Hacı Vaqifin çempionatı

Ona “Hacı Vaqif” deyir, belə müraciət edirik. İnanclı adamdı. Vaqif Davudovu deyirəm.

O, həm də fəal futbol təşkilatçısıdı. Yaşlı olması bir yana, təcrübəsi ilə bir çox AFFA məmurunu cibində gəzdirər. İndi həm də Hakim-inspektorar Komitəsində çalışır, tez-tez oyunlarda işinin başında olur.

Davudovu daha çox Bakı qəsəbə və kəndlərinin çempionatının təşkilatçısı kimi tanıyırıq. Abşeronda top oyununun populyarlaşmasında, bir çox gəncin sağlam həyat tərzi yaşamasında onun misilsiz xidməti var. Bəzən din adamlarının şərəfinə də yarış keçirir, AFFA-nın unutduğu futbol əfsanələrimizin – Anatoli Banişevskinin, Ələkbər Məmmədovun xatirəsinə də. Səviyyə bir o qədər yüksək olmur, amma imkanı daxilində nələrsə edir.

Ölkə çempionatının turnir cədvəli bəzən coğrafiya dərsliyi və ya turistlər üçün soraq kitabçası rolunu oynamalıdı. Sevilya, Valensiya, Barselona, Verona, Mançester, Bordo, Portu, Eyndhoven və s. – həm şəhər, həm də klub adlarıdı. Hələ fərqli adlarla milli birinciliklərdə təmsil olunan neçə-neçə şəhərin komandası var. Və istənilən ölkədə belələrinin sayı ən azı 10 rəqəmiylə ölçülür. İtaliyada, İngiltərədə, İspaniyada, Almaniyada minimum 10 şəhərin komandası təmsil olunur və paytaxtdan 2-3 komandadan artığı olmur.

Bəs, bizdə vəziyyət necədi? Cəmi 8 komanda və əksəriyyəti Bakıda məskunlaşıb . “Sumqayıt” da elə paytaxta bitişikdi, “Qarabağ” illərdi qaçqın kimi Suraxanıda məskunlaşıb, “Kəpəz” Gəncəyə oyundan-oyuna gedir. Belədə yalnız “Qəbələ” həqiqətən rayon komandasıdı. Hətta sırf təmsil etdiyi şəhərləri əsas götürsək, iştirakçıların tam yarısı Bakıdandı. Sanki bu ölkə paytaxtdan ibarətdi, bölgələrdə futbolun inkişafı, kütləvilik heç kimə lazım deyil.

Tovuz, İmişli, Quba, Qusar, Zaqatala, Yevlax, Şəmkir, Lənkəran, Salyan, Cəlilabad, Sabirabad, Beyləqan, Şamaxı, Bərdə, Tərtər, Şəki, Ağsu, Ağdaş, Mingəçevir, Masallı və başqalarının olduğu bir çempionat təsəvvür edin.

Bəs, biz nə edirik? Bu gün-sabah “İnter” də “Mərdəkan”a çevriləcək, “Səbail” elə Bayıl kimi bir şeydi, “Zirə”, divizionda “Binə”, “Şüvəlan”, həvəskarların yarışında “Sabunçu”, “Suraxanı” var. Əsl Bakı kənd və qəsəbələrinin çempionatı. Bircə Hacı Vaqifin AFFA-nın baş katibi və ya Peşəkar Futbol Liqasının prezidenti olması qalıb.

Ölkə futbolunu SOCAR-ın zavod birinciliyi, kənd-qəsəbə çempionatı səviyyəsinə endirənlər utanırmı, görəsən?