“Slovan”la “Neftçi” arasında seçim etməli olsam…”

Topaz Premyer Liqasının 26-cı turunda “Neftçi” öz meydanında AZAL-ı 4:0 hesabı ilə məğlub etdi. Futbolinfo.az xəbər verir ki, matçdan sonra “Neftçi”nin futbolçusu Zdenek Folprext əməkdaşımızın da suallarını cavablandırıb: 

– “Neftçi” sanki AZAL-la oyuna yox, açıq məşqə çıxmışdı. Bu fikirlə razısız?
– Kənardan belə bir fikir yarana bilərdi ki, bu həqiqətən də açıq məşq idi. Amma əslində, belə olduğunu deməzdim. Bu gün erkən qolun komanda üçün nə qədər vacib olduğunu bir daha gördük. Erkən qol vurmaq komanda üçün çox xeyirlidi.

– Vurduğunuz qolları azarkeşlərlə qeyt etmədiniz, onlara tərəf qaçmadınız. Bu, xüsusi göstəriş deyildi?
– Yox, heç bir etiraz aksiyasından söhbət gedə bilməz. Mənə gəldikdə, öz qolumu Çexiyadan gələn dostlarımla bölüşdüm.

– Dostlarını Bakıya özün dəvət etmisən, yoxsa?
– Bəli, onlar mənim dəvətimlə Bakıya gəliblər. Onlar mənim uşaqlıq dostlarımdı. İndi bir evdə qalırıq və son 1 həftə mənim üçün olduqca şən keçir.

– Rəqibin futbolçusu Vaqif Cavadov “Neftçi”nin xüsusi heç nə ilə yadda qalmadığını dedi. Bu fikirlə razısan?
– Mənim fikrimcə, “Neftçi” yanvar ayından bu yana ən yaxşı oyununu oynadı. Düzdü, AZAL-ın da şansları var idi. Rəqib qol vursaydı, nəticə başqa cür ola bilərdi.

– Ölkə kubokunda mübarizəni dayandırdıqdan sonra “Neftçi”nin Premyer Liqada “dördlüy”ə düşmək üçün səfərbər olacağı gözlənilirdi. Amma “Sumqayıt”a və “Kəpəz”ə yenildiniz. Nə baş verdi?
– Həmin oyunlardakı əsas problem qol vura bilməməyimizdən qaynaqlandı. Bu gün AZAL-la oyunda erkən qol vurduq və davamını gətirdik. Komanda fərqli oyun nümayiş etdirdi. Sumqayıtda və Gəncədə qol vursaydıq, nəticə fərqli olacaqdı.

– Hazırkı vəziyyətdə avrokubok zonasına düşməyiniz nə dərəcədə realdı?
– İki oyunumuz qalıb. Əlbəttə, məqsədimiz hər iki oyunda qələbə qazanmaqdı. Sonra turnir cədvəlinə baxacağıq. Bəxtimiz gətirsə, Avropa Liqasına vəsiqə qazanacağıq.

– Mövsümün sonunda müqavilənizin müddəti başa çatacaq. Yeni müqavilə üçün danışıqlara başlamısınızmı?
– Artıq “Neftçi” və “Slovan” klubları arasında danışıqlar başlayıb və davam edir. Bu iki klub arasında seçim etməli olsam, təbii ki, “Neftçi”ni seçəcəm. Çünki burda yaradılan şərait ürəyimcədi.

ELMAR ABDULLA-ZADƏ