Ölkə futbolu
“Sumqayıt”a yaraşan qələbə, yaraşmayan diqqət(sizlik)
Sumqayıtda gözəl futbol havası var idi. Gecə vaxtı Xəzərin…
Sumqayıtda gözəl futbol havası var idi. Gecə vaxtı Xəzərin sahilində, sərin havada baxımlı futbol izləmək zövq verirdi. Düzdü, televiziya maraqları üzündən çox gec başlayan oyun səhər işə gedəcək insanlar üçün əlverişli deyildi. Bəndəniz stadionda işini qirtarıb, Bakıya – evə çatanda saat 01.29-u göstərirdi. Amma gözəl futbol naminə bu əziyyətə qatlaşmağa dəyərdi.
Yenilənmiş və güclənmiş “Sumqayıt”ın heyətini büsbütün dəyişən “Kəpəz”lə qarşılaşmasını izləmək üçün Gəncədən də xeyli azarkeş gəlmişdi. Lakin “Kapital Arena”nın tam dolmasının səbəbi 50-60 nəfərlik qonaq azarkeşlər deyildi, şəhər futbolsevərləri hətta piləkənlərdə də boş yer qoymamışdı. 1300 nəfərlik (bəzi mənbələrdə 1500 göstərilir) tutumu olan arenada bilet satışı təşkil olunmur. Elə bu səbəbdən AFFA nümayəndəsi Elbrus Abbasovun protokolda dəqiq qeyd etdiyi 1326 nəfərlik azarkeş sayını necə müəyyən etdiyi müəmmadı.
Təbii ki, Abbasov tamaşaçıları bir-bir saymamışdı, lakin o, 3000 rəqəmini qeyd etsəydi, buna görə də onu qınamazdım. Çünki matçı hasar arxasından tribunadakından çox adam seyr edirdi. Bu şəhərə böyük stadion lazımdı və komandanın qələbələri sıralayacağı təqdirdə azarkeşlərin yerləşdirilməsinin necə tənzimlənəcəyi çox maraqlıdı. Hətta bu baxımdan ciddi problem də yarana bilər. Bəlkə də bilet satışını təşkil etməklə anşlaqın qarşısını süni şəkildə almaq olar.
Ən maraqlısı odur ki, 15-20 metr kənarda 15 min tutumu olan Mehdi Hüseynzadə adına stadion var. Lakin icra hakimiyyətinin balansında olan bu arena illərdi təmir yolunu gözləyir. Son 4 ayda hər həftə burada planlaşdırılma aparılır, lakin işlərə start verilmir ki, verilmir. Buzun əriməsi üçün “Sumqayıt”ın uğurlu çıxışı da həlledici rol oynaya bilər. Bu baxımdan ilk addım isə dünən atıldı.
Vüqar Bəybalayevlə Tural Axundovun Sumqayıta, Sergey Çernışevlə Kamran Abdullazadənin Gəncəyə köçməsi heç nəyi dəyişməmişdi. Komandalar arasındakı yerdəyişmələr bəlkə də daha təcrübəli oyunçularla güclənən “Sumqayıt”ın xeyrinə işləyib. Amma birindən digərinə keçən bu oyunçulardan heç biri matçda möhürqoyan olmadı.
Hesabın açıldığı epizodda mübahisəli vəziyyət yaranmışdı. Cavid İmamverdiyev qol vurarkən ayağını təhlükəli qaldırmışdı, amma hakimlər qolu qeydə aldı. Ümumiyyətlə, ədalət təmsilçiləri daha bir neçə epizodda şübhəli qərarlar verdi. Novruz Məmmədov ilk yarıda əllə oynayarkən sarı vərəqə belə görmədi, halbuki həmin epizodda o, təhlükəli hücumun qarşısını almışdı. Matçın sonlarında isə yenə Novruz cərimə meydançasında topa zərbə endirən Cavidi itələyib növbəti qola bilavasitə əngəl oldu. Qonaqlar da bir neçə epizoddan şikayətlənə bilər.
