Ölkə futbolu
Didərgin “Səbail” daha 1 ay gözləyəcək
Premyer Liqanın debütantı olan “Səbail” hələ də…
Premyer Liqanın debütantı olan “Səbail” hələ də didərgin həyatı yaşayır. Elitaya yüksəldiyi gündən doğma arenasında oyuna çıxmayan “gəmiqayıranlar” hələ bir müddət də gözləyəcək.
Futbolinfo.az xəbər verir ki, düşərgəsi “Bayıl Arena” olan “Səbail” sabah “Sumqayıt”ı burada qəbul etməli idi. Lakin təmir işlərini yekunlaşdıra bilməyən inşaatçılar komandanı yenə Mərdəkandakı “Dalğa Arena”ya sığınmağa məcbur edib. Ot örtüyünü dəyişən, eləcə də inzibati binada 3-cü mərtəbəni inşa edən təmirçilər işləri söz verdikləri vaxtda yekunlaşdırmayıb.
Əvvəlcə sentyabrın əvvəlində işlərin yekunlaşacağını vəd edən klub rəsmiləri, daha sonra ayın sonunu nişan vermişdi. İndi isə bəlli olur ki, “Sumqayıt”la sabahkı oyun da “Bayıl Arena”da keçirilməyəcək.
Gecikmənin səbəbini öyrənmək üçün klubun mətbuat xidmətinin rəhbəri Törə Əhmədova ilə danışdıq. O isə AFFA-nın İnfrastruk direktoru Kamran Vəliyevin fikirlərini bizə çatdırdı: “Bu barədə İtaliyanın “Limonta” şirkətinin Azərbaycandakı nümayəndəliyi olan “VİP Sport” şirkəti ilə danışıqlar aparılmışdı. Bayıl stadionunda ot örtüyünün tam dəyişib, istifadəyə verilmə müddəti, əslində, noyabrın 1-də olmalıdır. Lakin işlərin oktyabrın 15-də qurtarıb təhvil verilməsi nəzərdə tutulub”.
Beləliklə, AFFA-nın balansında olan, icarə əsasında “Səbail”ə "bağışlanan" “Bayıl Arena”nın istifadə verilmə müddəti bir az da uzandı. O zaman maraqlıdı: klub rəsmiləri əvvəlki vədləri verərkən nəyə arxayın idi?
“Səbail”də gecikmələr təkcə meydanla bağlı deyil. Sabah çempionatın ilk dövrəsi başa çatacaq, klubun rəsmi saytı isə hələ də istifadəyə verilməyib. Hər dəfə “tezliklə” vədi verən rəsmilər bu gedişlə 2018-ci ildə sözünü tutacaq.
CAVAD