Ölkə futbolu
“Neftçi” “Kəpəz”in legionerini oğurlamaq istəyir
“Neftçi” indi də futbolçu “oğurluğ&…
“Neftçi” indi də futbolçu “oğurluğ”una başlayıb. Dövlətin vəsaiti olan klub büdcəsini talayan, bundan doymayıb kredit də götürən bakılılar indi başqasının əziyyətindən faydalanmaq istəyir.
Futbolinfo.az xəbər verir ki, bakılılar Mali yığmasının 20 və 23 yaşadək yığma komandalarına dəvət olunan mərkəz yarımmüdafiəçisi Dialo Sambaya təklif göndərib. Karyerası ərzində Seneqal, Mərakeş və Mali çempionatlarında çıxış edən futbolçunun sonuncu klubu Mərakeş “Muludiya”sı olub. Elə “Kəpəz” də futbolçunu orada bəyənib.
Amma gəncəlilərin israrla gizli saxlamasına baxmayaraq, mətbuatın xəbər tutduğu transfer haqda yazması başqalarının işinə yarayıb. Görünür, “Kəpəz”in məşqçiləri də bu adamların xislətinə bələd olduğu üçün sövdələşməni gizli saxlayırmış.
Gəncəlilərin razılaşdığı və komandanın Ərzurum toplanışına gələcəyi gözlənilən futbolçunun menecerinə Kamil Məmmədov çıxış tapıb. “Neftçi”ni inhisarında saxlayan bu menecer futbolçuya “Kəpəz”dən daha artıq pul təklif etməklə onun transferinə nail olmaq istəyib. Lakin qarşı tərəf komandanın ötənilki nəticələrinə baxdıqdan və daha öncə “Kəpəz”lə danışıq apardığından bu variantddan imtina edib.
Əslində, hansısa futbolçu ilə bir neçə klubun danışıq aparmasında problem yoxdu. Amma Məmmədov “Kəpəz”in bu futbolçuyla anlaşdığını bilə-bilə təklif göndərməklə faktiki gəncəlilərə problem yaradıb. Daha sərfəli müqavilə təklifiylə futbolçunun saqqızını oğurlamaq istəyən Kamil həm də keyfiyyətli oyunçu arzusunda imiş.
Gətirdiyi əcnəbilərin keyfiyyətsiz çıxması, 150-200 min manatlıq futbolçuların bir işə yaramamasını görən menecer Sambanı gətirməklə aldanmayacağına əmindi. O, bununla həm 50-60 minə daha keyfiyyətli futbolçu gətirəcək, həm məbləği 100 minədək göstərib qazanacaqdı.
Dialonun keyfiyyətli futbolçu olmasına isə şübhə yoxdu. “Kəpəz”ə son illər gələn bütün legionerlər səviyyəli olub, bu isə yeni seçilənin də sıradan biri olmayacağını deməyə əsas verir. "Neftçi"ni əcnəbi ilə təmin edən menecerlər, eləcə də baş məşqçi Şahin Diniyev futbolçuları bir neçə günə seçmir, onları uzun müddət izləyir, keyfiyyətə əmin olduqdan sonra qərar verir. Və “Kəpəz”in Samba ilə anlaşması o deməkdi ki, artıq futbolçunun yüksək səviyyəli olması şübhə doğurmur. Bütün günü kef damaqda olan Məmmədov da hazıra nazil olmaq istəyib. O, Diniyevin bəyəndiyi futbolçuya qırmaq atıb, amma rədd cavabı alıb.
AĞA