Fasiləyə kimi meydan sahibləri bir neçə oyuna yetəcək qədər təhlükəli vəziyyət yaratdı, dirəyi silkələdi, real şansları sağa-sola xərclədi. Onların yarısının reallaşdırılması böyükhesablı nəticəyə gətirib çıxaracaqdı. Amma gəncəlilərin bəxti gətirdi, üstəlik, fasilədə Şahin Diniyev futbolçularına nə dedisə, ikinci yarıda fərqli “Kəpəz” gördük. Pressinq edən, daha cəsarətli oynayan qonaqlar hesabı da bərabərləşdirə bildi. “Sumqayıt”ın mərkəz müdafiəçilərinin anlaşmazlığından sonra Viktor Oseqeyl topu tor göndərdi.
Lakin layiqli nəticə meydan sahiblərinin qələbəsi olmalıydı. Və onlar 3 xalı gətirən topu sona yaxın vurdular. Novruz Məmmədovun zədələnib oyundan çıxmasından sonra Şəhriyar Əliyev məcburiyyətdən sağ cinaha şəkildi, müdafiənin mərkəzində oyun qurğusunun pozulması isə qolla nəticələndi. Amil Yunanov Dedimar Fereyra ilə hava mübarizəsindən qalib ayrılıb, oyunda son nöqtəni qoydu.
“Sumqayıt” haqda ilkin təəssüratlar yalnız xoş sözlərdən ibarətdi. Komanda təcrübəli oyunçularla gənclərin vəhdətindən qurulub və Samir Abasov işlək mexanizm yarada bilib. “Kimyaçılar” sürətli, rəngarəng kombinasiyalı futbol oynayır. Lakin qol vuruşlarındakı qeyri-dəqiqlik komandanı çox pis vəziyyətdə qoya bilər. Mövsümə hazır olmadığı aşkar görünən “Kəpəz”lə oyunda qələbə çətinliklə təmin edildisə, daha diri komandalarla görüşdə bu əskiklik problem yaradacaq.
Qonaqlarda problem daha çoxdu. Yeni legionerlər pis deyil, amma onlar hələ ki, oyun sisteminə tam öyrəşməyib. Daha hərəkətli olan Viktor Oseqeyl kimi Samba Dialo da fərdi keyfiyyətləri ilə seçilir. Dedimar Fereyranın 2-ci qoldakı səhvi isə daha çox fiziki hazırlıqsızlığın nəticəsidi. Zədə üzündən son həftəni məşq etməyən braziliyalı toparlanandan sonra daha faydalı olacaq.
Gəncəlilərin əsas problemi yerli oyunçularla bağlıdı. Onların yetərsizliyi aşkar görünür. Yeni transferlərdən olan İlkin Sadıqov hələ də divizionda oynadığı futboldan uzaqlaşa bilməyib. Əla fiziki göstəriciləri olsa da, qəlibə düşməsi üçün çox vaxta ehtiyac duyulacaq. Diniyevin hələ ilk yarıda əvəz etmək istədiyi bu oyunçu yalnız yaş limitinə görə meydanda qaldı. Halbuki real yaşı 25 olan (yaşını 5 il saxtalaşdırdığı deyilir – red.) bu futbolçu uzağı yarım saat normal oynamaq gücündədi. İstənilən halda, komanda mövsümə hazır deyil və daha bir neçə tur “Kəpəz” haqda yaxşı sözlər söyləyə bilməyəcəyik.
“Sumqayıt” çətinliklə də olsa qələbə qazandı. Bu dəqiqdi ki, bu şəhərə səfər istənilən komanda üçün çətin keçəcək. Amma klub rəhbərliyinin bir az tərpənməsi lazımdı. İcra hakimiyətini digər stadionun təmirinə tələsdirmək və həvəsləndirmək vacibdi. Yoxsa komandanı qələbəyə səsləmək əvəzinə hasar arxasında boynubükük dayanan azarkeşləri hələ çox görəcəyik.
FƏRİD
- Ölkə futbolu2024-05-10 08:00
“Yurqorden” Musa Qurbanlıya qiymət qoydu – 10 milyon kron
- Ölkə futbolu2024-05-10 09:21
“Əks təqdirdə fanatlar Şeydayevi qəbul etməyəcək”
- Dünya futbolu2024-05-10 16:37
AÇ-2024-ün rəsmi mahnısı təqdim edildi – VİDEO
- Ölkə futbolu2024-05-10 16:20
Kadinin meneceri: “Hələlik “Qarabağ”la danışmamışıq”