Ölkə futbolu
BOS-un əl dəyişməsinin əsl səbəbi
Bakı Olimpiya Stadionunun (BOS) nizamnamə kapitalının 590 milyon m…
Bakı Olimpiya Stadionunun (BOS) nizamnamə kapitalının 590 milyon manat azaldılması sıradan xəbər deyil. Amma o qədər qəribə durumdu ki, ölkənin sayılıb-seçilən iqtisadçıları da buna izah verə bilmir.
Axı, nizamnamə kapitalı müəssisə, şirkət təsis olunarkən təsisçilərin ora qoyruqları sərmayənin ümumi həcmidi. Və bu, zamanla azala, adətən isə arta bilər. BOS-un birdən-birə 590 milyon manat “dəyərsizləşməsi” isə mümkünsüzdü, 1000 manat, ümumiyyətlə, gülməli rəqəmdi.
Amma bizdə mümkündü. Bu, daha çox hansısa “əməliyyat” hazırlığıdı və süni şəkildə edilib. Belə olduğunu tanış olduğumuz növbəti xəbər də təsdiqlədi.
590 milyon azalmadan sonra BOS-un nizamnamə kapitalı cəmi 1000 manat qalıb. 590 milyon manat isə SOCAR rəhbərliyinin qərarı ilə “Neftçi” İdman Klubu İctimai Birliyinə yönəldilib.
Bu məlumatı BOS-un maliyyə dirketoru Azər Əliyev “Futbol+” qəzetinə verdiyi açıqlamada təsdiqləyib. Ancaq Azər bəy maliyyə kapitalının hansı səbəblərdən azaldıldığı barədə konkret fikir söyləməyib.
O, söyləməyib, ancaq görünən odu ki, dövlətin AFFA-nın balansına verdiyi idman qurğusunun növbəti dəfə əl dəyişməsi üçün belə addım atılıb. Ona simvolik qiymət qoyulub və 1000 manatlıq nizamnamə kapitalı ilə BOS “Neftçi” İdman Klubu İctimai Birliyinin balansına verilib.
Bu dəyişiklik ciddi anlamda heç nəyə təsir etmir. BOS yenə də dövlətindi, ancaq indi onun xərcləri “Neftçi”nin hesabına ödəniləcək, idarəetməsi ilə bu ictimai birlik məşğul olacaq. Nizamnamə kapitalının azaldılması isə yüksək vergilərdən qurtulmaq və AFFA-nı böyük xərclərdən azad etmək məqsədi daşıyır.
Ötən il olimpiya stadionunun saxlanılması üçün 3,1 milyon manat xərclənib. Bu, AFFA-nın büdcəsindən aylıq 260 min manatın getməsi deməkdi. Təbii ki, həmin pul sponsor olan SOCAR-dan gedir, AFFA vasitəsi ilə yönəldilirdi. İndi qurğu “Neftçi” İK İB-nin balansına keçsə də, maliyyə mənbəyi dəyişməyəcək. Ancaq görünür, xərclərin böyüklüyü bu addımı atmağı zəruri edib.
590 milyon manat SOCAR prezidenti Rövnəq Abdullayevin sərəncamı ilə ictimai birliyin nizamnamə fonduna ötürülüb. Bununla da SOCAR-ın nəzdində olan bütün idman obyektləri “Neftçi” İdman Klubu İctimai Birliyindən idarə olunacaq.
“Neftçi” İdman Klubu İctimai Birliyinin idarəetmə aparatının rəhbəri Sadıq Sadıqovdu. “Neftçi” futbol klubunun sabiq prezidenti Sadıq Sadıqov Rövnəq Abdullayevin sevimli kadrıdı. O, hazırda həm də Cüdo Federasiyasında vitse-prezident kimi fəaliyyət göstərir. Deməli, həm də AFFA prezidenti olan Abdullayev qurğunu assosiasiyanın baş katibi Elxan Məmmədovun nəzarətindən çıxararaq daha çox güvəndiyi şəxsə tapşırıb.
Bu, Məmmədovun son vaxtlar aldığı ikinci ciddi zərbədi. “Neftçi”də əlini-üzünü bulaşdıran baş katib kluba nəzarəti əldən vermək üzrədi. Son vaxtlar paytaxt klubunun maliyyəsi azaldılıb, üstəlik, Kamal Quliyevin simasında onun dəstəsinə aid olmayan adamların təyinatı reallaşıb. Bu da başadüşüləndi. Çünki fantastik maliyyənin qarşılığında “Neftçi” illərdi böhrandan çıxa bilmir, son mövsümü də 8 komanda arasında 7-ci pillədə bitirdi.
İndi də BOS-la bağlı məsələyə əncam çəkilməsinə başlanılıb. Bu stadionun saxlanılmasına külli miqdarda vəsait sərf olunur, Elxan Məmmədovun vasitəsi ilə arenanın qazonlarına “Agrosport” şirkəti qulluq edir. AFFA-nın balansında olmayan stadionlarla müqayisədə Məmmədovun havadarlığı sayəsində 10-12 qat əlavə pul itkisinə yol verilir və bu vəsaitin də müəyyən adamların cibinə axdığı bəllidi. Son qərarla həm SOCAR-ın, həm də AFFA-nın xərclərində ciddi fərqlər olacaq. Artıq yuxarılar israfçılığın səbəbini anlayıb və səbəbkarı “tapıblar”. Məmmədovun monopoliyası yavaş-yavaş əlindən alınır.
Maraqlıdı ki, “Neftçi” PFK da dolayısı ilə “Neftçi” İK İB-ə bağlıdı. Çünki klubun təsisçisi məhz ictimai birlikdi. İndinin özündə də kluba maliyyə İK İB tərəfindən gəlir. PFK rəhbərliyi bütün xərclər, əməkhaqqları və s. üçün məktubla Sadıq Sadıqova müraciət edir və onun imzasından sonra pul köçürmələri reallaşır.
Bu qərar “Neftçi” uğrunda mübarizəni başqa müstəviyə keçirdi. Baş katib tədricən sıxışdırılır, əməlləri faş olur. Yəqin ki, növbə digər sahələrə də çatacaq. Çünki “Neftçi” onun uda bilməyəcəyi qədər böyük loxma idi və tamahı başına bəla oldu.
CAVAD