Ölkə futbolu
"Qəbələ" – güclülərin, "Qarabağ" – zəiflərin qənimi kimi…
Topaz Premyer Liqasında 2016/17 mövsümünün son ak…
Topaz Premyer Liqasında 2016/17 mövsümünün son akkordları çalınır. Ötən mövsüm sona 4 tur qalmış Zirədə çempionluğu təmin edən ağdamlılar bu il sona 4 tur qalmış, ilk dəfə əsas qənimətə bu qədər yaxındılar.
Maraqlıdı ki, məhz bunda da zirəlilərin rolu var. “Qartallar”ın Qəbələ səfərindən xalla qayıtması ağdamlıların işini bir az da asanlaşdırdı.
Söhbət “Qəbələ”dən düşmüşkən, Roman Qriqorçukun yetirmələrinin cari mövsümdə klub tarixinin ən böyük uğurunu qazanacağı şübhəsizdi. Hətta əldə ediləcək gümüş medal belə klub tarixində bir ilkdi. Belə ki, komandanın indiyə kimi "radar"ına düşən ən böyük nəticə ölkə çempionatlarında ardıcıl 3 mövsüm qazanılan "bürünc"dü.
Bununla belə, çətin ki, qazanılacaq gümüş medallar uğur hesab edilsin. Mövsümboyu çempionluq uğrunda amansız mübarizə aparan “Qəbələ”nin zirvədən uzaq düşməsi onlar üçün təəssüfləndirici məqamdı.
Bəs, qızıl medallara bu qədər yaxın ikən "qırmızı-qaralar"ın hazırkı vəziyyətə düşməsinə səbəb nədi?
Şübhəsiz ki, bu məqamda əsas gözəgirən məqam autsayder və nisbətən zəiflərlə oyunlarda itirilən xallardı. Qriqorçukun yetirmələri ilk "3-lük"də qərarlaşan digər komandalarla görüşdə hələ ki, mümkün 18 xaldan 11-ni əldə edib və 6 qarşılaşmanın yalnız birində yenilib. Əvəzində AZAL, “Kəpəz”, “Sumqayıt” kimi rəqiblərlə oyunlarda edilən heç-heçələr 24-cü turda liderdən 4 xal geri qalmağa gətirib çıxarıb.
Sanki “Qəbələ” duel komandasıdı. Komanda əsas rəqibləri ilə matçlarda lazımi nəticəni təmin edir, amma iş ortabablarla və zəiflərlə görüşlərə çatanda "Kərəmi ağlamaq tutur".
Elə son 2 il də avrokuboklarda qazanılan nəticələr də bir növ dediyimizin isbatıdı. 8 pley-off matçında bir-birindən güclü komandaları – “Panatinaikos”, “Lill”, “Maribor” kimi rəqibləri üstələyən qəbələlilərin qrup mərhələsindəki nəticələri hamıya məlumdu.
Hazırda çempionluğa ən yaxın komanda olan “Qarabağ”ın isə ilk "3-lük"də yer alanlarla oyunlarını fiasko saymaq olar. Ağdamlılar 6 oyunda mümkün 18 xaldan yalnız 4-nü toplayıb ki, “Qəbələ” ilə Suraxanıda qazanılan 3 xal da mübahisəlidi. Əvəzində "3-lük"dən kənarda qalan komandalarla görüşlərdə favorit adını artıqlaması ilə doğruldan Qurban Qurbanovun yetirmələri indi ardıcıl 4-cü dəfə qızıl medalları qazanmağa yaxındı.
Elə “İnter”in də problemi “Qəbələ”dəkiylə eynidi. “Bankirlər” “Qarabağ”dan 7 xal alsa da, “Zirə”ni heç bir matçda məğlub edə bilməməsi, tarixinin ən zəif dövrlərindən birini yaşayan “Neftçi”yə 3 dəfə məğlub olması onların çempionluq yolundan uzaqlaşmasına gətirib çıxardı. Amma bir mövsümdə 4 dəfə rəhbər dəyişən bakılıların indiki nəticəsini də uğur kimi qələmə vermək olar.
Sonda “Qarabağ”, “Qəbələ” və “İnter”in cari mövsümdə rəqiblərindən neçə xal aldığını göstərən cədvəli təqdim edirik. Nəticədən də göründüyü kimi, “Qəbələ” digər rəqiblərindən fərqli, heç bir komandadan ikirəqəmli xal almayıb.
"Qarabağ" – 52 xal
– AZAL – 12
– Kəpəz – 10
– Zirə – 10
– Sumqayıt – 9
– Neftçi – 7
– Qəbələ – 3
– İnter – 1
“Qəbələ” – 48 xal
– Neftçi – 9
– Zirə – 8
– AZAL – 8
– Kəpəz – 7
– Qarabağ – 6
– İnter – 5
– Sumqayıt -5
“İnter” – 42 xal
– AZAL – 12
– Sumqayıt -10
– Qarabağ – 7
– Kəpəz – 5
– Zirə – 3
– Neftçi – 3
– Qəbələ – 2
Liderlərin öz aralarındakı oyunlarda topladığı xallar:
1. “Qəbələ” – 11
2. “İnter” – 9
3. "Qarabağ" – 4
ELMAR ABDULLA-ZADƏ