Ölkə futbolu
Yenə “Qəbələ”, “Qarabağ”, “Neftçi”
Son günlər mətbuatda ən çox rast gəlinən xəbərlər …
Son günlər mətbuatda ən çox rast gəlinən xəbərlər “Qəbələ”nin aşağı yaş qrupları üzrə komandaları ilə bağlıdı. Əvəzediciləri ilə birlikdə 10 yarışdan 9-da medalçılar sırasına düşən klub mövsüm başa çatsa da, boş durmur. Ölkədə ən yaxşı infrastruktura sahib olan və uşaq futboluna xüsusi diqqət ayıran “Qəbələ”nin müxtəlif yaş qrupları bir-birinin ardınca ölkə xaricində turnirlərə qatılır.
Fevralda U-14 komandası ilə Litvada "Ateitis Cup"da iştirak edən “qırmızı-qaralar” mayda da boş qalmayıblar. Əyalət təmsilçisinin 11 yaşlıları Gürcüstanda Nodar Axalkatsinin xatirə turnirində, 13 yaşlıları İtaliyada “Kapilan Pallo”da iştirak edibsə, 16 yaşlıları hazırda Macarıstanda “Kubala Cup”da mübarizə aparır.
“Qəbələ” Akademiyasının direktor müavini Nail Kərimov aşağı yaş qrupu üzrə komandalarının beynəlxalq turnirlərdə tez-tez iştirak etməsi barədə danışarkən bunları deyir: “Biz ilk turnirə hələ 2010-cu ildə Türkiyəyə getmişik. Ondan sonra hər il yarışlarda iştirak etməyə başlamışıq, bu da bir təcrübə yaradıb, münasibətlər qurulub. Bunun sayəsində bir neçə turnirə dəvət alırıq. Onların da böyük əksəriyyətində xərcləri qarşı tərəf ödəyir. Elə hazırda Macarıstanda davam edən turnirin də xərclərini qarşı tərəf ödəyir. Biz isə yalnız təyyarə xərclərini qarşılayırıq. Bundan sonra Mahaçqalada “Anji”nin keçirəcəyi turnirdə iştirak edəcəyik. Buraya Azərbaycan klublarından “Neftçi” də dəvət edilib. Bu cür turnirlərə qatılmağımızın bir hissəsi münasibətlər sayəsində reallaşır, bəzi komandaları isə öz hesabımıza ölkə xaricinə çıxarmağa çalışırıq. Məsələn, sonuncu dəfə İtaliyaya getdiyimiz turnirin xərclərini özümüz qarşıladıq. Burada da seçim etmişdik. Ən ucuz təyyarə bileti və oteli olan turnir seçmişdik. Ora da rahat gedib-gəldik. İtaliyadakı turnirdə Boloniyaya getsəydik, daha yaxın idi. Amma biz Milan üzərindən avtobusla getdik. Düzdü, yol uzun olsa da, büdcəyə kifayət qədər qənaət edildi. Rəhbərlik bu cür turnirlər üçün normal büdcə ayırır, amma biz imkan daxilində bütün yaş qruplarından olan komandalarımızı xaricə çıxarmaq üçün bəzən qənaətə çalışırıq”.
“Qarabağ” da artıq bu mənada seçilməyə başlayıb. Ağdamlılar bu ildən etibarən bəynəlxalq turnirlərdə iştirak edir. Apreldə klubun 12 yaşlıları Türkiyədə “İzmir cup”ın iştirakçısı olmuşdusa, hazırda 11 yaşlıları da Gürcüstanda Nodar Axalkatsinin xatirə turnirində iştirak edir. Bundan başqa “Qarabağ”ın U-19 komandası yaxın vaxtlarda Praqaya yola düşüb, turnirdə iştirak edəcək.
“Neftçi” hər il Krasnodarda keçirilən ənənəvi “Dəri top” turnirində iştirak edir. Onlar yaxınlarda yenidən “Qəbələ” ilə birgə şimal qonşumuzun qonağı olacaq. Hazırda bakılıların 9 və 10 yaşlıları Gürcüstanda Nodar Axalkatsinin xatirə turnirinə qatılıb.
Birvaxtlar “İnter” də bu cür turnirlərin iştirakçısı idi. Amma 2015-ci ildə rəhbərlik səviyyəsindəki məlum dəyişiklik əsas komandaya olduğu kimi, aşağı yaş qruplarına da təsirsiz ötüşmədi. Bakılılar nəinki əvvələr olduğu kimi Almaniya, Fransa, heç qonşu Gürcüstandakı yarışlara da qatıla bilmirlər.
“Zirə”, “Kəpəz”, “Sumqayıt”da da bu mənada durğunluqdu. Adıçəkilənlərin aşağı yaş qrupları son illərdə hansısa beynəlxalq turnirin iştirakçısı olmayıb. Ümumiyyətlə, klublarımız arasında ən fəallar məhz “Qəbələ”, “Qarabağ” və “Neftçi”di. Uşaq futbolunun inkişafına hamıdan çox dəstək vermələrinin nəticəsidi ki, ölkə çempionatlarında da məhz bu klubların təmsilçiləri daha çox medal qazanır.
ELMAR ABDULLA-ZADƏ