Ölkə futbolu
Almanlarla məhəllə futbolu və perspektiv
4 oyuna 0 xal. Top fərqi – 3:19.
Bu, 21 yaşlılar…
4 oyuna 0 xal. Top fərqi – 3:19.
Bu, 21 yaşlılardan ibarət milli komandamızın cari mövsümdəki nəticəsidi. Cari tsiklin əvvəli, futbolumuz üçün isə sonun başlanğıcıdı. Çünki bu futbolçular sabah əsas milli komandanın üzvləri olmalıdı.
Dünən Almaniyayla oyundakı 0:7 hesablı məğlubiyyət 2 komanda arasında qüvvələr nisbətinin real əksi deyildi. Bəli, “Dalğa Arena”da oynanılan futbolla nəticə belə olmalıydı, lakin futbolçularımız heç də belə kötəklənəsi səviyyədə deyillər.
Komandamızın heyətinə baxıram. Milliləşənlər, legioner olanlar və Premyer Liqada müntəzəm oynayanlardı. Əvvəlki illərdə olduğu kimi, təcrübəsiz futbolçular yığını deyil. Ayrı-ayrılıqda hamısı normal futbol oynayır. Amma… biri “Qəbələ”, biri “Neftçi”, digəri də “Sumqayıt” üslubunda. Milli komandanın oyun dəst-xətti, məşqçi işi, hansısa taktika yoxdu. Sanki məhəllə komandasıdı, hamı bacardığını oynayır.
Almaniya kimi rəqiblər bunu bağışlamır. Rəqib aşkar favoritdi və məğlubiyyət də realdı. O zaman açıq futbol oynamaq ağılsızlıqdı. Xəttlər arasında normal əlaqə qura bilmirsənsə, qapanmalı, əks-hücumda şans gözləməlisən. Bunu etmirsənsə, qolları say.
Millinin məşqçiləri kimdi? Uzun müddət futboldan kənar qalan, “Manşester Yunayted” məktəbində məmur balaları üçün “fişka” düzən və köməkçi işlədiyi vaxtlarda da üzərində işləməyən Samir Ələkbərov! Və ya məşqilik kurslarında kimə gəldi kateqoriya paylayan, heç yerdə məşqçi bacarığını isbatlamayan, hətta şərhçiliyə də yaramayan Aslan Kərimov! Əla futbolçu olublar, milli komanda tapşırılacaq səviyyədə məşqçi deyillər.
Milli komandaya baş məşqçi təyin olunan Qurban Qurbanov indi bütün yığmalara, o cümlədən U-21-ə nəzarət etməyə məhkumdu. Futbolçulardan imtina etmək olmaz, yeni nəsil yetişənə kimi vəziyyəti bunlarla idarə etməlidi. Amma məşqçilər korpusu tamamilə qovulmalıdı.
Dövlət Bayrağı Günündə azarkeşsiz matçı tribunadan izləyən Aftandil Hacıyev, Adil Şükürov, Ramin Quliyev, Elçin Rəhmanov və başqaları. Yeni nəsil məşqçiləri onlardı və işlərini əla görürlər. Savadları da yerindədi, həvəsləri də, bacarıqları da. Ölkə futbolunu indiki uçurumdan onlar çıxarmağa cəhd edəcək. Başqa yol yoxdu. Ciddi yenilənməyə və Qurbanovun cızacağı strategiya ilə irəliləməyə məcburuq.
Yenə uğursuzluqlar olacaq, yenə uduzacağıq. Bununla belə, dəyişikliklər qaçılmazdı. Çünki indiki durum faciəvidi. Nə məşqçilər doğru seçilib, nə də onlar oyunçu, taktika seçimində uğurludular. Almaniyanın adını eşidən kimi ağ bayraq qaldıranlarla uzağa getmək olmaz.
20-25 ildi dəyiş-düyüşlə gedirik, son 10 il isə daha facivəi olub. Əvvəlki dövrlərdə şəraitsizlikdən, pulsuzluqdan danışırdıqsa, indiki AFFA rəhbərliyi bu müddətdə 2 milyard manata yaxın vəsaiti havaya sovurub. Hər iki halda heç nə alınmayıb. Və bu müddətdə öz gücünə minimum şəraitlə maksimuma nail olan Qurban Qurbanov ortaya çıxıb. Ya inqilabı o edəcək, ya da futboldakı perspektivimizdən birdəfəlik əlimizi üzəcəyik.
CAVAD