Ölkə futbolu
“Qarabağ”la “Qəbələ”ni itirməyək
“Qəbələ” ilə “Panatinaikos”un oyununun yek…
“Qəbələ” ilə “Panatinaikos”un oyununun yekun nəticəsi klubun taleyinin həlli baxımından həlledici ola bilməz. Olmamalıdı. Məğlubiyyət də mümkündü, heç-heçə də, bir işə yaramayan qələbə hesabı da. Lap “qırmızı-qaralar” bu rəqibi keçin, pley-offda da dayana bilər.
Perspektivdəki istənilən nəticə klubun sabahını müəyyən edəcək. Yaxşı nəticə klubun ayaqda qalması, ən azı indiki səviyyədə yaşaması üçün stimul olacaqsa, uğursuzluq bütün iddialardan əl çəkilməsi, “Qəbələ”nin az maliyyəylə baş qatan sıradan bir kluba çevrilməsi baxımından həlledici məqam ola bilər. Şübhələr, gəzən söz-söhbətlər bu tiplidi.
Amma belə olmamalıdı. Nəvaxtsa “Qarabağ”ı da belə aqibət gözləyə bilər. Halbuki ölkə futbolunun ayaqda qalması, inkişafı, markaya çevrilməsi baxımından bu 2 klub böyük işlər görüb. Öz hesablarına, sponsorların, rəhbərliyin, məşqçi və futbolçuların səyi nəticəsində. Hamının uğursuz şuralaşma oyununa getdiyi zamanda ən doğru yolu seçən və ən yaxşı nəticələrə imza atan bu 2 klubu qorumaq, onlara dayaq durmaq lazımdı. Və bu, indiki halda həm də dövlətin idman siyasətinə nəzarət edənlərin vəzifə borcudu.
“Böyük beşlik” ölkələri, ikinci eşelon komandaları – Avropanın elit turnirlərində yalnız onların təmsilçiləri qalıb. Bundan başqa, bir neçə ölkə var ki, 1 təmsilçisi belə yarışlarda təmsil olunur və onlardan da biri Azərbaycandı. Hanı Macarıstan, Polşa, Slovakiya, Çexiya, Avstriya klubları? SSRİ vaxtı həsəd apardığımız Rusiya, Ukrayna komandaları yalnız illər boyu yığdığı reytinqə görə hələ də ayaqdadı, həsrət çəkdiyimiz BATE, qruplarda gördüyümüz “Şerif” indi bizim paxıllığımızı çəkir. “Qarabağ” ardıcıl 4-cü dəfədi qruplarda oynayacaq, “Qəbələ” 3-cü zəfərə doğru gedir.
Artıq sabitlik var, Azərbaycan futbolu da 2 klibin sayəsində kiçik markadı. Nəyə görə onların daimi flaqman olmasını, digərlərin isə bu rəqabətə öyrəşib, özünü inkişaf etdirməsinə dəstək olmayaq? Axı, idman da siyasətin bir qoludu və ölkənin imicinin yaxşılaşdırılması, Qarabağ probleminin müsbət həlli istiqamətindəki təbliğatda bu vasitə də çox vacibdi. Daha az xərclə daha böyük nəticə qazandığımız bu layihədən niyə imtina edək?
Ola bilər, “Qəbələ” istəyinə çatmayacaq – çətin vəziyyətdi. Lakin buklubun məhvinə imkan vermək olmaz, əksinə, kluba dayaq durmaq, hazır mexanizmi daha da canlandırmaq lazımdı. Ölkə futboluna son 10 ildə 2-3 milyard manat xərclənib, nəticələr isə dəyişməyib, yerimizdə sayır, hətta geri gedirik. Yalnız 2 klub ümumi fonda parlaq nəticələrlə yadda qalıb və indi onlar da uçurumun kənarındadı, bataqlıq onları özünə tərəf çəkir. Rəqabətsizlik, sərt limit qaydaları, maddi uçurumdan irəli gələn qısqanclıq bu komandaları sıradan çıxara bilər. Halbuki onlara dövlət səviyyəsində dayaq durmaq, digərlərinin də bu 2 klubun təcrübəsindən yararlanaraq inkişafına nail olmaq lazımdı.
“Qarabağ” Çempionlar Liqasının qapısını döyür. Milyonlar xərcləyib Azərbaycana şou üçün gətirə bilməyəcəyimiz ulduzlar indi məcburən Bakıya səfər etməlidi. “Barselona”, “Yuventus”, “Çelsi”, “Bavariya” və daha neçə-neçə klub yolunu Respublika stadionundan sala bilər. “Qəbələ” “Fənərbaxça”, “Arsenal”, “Ayaks” və daha neçə kluba rəqib olub onları ölkəmizə gətirəcək. Bundan gözəl təbliğat, bundan gözəl nəticə ola bilərmi?
Futbol böyük oyundu, kiçik maraqlar xatirinə onun inkişafını əngəlləmək olmaz. Əlimizdəki incinin qədrini bilməli, onu qorumalıyıq. Bu gün “Qəbələ”nin perspektivi sual altındadı, sabah “Qarabağ”a görə narahat olacağıq, onları itirsək, növbəti illərdə ümidimiz də qalmayacaq, hər şeyə sıfırdan başlamalı, bunun üçün illəri, milyonları sərf etməli olacağıq. Halbuki həmin milyonları bu klublar indi özləri qazanır, xərclənən pulları geri qaytarırlar. Beynəlxalq futbol qurumlarından gələn pullar xərclərin böyük qismini bağlayır, daha da irəli getməklə misilsiz qazanc da əldə etmək mümkün olacaq.
Futbol həm də biznesdi. Əyləncə, təbliğat, nüfuz, qazanmaq imkanı. Qazanclı əyləncədən imtina etmək olarmı?
AĞA
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Milli komanda2024-05-04 15:39
Millimiz UEFA İnkişaf Turnirində ikinci oyununda da uduzdu
- Premyer-liqa2024-05-04 18:59
Samir Abasov: “Bu, “Qarabağ”la matçdakı yorğunluqdan irəli gələ bilər” – VİDEO
- Ölkə futbolu2024-05-04 10:19
“Araz-Naxçıvan”ın baş məşqçisi: “Rəqib tapmaq çətinləşir”