Premyer-liqa
Topaz Premyer Liqasının medalçıları meydanda
Bu gün Topaz Premyer Liqasında 26-cı tura yekun vurulacaq. Futb…
Bu gün Topaz Premyer Liqasında 26-cı tura yekun vurulacaq. Futbolinfo.az xəbər verir ki, son oyun günündə də iki görüş baş tutacaq.
Öncə çempionluq uğrunda mübarizə aparan “Qəbələ” səfərdə “Kəpəz”lə üz-üzə gələcək. Günün digər matçında isə lider "Qarabağ" üçüncü pillədə qərarlaşmış "İnter"lə qarşılaşacaq.
Topaz Premyer Liqası
26-cı tur
15 aprel
“Kəpəz” – “Qəbələ”
Hakimlər: Ömər Paşayev, Nahid Əliyev, Vaqif Musayev, Rauf Cabbarov.
AFFA nümayəndəsi: Arif Fərəcov.
Hakim inspektor: Rövşən Əhmədov.
Gəncə şəhər stadionu, 16:00.
Ötən tur əsas rəqibi "Qarabağ"la heç-heçəyə razılaşmaqla çempionluq şanslarını daha da azaldan "Qəbələ" üçün "Kəpəz"lə səfər matçı böyük önəm daşıyır. Roman Qriqorçukun çalışdırdığı komanda çempionluğa olan nəzəri şanslarını qorumaq üçün mütləq qalib gəlməlidi. Çünki mümkün məğlubiyyət “qırmızı-qaralar”ın qızıl arzularının üstündən tam xətt çəkmiş olacaq. Amma təbii ki, bunun üçün digər oyunda da “Qarabağ”ın qalib gəlməsi lazımdı. Ağdamlıların qələbəsi turu xalsız başa vuran “Qəbələ”nin qızıldan əl çəkməsi, Qurban Qurbanovun yetirmələrinin ardıcıl 4-cü çempionluğu üçün yetərli olacaq. Gəncədəki görüş həm də meydan sahiblərinin avrokubok mübarizəsi baxımından önəmlidi. Belə ki, “Kəpəz” qalib gəlməsə, Şahin Diniyevin komandasının ardıcıl ikinci mövsüm Avropaya yollanmayacağı dəqiqləşəcək. Bunun üçün həm də Sumqayıtda tərəflərdən birinin qalib gəlməsi lazımdı.
“Kəpəz”lə “Qəbələ” tarixində 16-cı dəfə üz-üzə gələcək. Əvvəlki oyunların 4-də Gəncə, 6-da isə Qəbələ təmsilçisi 3 xala sevinib. Beş oyunda da heç-heçə qeydə alınıb. Top fərqində də "Qəbələ"nin cüzi üstünlüyü var. Ümumilikdə, “Qəbələ” ardıcıl 4 matçda uduzmayıb. “Kəpəz” 8 ev oyununda yalnız 1 dəfə uduzub.
Cari mövsümdə baş tutan oyunlara gəlincə, "Qəbələ" ilk dövrədə "Dalğa Arena"da baş tutan "ev oyununda" 2 cavabsız qolla qalib gəlmişdi. Gəncə təmsilçisini Tellur Mütəllimovla Baqali Dabo məyus etmişdi. İkinci dövrədə "Qəbələ" bu rəqibini doğma şəhərdə qəbul etmiş və yenə 3 xala sevinmişdi. Qəbələdəki həmin oyuna hakim qərarları xüsusi damğa vurmuşdu. Belə ki, oyundakı bütün qollar penaltidən vurulmuşdu. Filip Ozobiçin 23-cü dəqiqədə hesabı açdığı oyunun 77-ci dəqiqəsində gəncəlilər Tural Axundovla bərabərlik qolunu vurmuşdular. Amma 82-ci dəqiqədə penaltiyə səbəb olan Renan da Silvanın meydandan qovulması azmış kimi, Ruslan Qurbanov da oyundakı üçüncü penaltini dəqiq yerinə yetirməklə oyundakı yekun nəticəni müəyyənləşdirmişdi – 2:1. Nəhayət, Gəncədə baş tutan son oyunda "Kəpəz" bu rəqibindən xal ala bilmişdi. Şəhriyar Rəhimovun ilk yarıda hesabı açdığı görüşün ikinci hissəsində Renan Silva öz qapısına qol vurmaqla "Qəbələ"yə 1 xal qazandırmışdı.
