Müsahibə
Zdenek Folprext: “Neftçi” “Slovan”la eyni səviyyəli komandadı”
Topaz Premyer Liqasının 23-cü turunda “Neftçi&rdqu…
Topaz Premyer Liqasının 23-cü turunda “Neftçi” öz meydanında “İnter”i məğlub edib – 2:1. Futbolinfo.az xəbər verir ki, oyundan sonra “ağ-qaralar”ın çexiyalı futbolçusu Zdenek Folprext əməkdaşımızın suallarını cavablandırıb:
– Bizim üçün çox vacib idi. Çünki bu gün “Neftçi”nin yaranma günü idi. Üzərimizdə təzyiq var idi, komanda başa düşürdü ki, bu oyunda qalib gəlməlidi. Çox xoşbəxtəm ki, qələbə qazandıq.
– Qeyri-adi formada meydana çıxmışdınız. Bu ideyanı bəyəndin?
– İlk dəfə idi ki, tarixi formada meydana çıxırdım, oynadığım klublarda bu halla rastlaşmamışdım. Xoşuma gəldi və əsas odur ki, bu formada qələbə qazandıq.
– Azərbaycan üçün çox vacib olan bir klubda forma geyinidiyini bilirsənmi?
– Təbii ki… Əvvəlcədən hansı komandaya gəldiyimi bilirdim. Bu gün də gördük ki, “Neftçi” Azərbaycan üçün nə qədər vacib komandadır.
– Liderləri büdrətməyi bacardınız. “Neftçi”nin öz oyununu tapdığını düşünmək olarmı?
– Həqiqətən, çox yaxşı formadayıq. Bu, kənardan görünür. Mövsümün ilk yarısını saymasaq, 2017-ci ilin əvvəlindən qazanılan xallara baxsaq, çempionatın ən yaxşı komandalarından biriyik.
– “Qəbələ” və “İnter”i məğlub etdiniz. Bəs, “Qarabağ”?
– “Qarabağ”a qarşı 3 dəfə oynamışam və məğlub olmamışam. İki dəfə “Slovan”da, bir dəfə isə “Neftçi”də “Qarabağ”a qarşı mübarizə aparmışam. Əlbəttə, futbolda mümkünsüz bir şey yoxdu. Biz “Qarabağ”ı keçə bilərik.
– “Slovan”ın heyətində özünü “Qarabağ”a qarşı daha inamlı hiss edirdin, yoxsa “Neftçi”də?
– Deyərdim ki, “Neftçi” “Slovan”la eyni səviyyəli komandadır. Bir fərq görmürəm.
– Çexiya millisi DÇ-2018-in seşmə mərhələsində Azərbaycan yığması ilə eyni qrupda yer alıb. Çexiya millisi naminə Almaniyanın Bakıda millimiz üzərində qələbə qazanmasını daha çox istəyəcəksən?
– Azərbaycan millisinə azarkeşlik edəcəm. Oyunu stadiondan izləyəcəm və komanda yoldaşlarım Namiq Ələsgərovla Ruslan Abışova dəstək verəcəm.
– Bəlkə Çexiya yığmasına dəvət almadığına görə Azərbaycana azarkeşlik edəcəksən?
– Yox-yox. Tam ciddi deyirəm. “Neftçi” ilk pillələr uğrunda mübarizə aparsa, Çexiyanın baş məşqçisi oyunlarımıza baxacaq və mənə də diqqət ayıracaq.
NİCAT SALMANLI