Ölkə futbolu
Klub prezidenti: "Şəmkir" elitaya hazırdı"
"Şəmkir"in Premyer Liqada oynaması üçün …
"Şəmkir"in Premyer Liqada oynaması üçün heç bir əngəl yoxdu" – bu sözləri futbolinfo.az saytına müsahibəsində klubun prezidenti Elvin Səfərli bildirib.
Yeni mövsümdən elitada 10 komandanın mübarizə aparacağı gözlənilir. Adlar mayın 12-də AFFA Lisenziyalaşdırma Qrupu tərəfindən açıqlanacaq. Lakin indidən mətbuata həmin komandaların kimlər olacağı barədə ilkin informasiyalar bəllidi.
I divizionda çempion olan "Turan Tovuz", eləcə də 3-cü pillənin sahibi "Ağsu" deyəsən, yenə aşağı dəstədə qalacaq. Maddi problemlər üzündən bu komandalar lisenziya tələblərini yerinə yetirə bilmir. Dağılıb-dağılmaması haqda hər gün yeni xəbərlər gələn AZAL isə Premyer Lqada sonuncu pilləni tutduğu üçün elitada ola bilməz.
AFFA-nın güclülər arasına buraxmağı planlaşdırdığı komandalar "Səbail" (2-ci yer), "Zaqatala" (5-ci yer) və "Şəmkir"di (6-cı yer). Paytaxt klubu yarandığı gündən bu plana uyğun qurulubsa, "Zaqatala"nın məsələsi qaranlıqdı. Bölgə klubunun uşaq liqalarında yarışan təmsilçisi olmadığından onların elitaya buraxılması lisenziya tələblərinin pozulması deməkdi. Lakin yəqin ki, AFFA yarışı 10 komandayla təşkil etməkdə israrlı olduğundan bu kimi nüanslara göz yummağı lazım bilir. Görünür, "Zaqatala"ya güzəşt olunacaq və bu, AFFA İcraiyyə Komitəsinin qərarı ilə rəsmiləşəcək.
"Şəmkir"ə gəlincə, bu komandanın Premyer Liqada olacağını ilk olaraq "Futbolinfo" xəbər vermişdi. Klubun digər lisenziya tələblərini yerinə yetirməkdə heç bir çətinliyi görünmürdü. Yalnız stadionla bağlı çatışmazlıq və bank təminatı aktual problem idi. Qərblilər arenanın təmirinə başlamaqla Premyer Liqaya gəlməkdə iddialı olduqlarını göstərdilər. Yalnız bank təminatı ilə bağlı məsələ qaranlıq qalırdı.
Az öncə Elvin Səfərli ilə söhbətdə bu məsələyə də aydınlıq gətirdik. Klub prezidenti AFFA-nın qərarını gözlədiklərini bildirdi: "Biz üzərimizə düşən işləri yoluna qoymuşuq. Sənədləri bacardığımız qədər yoluna qoyub, Lisenziyalaşdırma Qrupuna təhvil vermişik. Stadionda da təmir işləri başlayır, elitaya hazırıq. Lisenziya tələblərindən ən sonuncusu maliyyəylə bağlıdı. Bank təminatı ilə bağlı şifahi olaraq hazır olduğumuzu bildirmişik, qərar veriləndən sonra rəsmi sənədi də çatdıracağıq".
Şifahi? Axı, bank təminatı haqda sənədin təqdim edilmə vaxtı çoxdan bitib. Elvin bəy bu məsələyə də aydınlıq gətirməyə çalışdı: "Biz divizionda oynayarkən bank təminatı verən yeganə klub idik. Həmin sənəd hələ də qüvvədədi və bitmə vaxtına qalıb. Premyer Liqaya buraxılan kimi o sənədi elitaya uyğun yeniləyəcəyik".
Səfərli heyətin Tərlan Əhmədovun baş məşqçi postuna gətirilməsi ilə bağlı danışmadı: "Konkret heç nə deməyəcəyəm. Təbii ki, heyətin komplektləşdirilməsi ilə bağlı çalışmalarımız da davam edir və bunu kompleks şəkildə reallaşdırırıq. AFFA qərarını verdikdən sonra bu haqda məlumat verəcəyik".
FƏRİD