Ölkə futbolu
“İnter”in azarkeş şousu
Elə bil Şimali Koreyada idik. Tribunalar dolu, anşlaq. Hamı dö…
Elə bil Şimali Koreyada idik. Tribunalar dolu, anşlaq. Hamı dövlət tədbirinə gəlib, amma heç kim nə üçün burada olduğunu bilmir. Qəribə mənzərə idi.
Bəlkə də ölkə başçısının “Qarabağ” klubunu qəbul edərkən dediyi “imkan daxilində oyunları izləyirəm” sözləri kiminsə ağlına batıb. Düşünüblər ki, “İnter”in oyunlarına da baxsa, stadion dolu olsun, camaatın asudə vaxtında istirahət etdiyi haqda fikir formalaşsın, xalqı düşünərək iş gördükləri mənzərəsi yaransın. Bəlkə də “İnter” adının “Keşlə”yə dəyişdirilməsinin klubun tamaşaçı sayına müsbət təsir göstərdiyi, bu addımın doğruluğu haqda fon yaratmaq istəyirdilər.
Amma maraqlıdı ki, “İnter” – “Səbail” oyununu 1000 nəfər azarkeşin izləməsi haqda protokol qeydi var. 1-ci və 4-cü tribunaların tam dolu olduğu, digər tribunarda xeyli adamın olduğu görüşü daha çox adam izləyirdi. 8152 nəfərlik “İnter Arena”ya minimum 3-4 min adam yığılmışdı. Deyəsən, AFFA nümayəndəsi özü də süni ajiotajdan utanaraq şablon rəqəm yazmışdı.
“İnter”in Müşahidə Şurasının sədri Zaur Axundov daha gözə dəymir, jurnalistlər özünə çıxmır. Rauf Əliyevlə bağlı məlum vədi verib, yalançı çıxandan sonra deyəsən, mətbuata görünməyə utanır. Yoxsa ondan bu süni ajiotajın da səbəbini soruşardıq.
AFFA-dan maliyyələşən klubların Bakı derbisində süni azarkeş bolluğu haqda dünən xəbər vermişdik. "İnter Arena"nın 1-ci və 4-cü sektorları sürpriz qonaqlarla dolmuşdu. Məcburi azarkeşlər meydan sahiblərinin rəhbərliyi tərəfindən gətirdilmişdi. "Keşlə" adlanacaq komandaya elə bu qəsəbənin sakinləri dəstək verirdi. Nizami rayonunun müxtəlif idarə və təşkilatlarının işçiləri davranışları ilə də bura təsadüfən düşdüklərini göstərirdilər.
AFFA və klub rəhbərliyinin Nizami rayon icra hakimiyyətinə tapırıq/müraciətindən sonra səfərbər olunan işçilər arenanın girişində siyahıya alınırdı və gəlməyənlər yəqin ki, işini itirmək məcburiyyətində qalacaqdı. Hətta hansı oyuna gəldiklərini bilməyən azarkeşlər 4-cü dəqiqədə “İnter” qol vurarkən nə edəcəklərini bilmədilər. Qolu “sevimli” komandalarının, yoxsa rəqibin vurduğunu anlamayan “fanatlar” sanki cizgi filminə baxırdı. Gecikib, onlar üçün ayrılan sektorda yer tapa bilməyən, media-sektora girməyə çalışan bir dayının reaksiyası da maraqlı idi: “Bizi göndəriblər, indi də yer vermirlər oturaq”.
İkinci hissədə “azarkeşlər” müəyyən qədər təlimatlandırılmışdı. Hətta hansısa idarənin mühafizə xidmətinin əməkdaşlarından ibarət qrup 3-4 dəqiqəlik “solo-proqram”la da çıxış etdi. Amma onlar da notları qarışdırdı – bəziləri “İnter”, bəziləri “Keşlə” qışqırmaqla. Bu xidmətləri isə qiymətləndirildi. Yəqin ki, növbəyə gecikdikləri üçün matçın bitiminə 20 dəqiqə qalmış onları sıraya düzüb stadiondan buraxdılar.
Gülməli mənzərə idi. Hətta azarkeşlərlə davranmağı da bacarmırdılar. Bunun nəticəsi idi ki, matçın sonlarında zorla gətirilən bu adamların 30-40 faizi yerlərini boş qoyaraq qaçmışdılar, tribunalar xeyli keçəlləşmişdi.
Əllərindəki siyahılardan, açar-möhür dəstindən gətirilən adamların işlədiyi idarələrin rəhbərləri olduğu sezilən 1-2 nəfər jurnalistlərlə yanaşı oturmuşdu. Onlar suallarımıza cavab vermir, susmağı üstün titrdular. Amma aralarındakı dialoq maraqlı idi.
İlk yarıda “Səbail”in qapıçısı Emil Balayevi “özlərinki” bilən və onun çıxışından narazı olan rəislər fasilədən sonra sevindi. Komandalar meydandakı yerlərini dəyişmişdi və bu dəfə onların gözü qarşısında Orxan Sadıqlı oynayırdı. Onlar qapıçının zəif oynadığı üçün əvəzləndiyini müzakirə etməyə başladılar və birdən… “yox e, o biri komandaya keçib” deyərkən artıq özümü saxlaya bilməyib ürəkdən güldüm.
Bu insanların idarəçiliyi budur. Həm də təkcə futbol klubunda yox…
Özünüzü niyə güldürürsüz, cənab Axundov? Guya tribunalar çörəkpulu ilə sınağa çəkilib, oyuna gətirilənlərin sayəsində doldurulanda nə oldu ki?
AĞA
P.S.: Dost saytlardan birinin (futbolpress.az) sosial şəbəkədə bu haqda paylaşımına yazılan rəy düşünməyə əsas verir: “Mən Keşlədə qalanam. Bizi məktəbdən aparırdı idman müəllimlərimiz. Təbii ki, idman müəllimimizin maddi marağı var idi”.
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…