Ölkə futbolu
“Neftçi”də boş qalan post
“Neftçi” yeni işçi axtarır. Klub rəhbərl…
“Neftçi” yeni işçi axtarır. Klub rəhbərliyi Media və Marketinq Departamentini tapşırmaq üçün kadr sorağındadı.
Futbolinfo.az xəbər verir ki, Rüstəm Əfsərlinin gedişindən sonra bu post vakantdı. Anar Şabanoğlu “Neftçi”yə təyinat alsa da, o, heç də sabiq həmkarımızı tam səlahiyyətdə əvəzləməyib. Anar bəy kluba yalnız mətbuat katibi kimi işə cəlb olunub.
Bəs, sözügedən departamentin taleyi necə olacaq? Yoxsa Rüstəm bəyin gəlişi ilə yaradılan bu şöbə yenidən struktur dəyişikliyi nəticəsində başqa departamentə birləşdiriləcək? Bu suallara rəhbərlikdən cavab almağı elə Anar bəydən istədik: “Mən mətbuat xidmətinə rəhbərlik edirəm. Departamentə kimin rəhbərlik edəcəyi hələlik bilinmir. Bu haqda başqa heç nə deyə bilmərəm”.
Bizdə olan bilgiyə görə, hazırda bu posta təyinat məsələsi mübahisəyə səbəb olub. Klub prezidenti Orxan Hüseynzadə ilə vitse-prezident Elnur Eyvazovun münasibətləri qaydasında deyil və onlar işçilərin təyinatı, maaşlarının müəyyənləşdirilməsi məsələsində ortaq məxrəcə gələ bilmirlər. Prezident maliyyə məsələlərində əsas söz sahibi olan müavininin öhdəsindən gəlməyi bacarmır.
Müsahibəsində “maliyyə məsələlərində heç bir problemimiz yoxdu” deyən Eyvazov, bu açıqlaması ilə prezidenti çətin vəziyyətdə qoymuşdu. Faktiki o, maliyyədə problem olmadığını, axsayan idman nəticələrinə görə Hüseynzadənin cavab verməli olduğunu işarə etmişdi.
Bir neçə gün öncə özünə müşavir götürən Hüseynzadə, ümumiyyətlə, hər addımda Elnur bəyin müqaviməti ilə rastlaşır. O, nəticələrin pisliyini əsas götürərək, Orxan bəyə qalan azacıq inamı da aradan qaldırmaq niyyətindədi. Bu təyinatın yubadılmasında da əsas məqsəd qışda yola salınması planlaşdırılan Hüseynzadənin daha bir kadrının kluba ayaq açmasına əngəl törətməkdi. Eyvazov hətta yayda gətirilən bir neçə işçinin də yola salınmasına çalışır.
FƏRİD