Müsahibə
Abdulbari Gözəl: "Yerli çempionatda qalib olmaq bizi qane etmir"
“Qarabağ”ın prezidenti Abdulbari Gözəlin futbolinf…
“Qarabağ”ın prezidenti Abdulbari Gözəlin futbolinfo.az saytına müsahibəsi:
– Azarkeşlər kubokun Ağdama aparılması ilə bağlı şüarlar səsləndirdilər. Bunu edəcəksiz?
– Mən bunu bir neçə dəfə müzakirə etmişəm. Biz “Qarabağ” üçün çalışırıq. Kubok buradan oraya, oradan buraya gəzə bilməz. Biz o zaman enerjimizi itirəcəyik. “Qarabağ” elə Ağdamdır, bunun fərqi yoxdu. Klub bütün Qarabağlılarındı. Bu klub bütün qarabağlıları təmsil edir. Bizə bu gün Qarabağın adını dünyada yaşatmaq lazımdı.
– Komanda ardıcıl 4 ildi ki, çempion olur, amma Çempionlar Liqasının qrup mərhələsinə düşə bilmir. Necə düşünürsüz, bu il bu istək reallaşa bilərmi?
– Biz hər dəfə Çempionlar Liqasının qapısını döyürük. Məqsədimiz də budu, bunun üçün çalışırıq. Yerli çempionatda qol vurmaq, qalib olmaq bizi qane etmir. İndi biz Avropada naliyyətlər qazanmaq istəyirik. Bu da bir anda olmur, zaman lazımdı. Bilirsiz ki, əvvəl vəziyyətimiz necə idi və indi haradan-haraya gəldik.
– “Qarabağ”ın Çempionlar Liqasının qrup mərhələsinə düşməsi üçün heyəti gücləndirməsi, transferlər etməsi lazımdı. Bu məsələdə komandaya dəstəyiniz tam olacaqmı?
– Məsələn, bizdə Samuel Armenteros oynayırdı. İndi o, Hollandiya liqasında bombardirlər siyahısındadı. Yəni, hər transfer olunan futbolçu da komandaya uyğunlaşa bilmir. Bu, asan məsələ deyil. Belə işlərə Qurban müəllim baxır.
– Bəzi futbolçularınız etiraf edir ki, bu çempionluq ötən ilki çempionluqlardan daha çətin qazanıldı. Siz də bu fikirlə razısınız?
– Əlbəttə. Azərbaycan klubları inkişaf edir. “Qəbələ” ən böyük rəqibimiz idi. Belə rəqabət olması da bizə faydalıdı. Yoxsa, komanda da tənbəlləşər, bir şey edə bilməz.
– Mayın 5-də Naxçıvanda keçiriləcək Azərbaycan kubokunun finalından hansı nəticəni gözləyirsiniz?
– Gedəcəyik, oynayacağıq. Amma top yumrudu, indidən nə olacaığını bilmək olmaz. (gülür)
ELMAR ABDULLA-ZADƏ