləri var. Həmçinin “parnoy”, trenajor və digər cəhətlərdən də problem olmadığını demək olar.
– “Mil-Muğan” Premyer Liqaya nə dərəcədə hazırdı?
– Stadion, struktur – bütün meyarlarla bağlı sənədlər AFFA-ya təqdim edilib. Bilirsiz ki, stadionumuz UEFA-nın da lisenziyasını alıb. Sadəcə, maliyyə problemlərimiz yarana bilər. Mümkündü ki, məhz bu səbəbdən Premyer Liqada iştirak edə bilmədik. Sponsor tapılarsa, Premyer Liqada oynamağa hazırıq.
– Əsas meydançanın ot örtüyü elə də yaxşı vəziyyətdə deyil…
– Bu məsələni həll etmək olar. Premyer Liqada oynamaq üçün lisenziya ala bilsək, yeni mövsümün startına kimi meydançanı normal vəziyyətə gətirmək olar.
– Aşağı yaş qrupularında vəziyyət necədi?
– Bizdə 10-15 yaş arası bütün komandalarımız fəaliyyət göstərir. U-17 komandamızı qeydiyyatdan keçirmişik, növbəti mövsümdən yarışlara qatılacaq.
– Əvvələr “MKT-Araz”ın matçlarında İmişli stadionu demək olar tam dolurdu. Amma “Mil-Muğan”ın oyunlarında bunu müşahidə etmək olmur…
– Oyunlarımız adətən, günorta 14, 15 radələrində olur. Mən federasiyaya da müraciət etmişdim ki, matçlarımızı bir az axşama yaxın salsınlar. Bu da tamaşaçı sayına təsir göstərir. Premyer Liqaya yüksəlsək, azarkeş sayı artacaq. Çünki belə olan halda qonşu rayonlardan da azarkeşlər oyun izləməyə gələcək. Çünki regionun yeganə komandası da, stadionu da buradadı.
ELMAR ABDULLA-ZADƏ