Ələmdar Mustafayev: "Qızlarla işləmək daha məsuliyyətlidi"

İmişli futbolu deyiləndə hər kəsin ağlına rayonu təmsil etmiş “Lokomotiv”, “MKT-Araz” və “Mil-Muğan” gəlir. Amma ayın görünməyən tərəfi də var – qadın futbolu. Əyalətdə fəaliyyət göstərən bir klubun qadın komandasının olması sevindirici və bir o qədər də təəccüblü məqamdı. Ona görə ki, biz şərqlilərin mentalitet dediyi anlayışda qadının futbol oynaması bir o qədər də xoş qarşılanmır. Ailə, qohum-əqraba təzyiqi çox vaxt gələcəyin futbolçu xanımlarını karyerasını yarımçıq qoymasına səbəb olur. Amma bu stereotipi qırıb, sevimli oyunu ilə məşğul olanlar da var. İmişlidə olduğum müddətdə müsahibə almağa imkan tapdığım şəxslərdən biri də “Mil-Muğan”ın qadın komandasının baş məşqçisi Ələmdar Mustafayev oldu. “Sumqayıt”ın və 21 yaşlılardan ibarət milli komandamızın futbolçusu Bəhlul Mustafazadənin atası olan Ələmdar bəylə rəhbərlik etdiyi komanda barədə söhbətləşdik:

– Hazırda 2 komandaya rəhbərlik edirəm. Yetirmələrim U-16 liqasında 2-ci, U-13 liqasında orta sıralarda qərarlaşııb.

– Qızlarla işləmək çətin deyil?
– Çətinlik olsa da, işləməliyik. Biz həm də bununla sübut etmək istəyirik ki, Azərbaycan qadını digər ölkələrdəkindən geri qalmır. Mentalitetimizə uyğun olmasa da, bu işin öhdəsindən gəlməyə çalışırıq. 

– Komandanızın üzvlərindən millidə çıxış edən var?
– Bəli, 6 oyunçumuz millinin şərəfini qoruyur. Hətta Rövşanə Sərdarlı U-19-dan əlavə, əsas yığmada da çıxış edir, bu yaxınlarda millinin Dubaydakı toplanışında da iştirak etmişdi. 4 nəfərimiz U-16, 1 nəfər isə U-17 yığmasındadı. 

– Ümumilikdə neçə oyunçunuz var?
– 25 futbolçumuz var. 

– Kişi və qadın futbolçularla məşğul olmağın fərqi nədədi?
– Qızlarla işləmək daha məsuliyyətlidi, onlar daha istəkli və aqressiyalı olur. Bu komanda mənim təşəbbüsümlə yaradılıb. Qızlarla işləmək əvvələr də mənim təcrübəmdə olub. Ümumiyyətlə, tək qızlarla yox, elə oğlan komandaları ilə də işləmişəm. U-21-in kapitanı, həm də mənim oğlum olan Bəhlul Mustafazadə, “Zirə”dəki Sadiq Quliyev, bunlar hamısı mənim oyunçularım olub.

– Əyalətdə qızları futbola cəlb etmək çətin deyil?
– Bəlkə də sorğu keçirsək, 90 faiz qız futbola məşğul olmaq istəyir. Amma çox vaxt valideynlər buna imkan vermir. 

– Bəs öz komandanızda bu cür hallarla rastlaşmısınızmı?
– İki oyunçumuz var ki, məhz bu səbəbdən mütəmadi matçarda iştirak edə bilmir. Öz qızım Aytac Mustafazadə də futbolla məşğul olurdu. Hətta Bursada Türkiyəyə qarşı oyunda dubl da etmişdi. AFFA-dan da çox xahiş etdilər ki, futbolda qalsın. Amma ali təhsilinə görə alınmadı.

ELMAR ABDULLA-ZADƏ