Elxan Məmmədov: "Əsas məqsədimiz AÇ-2020-yə vəsiqə qazanmaqdı"

AFFA-nın baş katibi Elxan Məmmədov DÇ-2018-in seçmə mərhələsi çərçivəsində Şimali İrlandiyaya qarşı keçirilmiş oyunu şərh edib. Futbolinfo.az xəbər verir ki, o, komandamızın 0:1 hesablı məğlubiyyəti ilə bağlı öncə bunları söyləyib:

– Azarkeşlərə təşəkkür edirik. Həqiqətən də 90 dəqiqə möhtəşəm dəstək oldular. Milli komandamız isə əla oyun nümayiş etdirdi. Mübariz oyun sərgilədik. Komanda yaxşı oyun göstərsə də, uda bilmədi. Əvəzində isə son dəqiqədə rəqib qol vurdu. Həmin anda bilmirsən ki, futbolu sevəsən, ya nifrət edəsən. Bu da futbolun 90 dəqiqə oynanıldığını göstərir. 90 dəqiqə ərzində şanslarımız oldu.

– Bundan sonra şanslarımızı necə dəyərləndirirsiniz?
– Təbii ki, şans var. Amma artıq 4 oyun qalıb. Artıq şansımız azalıb.

– Yığmamız AÇ-2020-ni düşünə bilər?
– Bu seçmə mərhələnin əvvəlindıə “niyə də yox” şüarını elə-belə qoymamışdıq. Bizim əsl məqsədimiz 2020-ci ildə keçiriləcək Avropa çempionatına vəsiqə qazanmaqdı.

– Robert Prosineçkinin adı “Bursaspor”la birgə hallanır. Onun yığmadakı taleyi necə olacaq?
– Bununla bağlı müzakirə olmayıb. Qeyd etmişik ki, Prosineçkinin ilin sonuna kimi bizimlə müqaviləsi mövcuddu. Bu məsələyə qayıtmaq məqsədəuyğun deyil. Prosineçki bu məsələ haqda danışmır və bizə müraciət də etməyib. Əvvələr də mətbuat yazırdı ki, “Bursaspor” Prosineçkini Türkiyəyə apardı. Amma sonradan yalan çıxdı. “Bursaspor” rəsmiləri bildirirdilər ki, AFFA rəsmiləri ilə görüşüblər. Amma onlar heç də AFFA ilə danışıqlar masasına keçməyib. Biz heç onları tanımırıq. Telefon zəngimiz də olmayıb.

– Böyük ümidlərlə gözlədiyimiz Renat Dadaşov bu matçda iştirak ərizəsinə belə salınmadı.
– Prosineçki dünənki konfransda bildirdi ki, Renat yaxşı və güclü oyunçudu. Ancaq onun vaxtı gəlməyib. Gəlin səbirli olaq. Məşqçinin yəqin ki, öz planları var.

– Rövnəq Abdullayev futbolçularla görüşdümü?
 – Rəsmi qonaqlarmız var idi. Mən görüşdüm və Rövnəq müəllimin də adından komandaya təşəkkür etdirdim. Gözəl oyun sərgilədilər. Son dəqiqə qoluna görə hamımız üzüldük.

– Hesab sizcə, necə olmalı idi?
– Belə deyək, heç-heçə olsaydı, deyəcəkdik ki, kaş udardıq. Amma bu hesabdan sonra görürük ki, heç-heçə də yaxşı nəticə olardı.

ELMAR ABDULLA-ZADƏ