Ölkə futbolu
5 oyuna 7 qol: qonaqlar üçün uğursuz tur
“Kəpəz” turnir cədvəlinin orta sıralarına qısamüddətli səyahətdən sonra yenidən son pilləyə düşdü. Ötən tur reallaşan heç-heçədən sonra komanda qismən rahat nəfəs almışdısa, artıq bu dəfə vəziyyət başqadır. “Səbail” gəncəliləri iki xal qabaqlamağı bacardı.
Təbii ki, hələ qarşıda çox oyun var, bir-birinə çox yaxın olan autsayderlərin yerdəyişməsi tez-tez baş verəcək. Amma indi axırıncı yerə hamıdan çox məhz “Kəpəz” layiqdir. Digər komandaların oyununda nisbi inkişaf hiss olunduğu bir vaxtda Qərb təmsilçisi klubdaxili problemlərin əziyyətini çəkir.
Şahin Diniyev “Səbail”in baş məşqçisi kimi 4 oyunda 2 qələbə qazanıb. Ev matçlarında top buraxmadan qalib gələn “dənizçilər”in oyununda artım hiss olunur. Yeni baş məşqçinin öz oyun dəst-xəttini zamanla futbolçulara aşıladığını deyə bilərik. Xüsusilə “Zirə” ilə matçda “Səbail” çox yaxşı futbol göstərdi, layiq olduğu qələbəni qazandı.
Bazar gününün ilk matçında fasiləyədək meydanda dominant olan “Səbail”, “Zirə”nin hücum və yarımmüdafiə xətti arasındakı əlaqəni qırmaqla rəqibin oyununu pozdu. Amma dağıdıcılıqla məşğul olarkən hücumda istədiyin effekti ala bilmirsən. Bayıl təmsilçisi qol vurmaq üçün əks-hücumlara və standart vəziyyətlərə ehtiyac duyurdu. Belə şans ikinci hissənin əvvəlində ələ düşdü. David Qomesin cinah reydi zamanı qonaq müdafiəçilər onu seyr etməklə kifayətləndi, yeni transfer isə “onun üçün açılan koridor”da rahatca irəliləyib “doqquzluğ”u dəqiq nişan aldı.
Mərkəz müdafiəçisinin yoxluğu səbəbindən Donald Geryeni ortaya çəkən Rəşad Sadıqov hesab açılandan sonra dəyişikliklər etdi. Haitili cinaha keçəndən, dayaq bölgəsinə yeni oyunçular buraxılandan sonra “Zirə” qısa müddətdə təşəbbüsü ələ aldı. Amma “Səbail” müdafiədə oturmadı, rəqibi öndə qarşıladı və növbəti qolu vurdu.
Diniyevin yetirmələri layiq olduğu qələbəni qazandı. “Zirə”nin mövsüm ərzində ən zəif oyunlarından brini keçirməsi də məhz rəqibin daha istəkli oynaması ilə bağlı idi. Qəsəbə təmsilçisi 4-cü pillədə qalmaqda davam edəcək. Lakin ciddi transferlərə imza atan “qartallar”ın qeyri-sabit oyunu qeyd edilməlidir. Sadıqov indidən gələn mövsümü düşünsə, gələcəyin komandasını qursa, daha yaxşı olar. Çünki komanda belə oynamağa davam etsə, sabah üçün də ümid vermir.
“Sumqayıt” da vacib qələbə qazandı. Əsas rəqiblərdən olan “Şamaxı”nın əliboş yola salınması turnir cədvəli baxımından ciddi uğur oldu. Lakin “kimyaçılar” xüsusilə fasilədən sonrakı oyununa görə məyus olmalıdır. Qışda edilən saysız transferlər komandanın oyununda böyük müsbət dəyişikliklərə səbəb olmayıb. Yerli gənclərdən qurulan “Şamaxı” ilə matçda ciddi əziyyət çəkən komandanın perspektivindən danışa bilməyəcəyik.
“Şamaxı” dünən yaxşı oynadı, ancaq buna görə xal vermirlər. Ardıcıl iki əsas rəqibinə məğlubiyyət bölgə təmsilçisini zirzəmiyə sürükləyir. Növbəti turda Gəncədə də məğlubiyyət qeydə alınsa, komandanın özünə gəlməsi çətin olacaq. İnsaf naminə, komandada məşqçi işi var, futbolçular əzmkardır. Bununla belə, legioner transferinə ehtiyac duymayan komandada ustalıq səviyyəsi qənaətbəxş deyil. Həlledici oyunlarda məhz bu məqam çox şeyi həll edir.
Turda 5 oyuna cəmi 7 qol vuruldu. Premyer Liqa təmsilçilərinin tən yarısının fərqlənmədiyi həftədə qonaqlardan yalnız “Sabah” topu tora qovuşdurdu. Lakin bu da meydan sahiblərinin turu məğlubiyyətsiz başa vurmasına mane olmadı.
CAVAD