Musa Qurbanov: “Bu şərtlərlə Premyer Liqada oynamaq mümkün olmayacaq”

Zaqatala”nın prezidenti Musa Qurbanovun futbolinfo.az saytına müsahibəsi:

– Birinci Divizion üçün normal şəraitimiz var. Bəzi çatışmazlıqlarımız olsa da, məşq etmək, mübarizə aparmaq üçün lazım olan minumum şərtlər qaneedicidi. 

– Çatışmazlıqlar nədən ibarətdi?
– Heyətlə bağlı bəzi çatışmazlıqlar var. Mövsümün əvvəlində zədə alan oyunçularımız çox oldu. 

– Heyətdə zaqatalalı futbolçular nə qədərdi?
– Çoxdu, demək olar heyətin böyük hissəsi yerli uşaqlardı.

– “Zaqatala” növbəti mövsümdə Premyer Liqada iştirak etməyə ən real namizədlərdən biridi. Maraqlıdı, komandanız indiki vəziyyətdə lisenziya tələblərinin hansını yerinə yetirə bilmir?
– Bütün sənədləşmə işi qurtarıb, hər şey normaldı. AFFA tərəfindən nə tələb olunursa, hamısını çalışıb, yoluna qoymuşuq. Çatışmayan yeganə şey sponsordu. Hazırda SOCAR tərəfindən maliyyələşdirilirik. Fikrimcə, Premyer Liqaya vəsiqə qazansaq, maliyyə dəstəyimiz artırılacaq. Yəni ümidim bunadı. Birinci Divizion üçün AFFA tərəfindən söz verilən maliyyə dəstəyi vaxtı-vaxtında yerinə yetirilir. Amma bu şərtlərlə çox güman ki, Premyer Liqada oynamaq mümkün olmayacaq. Yəqin ki, gələcəkdə bu məsələni həll edəcəyik.

– Uşaq komandalarının vəziyyəti nə yerdədi?
– Bütün yaş komandalarını təmin etmişik. Uşaqlarla müqavilələr bağlanılıb, lazımi sənədlər AFFA-ya göndərilib. 19 yaşa qədər olan bütün komandalarımız var. Premyer Liqada iştirak etsək, bircə əvəzedici komandamızı formalaşdırmalıyıq. Bu da ciddi problem deyil.

– “Zaqatala” əvvələr bölgədələ olmuş “Daşqın” və “Simurq”un yoxluğunu unutdura bilibmi?
– “Simurq”da olan geniş imkanlar bizdə yoxdu. Onları unutdurmaq bir az çətindi. Amma o imkanlardan ən azı yarısı bizdə olsa, nəsə edə bilərik.

– Maraqlıdı, nə üçün yeni yaranan komandaya “Daşqın” yox, məhz “Zaqatala” adı qoyuldu?
– Burada bir çox səbəblər oldu. Hazırda “Daşqın” idman klubu kimi fəaliyyət göstərir. Biz də məcbur olub, “Zaqatala” adı altında fəaliyyət göstərdik. 

– Qardaşınız Qurban Qurbanov “Qarabağ”ın çalışdırıcısıdı. “Zaqatala” Premyer Liqaya vəsiqə qazansa, yəqin ki, müəyyən söz-söhbətlər olacaq. Buna hazırsınız?
– Kimsə öz ürəyinə görə söz-söhbət edə bilər. Amma bizim vicdanımız təmizdi və belə də olacaq. Bu barədə mən heç düşünmürəm. 

ELMAR ABDULLA-ZADƏ