Ölkə futbolu
Vitse-prezidentin dayısı Cəbrayıl Cəbrayılov nəyə nəzarət edir?
“Neftçi” təlatümlü dövrdədi. Xərc…
“Neftçi” təlatümlü dövrdədi. Xərclənən milyonların qarşılığında sıralanan uğursuzluqlar islahatları qaçılmaz edir.
Bakı klubu mütləq dəyişməli, yenilənməli, fərqli strategiya seçməlidi. Və bütün bu islahatlar yalnız məşqçi əvəzlənməsi ilə yekynlaşmamalıdı. Elxan Abdullayein istefaya göndərilməsi məcburiyyətdən, eyni zamanda diqqət yayındırmaq üçündü – əsas problem yanlış idarəçilikdədi. “Neftçi” əvvəlki əzəmətini qaytarmaq istəyirsə, mütləq əl dəyişməli, kluba sağlam düşüncəli rəhbərlik gəlməlidi.
Elxan bəy getdi, göndərildi, qovuldu. Amma arxada ciddi problemlər, suallar qaldı. Axı, bütün transferlər onun istəyi ilə edilib, bu yararsız futbolçuların gəlişinə o razılıq verib. İndi hər şeyi dəyişmək, səhv addımların fəsadlarını aradan qaldırmaq lazım olacaq. Təbii ki, hesabat vermək də lazımdı.
Klub rəhbərliyi susur, gizlənir, heç bir açıqlama vermir. Vəziyyətə aydınlıq gətirilməli, komandanı böhrandan çıxarmağın yolları müzakirə olunmalı, səhvlər etiraf edilməli, üzr istənməlidi. Çünki “Neftçi” hansısa iş adamının maliyyələşdirdiyi klub deyil, dövlətin büdcəsindən qidalanan qurumdu. Xalqın, dövlətin pulu ilə yaşayan klubun rəhbərliyi isə elə xalq, dövlət qarşısında hesabat verməlidi.
İndiki halda bütün tənqidlər prezident Orxan Hüseynzadəyə yönəlib, amma cavab verməli olan 2 nəfər də var. Onlar klubun Müşahidə Şurasında sponsor SOCAR-ın nümayəndəsi kimi təmsil olunan cütlükdü. Baş sponsorun vitse-prezident müavini Cəbrayıl Cəbrayılov və Sərmayələr İdarəsinin rəis müavini Zaur Qəhrəmanov klubun bu vəziyyətə düşməsinə birbaşa cavabdeh adamlardı.
Xüsusilə Cəbrayıl bəyin danışması, açıqlama verməsi gərəkdi. Adı sıravi üzv olsa da, bəllidi ki, illərdi klubun maliyyəsinə bu adam nəzarət edir. Bu gün klub kredit asılılığına düşübsə, milyonlar dağıdılıbsa və ortada nəticə yoxdusa, Cəbrayılov da məsuliyyət daşıyır. Ya pulların perspektivsiz istiqamətlərə xərclənməsinə payı çatdığı üçün göz yumub, ya da susmaq üçün kimdənsə tapşırıq alıb.
Cəbrayıl bəy illərdi bu klubda çalışır, bir neçə rəhbərlik dəyişib, o isə daim hansısa səviyyədə proseslərin içində qalıb. Maraqlıdı, hamı klubun fiaskoya uğrayacağını gördüyü halda maliyyəyə əsas nəzarətçi təyin olunan bu şəxs niyə özünü görməzliyə vurub? Axı, ona maliyyəyə nəzarət üçün bütün şərait yaradılıb, hətta bacısı oğlu Elnur Eyvazovu vitse-prezident təyin etdirməyə icazə verilib. O zaman dayı – bacoğlu hara baxırmış ki, “Neftçi” bu vəziyyətə salınıb?
Cəbrayıl bəy əslində, klubda ən vacib söz sahiblərindən biridi. O, daim təsisçiləri, sponsorları məlumatlandırmalı, problemdən xəbərdar etməli, həlli üçün səy göstərməli idi. Amma susub və AFFA-nın baş katibi Elxan Məmmədovun idarəçiliyinə boyun əyib, sadəcə, statist rolunu oynayıb. Bəlkə də Eyvazovun işləməsinə, qazanmasına şərait yaradan rəhbərlik Cəbrayılovu da belə zərərsizləşdirib?
AĞA