Ölkə futbolu
Komanda dağıtmaq üçün 6500 manat maaş
– “Neftçi” yenə uduzdu…
– “Neftç…
– “Neftçi” yenə uduzdu…
– “Neftçi”nin udan günü var ki?..
Tanış dialoqdu və sanki neçə illər öncə elə bu gün üçün deyilib. 8 komanda arasında 8-ci pillədən çıxa bilməyən bakılılar ümidləri artıqlaması ilə doğruldur.
***
Elxan Abdullayev də özünə məşqçi deyirsə, indi Əhməd Ələsgərov qəbrində fırlanır, Ruslan Abdullayevin ruhu boynubükük dayanıb, Ağasəlim Mircavadovun matı-qutu quruyub, Qurban Qurbanov yəqin ki, mətbuat özünə çıxmaq istəmir və s. “Neftçi” kimi komandanı hətta 50-60 baş qoyunun tapşırılması riskli olan birinə həvalə ediblər, o da elə bilir Mourinyodu, Lippidi, Ançelottidi, sadəcə, bəxti gətirmir.
Dünən “Səbail” futbol oynamadı, debütant hələ formalaşma mərhələsindədi və həqiqətən çox zəifdi. Amma hətta bu komanda da “Neftçi”dən daha diri görünürdü, hədəfi var idi, hansısa məqsəd üçün çalışırdı. Samir Əliyevin dediyi kimi, 1 xal üçün oynayan komanda sonda qələbə qazanırsa, deməli, qarşı tərəfdəkilər başıpozuq dəstədi, haylayıb bir dərəyə doldurmaq lazımdı.
“Neftçi” 90 dəqiqə ərzində qol vurmamaq üçün hər şey etdi. Oynatdığı 5 müdafiəçili oyun sisteminin nə olduğunu özü də anlamayan Elxan Abdullayev yetirmələrini elə düzmüşdü ki, onlar hər 3-cü ötürməni geriyə verməyə məcbur idi. İrəlidə çoxalmaq olmurdu, rəqibin müdafiə oyunçuları və dayaq yarımmüdafiəçilərinin kiçicik pressinqi bəs edirdi ki, nominal qonaqlar oyunu növbəti dəfə müdafiədən qursun. Eyni ssenari hər dəfə təkrarlanır, məntiqsiz hücumlar ölü nöqtədən başlayırdı.
***
Faciəvi oyuna baxmısız, təkrarçılığa ehtiyac yoxdu. Dərsliyə düşəcək matç idi – görüb nəticə çıxarmaq, “belə etmək olmaz” bölməsinə atmaq üçün sənədli material vardı.
Elxan Abdullayevi qınamıram, kişinin oğluna 80 ilin komandasını dağıtmaq üçün aylıq 6500 manat maaş verirlər, mükafatı, bəzi transferlərdən pay-püşü də öz yerində. Bu, hələ işləməməyə görə bu qədər alır, gör, işləsə, nəticə qazansa, nələr istəyər? “Neftçi” rəhbərliyi də ürəyiaçıqdı, üçillik müqavilə bağlıayıb, qulluqunda dayanıb.
***
Bu məşqçiylə iş olmayacaq. Həm də təkcə məşqçiylə yox, ona layiq rəhbərliklə də. Futbolun əlifbasını bilməyənlər, kluba biznes layihəsi, qazanmaq üçün imkan kimi baxanlar hamısı bir yerə toplaşıb.
Klub prezidenti Orxan Hüseynzadə Abdullayevi qorumağa məcburdu, başqa yolu yoxdu. Çünki nə qədər məşqçi dəyişmək olar? Abdullayev getsə, növbədə özü olacaq. Ona görə də mitili çıxana kimi, Elxandan müdafiə döşəyi, qalxan kimi istifadə edəcək. O, istefaya göndərilsə, növbəti uğursuzluqda təsisçi onu ayaqlarından tutub, başıaşağı silkələyəcək. Axı, artıq Müşahidə Şurası da yoxdu, özünün dediyi kimi, birbaşa məsuliyyət onun boynundadı.
Klubun himayədarları, sponsorları, təsisçilər yatıb. Yenə milyonlar havaya sovrulur, nəticələr daha da pisləşir. İlk rəqib “Qarabağ” idi, püşkün nəticəsini, çempionla oynamalarını bəhanə etdilər, inandıq, bəs, “Səbail”? Antirekordları sıralaya-sıralaya gedən komanda debütantın elitadakı ilk qələbəsinin səbəbkarı oldular. Bu qədər ürəyiaçıqlıq olmaz ki? Komandanın imicini ayaq altına atmağı adət edənlər kordusa, heç olmasa, sponsorlar, dövlətin pulunu bu adamlara yedirdənlər ayılsın.
***
– “Neftçi” yenə uduzdu…
– Nə olsun, erməni komandasına uduzmayıb ki?..
FƏRİD