Ölkə futbolu
“Qəbələ”nin gözlənilən vidası
“Qarabağ” rəqib gözləyir. Az sonra atılacaq p&uum…
“Qarabağ” rəqib gözləyir. Az sonra atılacaq püşk təmsilçimizin tarixi zəfər yolundakı son əngəlinin adına aydınlıq gətirəcək.
“Qəbələ” üçün isə hər şey bitdi. “Qırmızı-qaralar” qitə səhnəsinə qayıtmaq üçün daha bir mövsüm gözləməli, buna qədər ölkə çempionatında çətin olmayan vəzifənin öhdəsindən gəlməlidilər.
Roman Qriqorçukun yetirmələri bizi elə öyrəşdirmişdi ki, təmsilçimizin “Panatinaikos”u keçib, ardıcıl 3-cü dəfə Avropa Liqasının qrupuna vəsiqə qazanacağına inanırdıq. Lakin oyun istənilənin hər dəfə reallaşmadığını, bunun üçün daim güclü olmağın gərəkdiyini göstərdi.
14-cü dəqiqə hesab artıq 3:0 olmalı idi. Evində tək qolla qalib gələn qonaqlar Bakıda da daha diribaş idi. “Qəbələ”nin startdakı canfəşanlığına real qol vəziyyətləri ilə cavab verən “Pao”nun hesabı açmamasına görə bəxtə minnətdar olmalıyıq. Daha sonra oyunu bərabərləşdirən təmsilçimiz hissənin sonunda özü qola yaxın oldu.
Real qüvvələr nisbətinin əksinə olaraq, “Qəbələ” fasilədən qayıdan kimi hesabı açdı. Stiven Josef-Monrosun əla kombinasiyadan sonrakı fərdi ustalığı rəqib oyunçunu avtoqola məcbur etdi. Amma mərkəzdəki ardıcıl səhvlər, yersiz top itkiləri 10 dəqiqəlik sevinci bitirdi. Yunanların cavab qolu həm də əlavə vaxtın olmayacağını rəsmiləşdirdi. Çox keçməmiş əvəzetmədən oyuna daxil olanların yaratdığı daha bir epizod və İlqar Qurbanovu qazona sərən rəqib qələbə qolunu vurdu.
Artıq möcüzəyə ümid yox idi. “Qəbələ” daha 3 qol vurmalı idi – bu isə mümkünsüz görünürdü. Bunu hamıdan əvvəl anlayan Qriqorçuk əvəzetmələrə başladı və Premyer Liqanın ilk turunda “İnter”ə qarşı oyunun məşqinə başladı. Meydanda yerli oyunçuların sayı artdı, hamı vaxtın bitməsini gözləməyə başladı. Düzdü, son dəqiqələrdə “Qəbələ” ən azı uduzmamaq üçün cəhdlər etdi, lakin güclü rəqib buna da imkan vermədi.
Uzun fasilədən sonra himayədarı olduğu komandanı stadionda izləyən Kəmaləddin Heydərov erkən getdi. Digər rəhbər şəxslər də çox məyus görünmürdü. Son illər möcüzələrə imza atıb qrupda oynayan komanda sadəcə, bu dəfə bacarmadı. Yenidən həmin iddianı qaytarmaq üçün bir illik zaman var və ciddi/yersiz islahatlar olmasa, “Qəbələ” bunu yenə bacaracaq.
“Qəbələ”nin pley-offa yüksəlməməsinin səbəbi təkcə rəqibin güclü olması deyildi. Təmsilçimiz daha güclü rəqibləri də yolundan təmizləyib, elə həmin “Pao”nu keçib. Budəfəki uğursuzluğun əsas səbəbi heyətin ciddi şəkildə yenilənməsi oldu. Qriqorçuk birdən-birə 10-12 oyunçunu dəyişdi və yeniləri güclü yumruğa çevirməyi bacarmadı. Daha bahalı və səviyyəli oyunçulardan qurulan “Panatinaikos”u yalnız komanda oyunu, əzmkarlıq sayəsində krçmək olardı. “Qəbələ” məhz komanda olmağı bacarmadı.
Yeni transferlər haqqında pis danışmaq olmur – hər biri fərd olaraq bacarıqlı oyunçulardı, müsbət keyfiyyətləri var. Amma onların bir-birinə uyğunlaşması, vahid mexanizmə çevrilməsi üçün 2 ay, 3-4 oyun kifayət etmədi. Bəlkə də Nika Kvekveskirini fədakarlıq edib saxlamaq, xələfindən daha yaxşı olan Rikardinyonu göndərməmək, “ansambl”a uyğunlaşmış Daniel Subotiç, Rəşad Sadiqov, Teo Uiksə daha bir şans vermək olardı. Bəlkə…
Artıq olan oldu. İndi “Qəbələ” səhvlərdən nəticə çıxarmalı, sabit heyət quruculuğuna başlamalıdı ki, yenidən Avropa kuboklarına döyüşkən ruhda qayıtsın. Hələliksə “Qarabağ”la kifayətlənəcəyik…
AĞA
- Ölkə futbolu2024-04-21 11:50
Rəfiyev “Sabah” üçün plan qurub: rəqibinin rəqibini stimullaşdırır
- Ölkə futbolu2024-04-21 10:19
Yeni AFFA rəhbərliyi də əcnəbilərə üz tutdu: hər şey xorvatlara tapşırılacaq
- Ölkə futbolu2024-04-21 08:00
Andersonun dediyi kimi…
- Premyer-liqa2024-04-20 20:55
“Zirə” “Neftçi”yə qalib gəldi