Ölkə futbolu
“Səbail” ev oyunları üçün “Dalğa Arena”nı seçdi
Topaz Premyer Liqasında yeni mövsümün startına 1 həf…
Topaz Premyer Liqasında yeni mövsümün startına 1 həftə qalıb. Amma hələ də bir çox klubların stadion problemi həll olunmayıb. Futbolinfo.az xəbər verir ki, “Kəpəz”, “İnter” və “Səbail”in belə problemi var.
Gəncə şəhər stadionunun qazonunun yenilənməsi üzündən “Kəpəz” ilk dövrədə evində oynamayacaq. Klub rəhbərliyi yeni ot örtüyünün tam hazır olmasını gözləməyə məcburdu və bu proses oktyabra kimi davam edəcək. Bu isə o deməkdi ki, gəncəlilər ən yaxşı halda 2-ci dövrədə doğma şəhərə qayıdacaq. Komanda bu müddətdə ev oyunlarını rəqiblərlə razılaşaraq, onların meydanında keçirəcək. Yəni ilk dövrənin bütün matçlarında Şahin Diniyevin yetirmələri qonaq olacaq, ardınca isə 7 matçda ev sahibi kimi çıxış edəcək.
“İnter”də problem başqadı. “İnter Arena”dan qovulan komanda Mərdəkana pənah aparıb. Amma sabiq “bankirlər”in ev oyunlarını “Dalğa Arena”da keçirəcəyi tam dəqiqləşməyib. Klubdaxili bəzi problemlər üzündən icarə anlaşması rəsmiləşməyib və tərəflər gözləmə mövqeyindədi.
Stadion problemi olan digər komanda “Səbail”di. Premyer Liqanın debütantı çempionat matçlarında “Bayıl Arena”da ev sahibi olacaq. Lakin burada da təmir-tikinti işləri yekunlaşmayıb. Hazırda stadionun süni ot örtüyü yenilənir və bu proses sentyabrın ortalarına kimi davam edəcək. Deməli, “qartallar” “Neftçi”, “Qarabağ” və “Qəbələ”yə qarşı ev oyunlarını Bayılda keçirə bilməyəcək.
Ancaq debütant problemin həlli üçün – “Kəpəz” kimi – rəqiblərə müraciət etməyəcək. Klub rəhbərliyi “Dalğa Arena”nı müvəqqəti məskən seçib. “Səbail”in mətbuat xidmətinin rəhbəri Firuz Abdullanın sözlərinə görə, ilk oyunları Mərdəkanda keçirəcəklər: “Qarşıdakı həftənin ilk günü məsələ tam dəqiqləşəcək. Amma 99 faiz deyə bilərəm ki, rəqiblərimizi sentyabrın ortalarına kimi Mərdəkanda qəbul edəcəyik. Burada oynayan “İnter”lə matçlarımız üst-üstə düşmədiyindən, bu baxımdan problem olmayacaq”.