Ölkə futbolu
“Neftçi”nin sabahı da məhv edilib, “Kəpəz” quyu dibindədi
Topaz Premyer Liqasında ilk dövrə bitmək üzrədi. Bu həf…
Topaz Premyer Liqasında ilk dövrə bitmək üzrədi. Bu həftə mövsümün ¼-i arxada qalacaq.
Elitayla yanaşı, əvəzedicilərin yarışında da mübarizə davam edir. Və burada da vəziyyət eynidi: hətta – hərəsində bir matç olmaq şərti ilə – təxirə salınan oyunların da sayı bərabərdi.
Qəribə olan bəzi komandaların bu yarışlara fərqli yanaşmasıdı. “Qəbələ” və “Zirə” hər iki yarışda liderdisə, “Qarabağ” güclülər arasında lider, əvəzedicilər arasında qələbəsiz autsayderdi. Ağdamlılar az qala 3 heyətə malik olsa da, bu futbolçuların xidmətindən ehtiyat qüvvənin yarışında düzgün istifadə etmir.
2 yarışın ümumu turnir cədvəlinə baxanda isə daha maraqlı mənzərəilə üz-üzə qalırıq. Nəticələri topladıqdan sonra sabahından arxayın, eyni zamanda narahat olmağımız lazımgələn komandalar bəlli olur.
“Qəbələ” 2 yarışda 40 qol vurmaqla ən yaxın izləyicisini 13 top qabaqlayır. 12 oyuna cəmi 5 xal itirən “qırmızı-qaralar”ın sabahının da etibarlı əllərdə olduğunu deyə bilərik.
“Zirə” hər iki yarışda, eləcə də ümumi cədvəldə ikincidi. Qəsəbə təmsilçisi hələ bir neçə il möhkəm ortabab kimi özünü göstərəcək.
“Qarabağ” ümumi cədvəldə ilk “üçlük”də olmasına görə yalnız əsas heyətə borcludu. Rəhbərlik əvəzedicilərin 15 oyuna niyə cəmi 1 xal topladığının səbəbini araşdırmasa, hələ uzun illər yalnız pul xərcləyərək futbolçu almalı olacaq.
“Sumqayıt” rəhbərliyi maliyyəni əsas heyətə daha səxavətlə yönəltsə də, ehtiyat komandasına görə sevinməlidi. Bununla belə, “Gənclik şəhəri” təmsilçisinin 4-cü pillədə olmasına rəğmən, buraxılan topların sayına görə liderliyi “ələ keçirməsi” ciddi təzaddı.
“Səbail” debutant üçün pis sayılmayacaq nəticə qazanıbsa, “İnter”in transfer qadağasına görə ciddi əziyyət çəkdiyi ortadadı. Bu komanda əvvəlki illərdə ehtiyat qüvvəyə ciddi diqqət yetirməsinə görə hələ də ayaq üstədi.
“Neftçi”nin nəticələri bu komandanın sabahının da məhv olduğunu göstərir. Cəmi 1 xal toplamış əsas komanda kimi əvəzedicilər də 3 oyundu məğlubiyyətləri sıralayır. Son turda Qəbələdə alçaldılan (1:7) komandanın rəhbərliyi yeni gələnlərə pis miras qoyub gedəcək.
“Kəpəz”in əvəzediciləri əsas heyətdən daha yaxşı olsa da, ümumi götürəndə Gəncə futbolu da faciəvi durumdadı. Son pillə daim istedadlı yetirmələri ilə öyünən şəhərin təmsilçisinə heç yaraşmır.
Topaz Premyer Liqası
1. Qarabağ 5 5 0 0 12-3 15
2. Zirə 6 4 2 0 12-5 14
3. Qəbələ 6 4 1 1 10-6 13
4. İnter 6 2 2 2 7-7 8
5. Sumqayıt 6 2 1 3 6-10 7
6. Səbail 5 2 0 3 4-6 6
7. Neftçi 6 0 1 5 3-9 1
8. Kəpəz 6 0 1 5 3-11 1
Əvəzedicilər
1. Qəbələ 6 6 0 0 30-4 18
2. Zirə 5 4 0 1 11-4 12
3. Sumqayıt 6 2 2 2 10-18 8
4. Neftçi 6 2 1 3 7-11 7
5. Səbail 6 2 1 3 9-13 7
6. Kəpəz 6 1 3 2 8-9 6
7. İnter 5 0 4 1 8-12 4
8. Qarabağ 6 0 1 5 2-14 1
Ümumi cədvəl
1. Qəbələ 12 10 1 1 40-10 31
2. Zirə 11 8 2 1 23-9 26
3. Qarabağ 11 5 1 5 14-17 16
4. Sumqayıt 12 4 3 5 16-28 15
5. Səbail 11 4 1 6 13-19 13
6. İnter 11 2 6 3 15-19 12
7. Neftçi 12 2 2 8 10-20 8
8. Kəpəz 12 1 4 7 11-20 7