Layihə
“Neftçi” həqiqətləri: 0:8 dəstədaxili münaqişənin nəticəsi idi
(əvvəli bu linkdə)
Maraqlıdı ki, “Neftç…
Maraqlıdı ki, “Neftçi”də oyunlar o qədər böyük oynanılır ki, vəzifədə qalmaq, SOCAR-dan gələn milyonları əldən verməmək üçün idarəçilər hər şeyə hazırdılar. Hətta 80 illik yubileyində klubun tarixinə qara ləkə salmaq da onlar üçün çətin olmadı. “Əlincə Arena”da “Qəbələ”ylə ev oyununda alınan 0:8 hesablı məğlubiyyət təsadüfi deyildi. Postunda qalmaq üçün dirənən, Elxan Məmmədovun tapşırıqlarını geri çevirən icraçı direktor Elnur Məmmədovu qovmaq üçün bu matç biabırçılıq həddi kimi seçilmişdi.
Plandan xəbər tutan baş məşqçi Vəli Qasımov özünü xəstəliyə vurub, oyuna gəlmədi və adının 0:8-lə ləkələnməsinə qismən imkan vermədi. Bu “şou-matç”da kimlərin əlinin olduğunu, komandanın belə hesabla uduzması üçün hansı futbolçuların tapşırıq yerinə yetirdiyini deyə bilmərik, amma əsas məqsədə çatmaq üçün hər vasitəyə əl atıldı.
“Neftçi”nin əl dəyişdirəcəyi, Məmmədovla Qasımovun yeni idarəedici dəstəylə əvəzlənəcəyi ötən ilin yayında qətiləşdirilmişdi. Elnur bəy baş katibin dostu olan, Berti Foqts kimi qara zəlini futbolumuza yamaq edən Kamil Məmmədovun təyinatına razılıq verməyincə bu plan cızılmışdı. O vaxt həm baş məşqçi, həm də idman direktoru olan Vəli Qasımov vəzifədən göndərilməli, Məmmədov idman direktoru təyin edilməli və özüylə hansısa əcnəbi məşqçi gətirməli idi. Lakin həmin vaxt Elnur Məmmədov onun səlahiyyətlərini məhdudlaşdıracaq bu adamın gəlişinə razılıq verməmiş, SOCAR-a bu barədə məlumat vermişdi. Elxan Məmmədov isə bu “xəyanət”i bağışlamadı, istənilən halda “Neftçi”dəki dəyişikliyə nail oldu.
“Qəbələ”yə biabırçı məğlubiyyətin ssenarisi cızılarkən Qasımova xəbər çatmışdı və qəfil xəstəlik adı ilə xəstəxanaya qaçdı. Lakin bu da nə onu, nə də Elnur Məmmədovu xilas etdi. Çünki sentyabrın 10-dakı məğlubiyyətdən 3 gün öncə artıq onları kimin əvəz edəcəyi bilinirdi. Təsadüfi deyil, ayın 7-də Çingiz Abdullayev artıq Orxan Hüseynzadə ilə Elxan Abdullayevi qəbul etmiş, mümkün dəyişikliklərin planını cızmışdılar.
Sual ola bilər: bəs, problem Kamil Məmmədovun təyinatında idisə, niyə sonradan o, təyinat almadı? İlkin baxışdan belədi. Həmin məğlubiyyət SOCAR-ı da silkələmiş, məsələyə ölkə rəhbərliyi də qarışmışdı. Bu, komandanı böhrandan çıxarmaq adı ilə yeni büdcənin təsdiqinə kömək etmiş, eyni zamanda bəzi təyinatlarda ehtiyatlı davranmağa zəmin yaratmışdı.
“Neftçi”dəki rəhbər dəyişikliyini xatırlayın: ilk öncə Orxan Hüseynzadə idman direktoru, Elnur Eyvazov icraçı direktor təyin edildi. Qərar açıqlanmamış AFFA-dakı qüvvələrlə SOCAR-dakı qüvvələrin qiyabi savaşından birincilər qalib ayrıldı. Nəticədə Elxan Məmmədovun göndərdiyi Hüseynzadə icraçı direktor təyin olundu, neft şirkətindən maliyyə nəzarət üçün təyin edilən, başqa bir qrupun adamı olan Eyvazov müavin postunda oturduldu. Və idman direktoru postu vakant saxlanıldı, hətta ləğv edildi.
Bəs, Kamil Məmmədov? Bu adam kənarda qalsa da, elə “Neftçi”nin idarəçisidi. Onun vaxtilə rəhbəri olduğu AMMK klubunu yada salın. Sonradan AZAL-a çevrilən bu klubun baş məşqçisi Elxan Abdullayev deyildimi? Və ya Kamil bəyin digər klubu “Standart”ın idarəçisi Orxan Hüseynzadə deyildimi? İslam Abbasov hansı şineldən çıxıb? Hətta klubun yeni mətbuat xidməti, uşaq komandaları üzrə koordinator da eyni xəttlə gəlməyibmi? Sizcə, “Neftçi” Kamil Məmmədovun nəzarətində deyilmi?
Amma “Neftçi” AZAL deyil, xalqın gözüdü, daim diqqətlər onun üzərindədi. Ona görə də Kamil Məmmədov kölgədə qalmağa məcbur oldu. Həm də paytaxt klubunda çox adamın marağı var, qüvvələr daim onu ələ keçirməyə, ayrılan dövlət büdcəsini bölüşdürməyə çalışır. Məmmədov da sonradan FİFA agenti statusundan hər an qovula biləcəyi kluba görə imtina etmədi və gizli idarəçiliyi lazım bildi. Onsuz da onun icazəsi olmadan komandaya hansısa transfer edilə bilməz.
(davamı olacaq)
VÜSAL MAHMUDOV
- Milli komanda2024-05-03 08:00
Vay(ss) bizim halımıza?
- Müsahibə2024-05-02 15:51
Dodo “Qəbələ”yə kömək etmək istəyir: I Liqada da oynamağa hazırdır
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Digər idman növləri2024-05-03 13:25
Tanınmış idmançılarla – öncə master-klas, sonra birgə məşq