Statistika: 15 oyun, +4=5-6, top fərqi 12-15
1-ci dövrə: 0:2
2-ci dövrə: 1:2
3-cü dövrə: 1:1
“İnter” – “Qarabağ”
Hakimlər: Rəhim Həsənov, Namiq Hüseynov, İsgəndər Əliyev, Rəvan Həmzəzadə.
AFFA nümayəndəsi: Eldəniz Musayev.
Hakim inspektor: Kərim Ağayev.
Bakı. “İnter Arena”, 18:30.
Nəhayət, turun qapanış və mərkəzi oyununda "İnter" öz meydanında lider "Qarabağ"ı qəbul edəcək. Qızıl medal şansını itirən bakılılar cari mövsüm uduzmadığı rəqibini növbəti dəfə büdrətmək istəyindədi. “İnter” qələbə qazansa, gümüş medal şansını da saxlayacaq. Zaur Svanadzenin çalışdırdığı komanda heç-heçə etsə, “Qəbələ” qalib gəlsə və ya bakılılar uduzsa, “qırmızı-qaralar” xal qazansa, o zaman “İnter”in gümüş istəyi suya düşəcək. Belə olan halda bu komandanın mövsümü bürünc medalın sahibi kimi başa vuracağı rəsmiləşəcək. "Qarabağ" isə əsas izləyicisi ilə 4 xallıq fərqi qorumaq üçün qalib gəlməlidi. Səfərə 3 xal üçün yollanacaq Qurbanovun yetirmələri Gəncədəki matçın nəticəsini bildiyindən meydana daha rahat çıxacaq. Qərbdəki qarşılaşmada “Qəbələ”nin uduzması “İnter Arena”dakı görüşə qızıl əhəmiyyəti verəcək. Çünki qazanılacaq 3 xal “Qarabağ”ı qızıl medallara və Çempionlar Liqasına daşıyacaq. Digər hallarda isə çempionluq intriqası ən azı növbəti turadək davam edəcək.
İndiyə qədər 50 dəfə qarşılaşmış bu komandaların duellərində daha çox (21 dəfə) "Qarabağ" qələbəni bayram edib. 12 dəfə oxşar uğura "İnter" sevinib. 17 qarşılaşmada isə qalib müəyyənləşməyib. Top fərqində də Ağdam təmsilçisinin ciddi üstünlüyü var. “İnter” 3 oyundur bu rəqibinə uduzmur. “Qarabağ” son 4 səfərdə qol vurub.
Cari mövsümdəki oyunlara gəlincə, ilk dövrədə "Qarabağ" Reynaldo Silvanın erkən qolu ilə meydan sahiblərini məyus etsə də, bunun davamın gətirə bilməmişdi. Əksinə, 70 və 75-ci dəqiqələrdə Ruslan Abışovun dublu "İnter"ə əzmkar qələbə qazandırmışdı. İkinci dövrədə "Azərsun Arena"da keçirilən qarşılaşmada qapılara qol vurulmamışdı. Son dövrədə yenə "Azərsun Arena"da baş tutan görüşdə Zurab Xizanişvilinin vurduğu yeganə qol qonaq komandaya minimal hesablı qələbə qazandırmışdı.
Statistika: 50 oyun, +12=17-21, top fərqi 32-54
1-ci dövrə: 2:1
2-ci dövrə: 0:0
3-cü dövrə: 1:0