Dünya futbolu
“Beşiktaş” Avroliqanın 1/4 finalında!
Bu gün Avropa Liqasında 1/8 final mərhələsinə yekun vurulub….
Bu gün Avropa Liqasında 1/8 final mərhələsinə yekun vurulub. Futbolinfo.az xəbər verir ki, mərhələnin cavab oyunlarının da hamısı eyni gündə baş tutub.
Türkiyənin turnirdəki yeganə təmsilçisi “Beşiktaş” öz meydanında “Olimpiakos”u qəbul edib. Səfərdəki ilk matçda heç-heçəyə imza atan İstanbul klubuna mərhələ adlamaq üçün qolsuz bərabərlik də kifayət edirdi. Lakin matçın gedişində azlıqda qalmasına baxmayaraq, rəqibini darmadağın edən "qara qartallar" həm 1/4 finala vəsiqə qazanıblar, həm də ötən mərhələdə məhz "Olimpiakos" tərəfindən Avroliqadan kənarlaşdırılan "Osmanlıspor"un qisasını alıblar.
Turnirin favoritlərindən olan “Mançester Yunayted” “Rostov”u sınağa çəkib. Bu komandaların da ilk görüşündə 1:1-lik heç-heçə qeydə alınmışdı. Cavab görüşündə İngiltərə təmsilçisi minimal hesablı qələbə sayəsində adını növbəti mərhələyə yazdırıb.
“Rostov” kimi, Rusiyanın turnirdəki digər təmsilçisi “Krasnodar” da mərhələ adlaya bilməyib. İlk matçda səfərdə “Selta”ya 1:2 hesabı ilə yenilən “Krasnodar” doğma meydanda da oxşar aqibətlə üzləşib və mübarizəni dayandırıb.
Maraqlı oyunlardan biri Romada keçirilib. İtaliyanın eyni adlı təmsilçisi Lion “Olimpik”i ilə üz-üzə gəlib. İlk matçda 2:4 hesabı ilə uduzan “Roma”nın bu məğlubiyyətin əvəzini çıxıb-çıxmayacağı böyük maraq doğururdu. "Canavarlar" doğma meydanda 2:1 hesablı qələbə qazansalar da, ümumi nəticə Lion təmsilçisini növbəti mərhələyə daşıyıb.
Avropa Liqası
1/8 final mərhələsinin cavab oyunları
16 mart
“Beşiktaş” (Türkiyə) – “Olimpiakos” (Yunanıstan) – 4:1
İlk oyun – 1:1
“Genk” (Belçika) – “Gent” (Belçika) – 1:1
İlk oyun – 5:2
“Krasnodar” (Rusiya) – “Selta” (İspaniya) – 0:2
İlk oyun – 1:2
“Ayaks” (Hollandiya) – “Kopenhagen” (Danimarka) – 2:0
İlk oyun – 1:2
“Anderlext” (Belçika) – APOEL (Kipr) – 1:0
İlk oyun – 1:0
“Roma” (İtaliya) – “Olimpik” (Lion, Fransa) – 2:1
İlk oyun – 2:4
“Borussiya” (Münhenqladbax, Almaniya) – “Şalke” (Almaniya) – 2:2
İlk oyun – 1:1
“Mançester Yunayted” (İngiltərə) – “Rostov” (Rusiya) – 1:0
İlk oyun – 1:1