Ölkə futbolu
“Kəpəz”də növbəti qarışıqlıq: bu dəfə "Hüseynov kartı" ilə
Mikayıl Nərimanoğlu “Kəpəz”də elə bomba partladıb …
Mikayıl Nərimanoğlu “Kəpəz”də elə bomba partladıb ki, fəsadları hələ uzun müddət hiss olunacaq. Maliyyə pozuntularına görə Gəncə klubunun Müşahidə Şurasından geri çağırılan AFFA rəsmisi özündən sonra da kimlərinsə başını ağrıdır.
Futbolinfo.az xəbər verir ki, hazırda icraçı direktor Cabir İbrahimovun fəaliyyəti araşdırılır. Müxtəlif maliyyə sənədlərində imzası olan Cabir bəyin Nərimanoğlu ilə ortaq və ya ayrıca hansısa qanunsuz iş gördüyü aydınlaşsa, onu da yola salacaqlar.
Dünənsə komandanın baş məşqçisi Şahin Diniyevin istefa xəbəri yayıldı. Daha sonra çalışdırıcı elə mətbuatda bu informasiyanı təkzib etdi. Əməkdaşımızla söhbətində də Diniyev getmək fikri olmadığını, buna lüzum görmədiyini açıqladı.
Diniyevin arqumentləri öz yerində, amma zənnimizcə, bu cür xəbərlərin mətbuata sızdırılması məqsədlidi. Mehman Allahverdiyev və onun kimi klubdan uzaqlaşdırılan digər yoldaşları “Kəpəz”i qarışdırmaq üçün bütün mümkün vasitələrdən istifadə edir. Mikayıl bəy onların təşəbbüsü ilə icraçı direktor tərəfindən vuruldu, indi həmin İbrahimov özü də müşküldədi.
Maraqlıdı ki, istənilən məsələdə Yunis Hüseynov kartı ortaya atılır. Bu şəxsin gəncəli olması, vaxtilə “Karvan”da Gəncənin icra başçısı Elmar Vəliyevlə birgə çalışması faktı da sabiq yarımmüdafiəçinin irəli çəkilməsinə səbəbdi. Mehman bəy Vəliyevin dövründə komandaya qayıdışının mümkünsüzlüyünü bildiyindən, heç olmasa, başqalarına da mane olmağı, imkan daxilində aranı qarışdırmağı lazımlı bilir.
Bir neçə gün öncə redaksiyamıza Nərrimanoğlunun yerinə məhz Hüseynovun gələcəyi ilə bağlı informasiya daxil olmuşdu. Belə ki, o, şuraya üzv göndərilməli və AFFA-nın ayırdığı maliyyəyə nəzarət etməliydi. Lakin hələ o zaman da qeyd etmişdik ki, AFFA maliyyəni heç vaxt Hüseynov kimi kənar birinə etibar etməz. Ehtimalımız doğruldu və assosiasiya “Kəpəz”ə kurator kimi İslam Abbasovu göndərdi.
İndi isə Yunis bəyin məşqçi kimi dönüşü variantı var. Lakin bu da inandırıcı deyil. Çünki o, nə AFFA, nə də Gəncə şəhər rəhbərliyi tərəfindən sevilmir. AFFA məhdud maliyyə şərtləri ilə çalışmağa məcbur etdiyi Şahin bəydən narazı deyil və onu əvəzləməyi düşünmür. Düzdü, Diniyevin Elmar Vəliyevlə də münasibətləri isti deyil. Lakin Hüseynovla münasibətlər daha pisdi. “Karvan”dakı işbirliyinin sonunda Vəliyevi aldadan və bu üzdən münasibətləri korlanan Yunis bəy icra başçısı dəyişməyənə kimi Gəncədə işləməyəcək.
Sadəcə, Hüseynov kartı bu gün kimlərəsə sərf etdiyi üçün gündəmdədi. Bildiyimizə görə, ən azı qışa kimi Diniyevin istefası müzakirə mövzusu deyil, çempionatın qışa qədərki dövründəki nəticələri isə müqavilənin yaya kimi uzanıb-uzanmamasında həlledici olacaq.
AĞA
- Ölkə futbolu2024-04-11 10:32
AFFA-nın gülməli seçimi: Uğursuz klub rəhbəri Hakimlər Komitəsinə sədr olacaq?
- Ölkə futbolu2024-04-11 14:10
AFFA-da növbəti təyinatlar olacaq: yeni baş katib və PFL prezidenti
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Ölkə futbolu2024-04-11 13:34
Lunyov “Qarabağ”ın uğurunun sirrini açdı: məşqçilər, həkimlər və…