Dünya futbolu
Hakan Çalhanoğlu "Bayer"i "Milan"a dəyişdi
Türkiyə millisinin və Almaniyanın "Bayer" klubunun y…
Türkiyə millisinin və Almaniyanın "Bayer" klubunun yarımmüdafiəçisi Hakan Çalhanoğlu "Milan"a transfer olunub. Futbolinfo.az xəbər verir ki, ötən gün İtaliyaya yollanan 23 yaşlı futbolçu Milanda tibbi müayinədən keçib. Bu barədə "Milan"ın rəsmi saytı məlumat yayıb.
Yarımmüdafiəçi tezliklə İtaliya nəhəngi ilə 4 illik müqaviləyə imza atacaq. İtalyanlar bu keçidə görə Bundesliqa təmsilçisinə 20 milyon avro ödəyəcəklər. Futbolçunun yeni klubundakı uğurlu çıxışı onun sabiq komandasına daha 4 milyon avro qazandıra bilər. Hakan özü isə "Milan"da ilinə 2,5 milyon avro gəlir əldə edəcək.
Hakan peşəkar karyerasına 2011-ci ildə yetirməsi olduğu "Karlsrue"də başlayıb. O, 2013-cü ildə "Hamburq"a transfer olunub və cəmi bir mövsüm bu komanda oynadıqdan sonra "Bayer"ə keçib. O, Leverkuzen təmsilçisində 79 oyuna çıxıb, 17 qola imza atıb. 2013-cü ildən Türkiyə yığmasına da dəvət alan futbolçu qonşu ölkə millisində 26 oyuna 8 qol vurub.
Çalhanoğlu 2001/02 mövsümündə "Milan"da çıxış etmiş Ümit Davalanın ardından bu komandada çıxış edəcək ikinci türkiyəli futbolçudu.
Bir müddət öncə çinli investorlar tərəfindən satın alınan "Milan" İtaliyada bu yayın transfer bazarının ən fəallarından biridi. Sözügedən klub Hakandan öncə Matteo Musakkio, Frank Kessye, Andre Silva, Rikardo Rodriqes və Fabio Borinini heyətinə cəlb edib.