Ölkə futbolu
Bunu İsayevə bağışlamayacaqlar
U-17 yığmamızın məğlubiyyətlərinə AFFA-da da sevinənlər var…
U-17 yığmamızın məğlubiyyətlərinə AFFA-da da sevinənlər var. Mirbağır İsayevin yetirmələrinin Bolqarıstanda, qitə çempionatının ilkin seçmə mərhələsində 2 oyuna 12 top buraxması bəzi işbazları vəcdə gətirib.
Məsələ ondadı ki, İsayev başqalarının diqtəsiylə oturub-durmayan nadir məşqçilərdəndi. O, yığmada milliləşənlərin oynamasının əleyhdarlarındandı. Mirbağırın rəhbərlik etdiyi komandalarda təsadüfi hallarda legioner görə bilərik. Elə bu yarışa da o, azərbaycanlı balalarını aparıb. Belə strategiya milliləşənlərdən pul qazanan menecerlərin, bəzi futbol məmurlarının xoşuna gəlmir. Ona görə də artıq indidən İsayevin qovulacağına görə sevinirlər. Əvəzinə Yaşar Vahabzadə, Təbriz Həsənov, Babək Alxazov kimi birini qoyub, yenə öz işlərini görəcəklər. Nə olsun ki, onlar 10 ildi milli komandalarda heç bir nəticə qazanmayıb, oxşar məğlubiyyətlər alıblar, heç olmasa, sözəbaxandılar.
Bu məğlubiyyətlər əslində, Mirbağır bəyin ölkə futboluna xidmətidi. O, böyükhesablı yenilgilərlə də işbaz AFFA başbilənlərini ifşa edir. Bu məğlubiyyətlər ölkədə uşaq futbolunun, futbolumuzun gələcəyinin durumunu göstərir. Yəni ki, yetişdirdiklərimiz bunlardı, sabahımızı bu uşaqlara etibar edirik.
Yəqin ki, bu cümlələri oxuyandan sonra bəzi ağzıgöyçəklər “futbolçu klublarda yetişməlidi, AFFA neyləsin?” deyəcək. Doğrudu, futbolçu klub akademiyalarında, ixtisaslaşmış məktəblərdə yetişməlidi. Ancaq ölkədə futbolun inkişaf strategiyasına nəzarət etmək AFFA-nın səlahiyyətindədi. Uğurlar bu qurumun adına yazılırsa, belə məğlubiyyətlər də onların vicdanını sızlatmalıdı. İldə təkcə assosiasiya xətti ilə 4-5 milyon manat ayrılan sahə bu vəziyyətdə olmamalıdı.
FƏRİD