Ölkə futbolu
“Kəpəz”in düşərgəsində münaqişə
"Kəpəz"in növbəti məğlubiyyəti klubun düşə…
"Kəpəz"in növbəti məğlubiyyəti klubun düşərgəsində gərginliyə səbəb oldu. Bu gün ölkə kubokunun 1/4 final mərhələsində "Keşlə"yə 0:2 hesabıyla yenilgi fanatların səbr kasasını daşırdı.
"İnter Arena"dakı qarşılaşmanın sonlarından etibarən "Xəmsə" fan-klubunun üzvləri futbolçulara kəskin etiraz etməyə başladı. Əsasən paytaxtda yaşayan gəncəlilərdən qurulan bu qrup matç bitincə də sakit dayanmadı, komanda avtobusunun dayandığı yerə gələrək, futbolçulardan hesabat istədi.
Məşqçiləri, futbolçuları tənqid edən azarkeşlərin qarşısına isə "Kəpəz"in təhlükəsizlik xidmətinin rəisi Elmar Əliyev çıxdı. O, öncə azarkeşləri sakitləşdirməyə çalışdı, daha sonra bir neçə nəfərlə söz atışmasına girişdi, hətta az qala əlbəyaxa olacaqdı. Klub işçilərinin, məşqçi köməkçisi Vidadi Rzayevin, eləcə də daha yaşlı azarkeşlərin müdaxiləsindən sonra münaqişənin qarşısı alındı.
Əliyevin əsas narazılığı meydan sahiblərindən və polislərdən idi. Belə ki, onlar komandanın stadiondan təhlükəsiz ayrılmasını təmin etməliydilər. Lakin klub avtobusu stadion ərazisinə buraxılmamışdı, hasarın qırağında toplaşan azarkeşləri ərazidən uzaqlaşdırmaq üçün isə asayiş keşikçisi yox idi, final fiti verilən kimi onlar “İnter Arena”dan ayrılmışdı. Bu durumda azarkeşlərin futbolçulara, avtobusa xəsarət yetirməsi və s. xoşagəlməz olaylar da mümkün idi.
Məsuliyyət həm də klub rəhbərliyinin üzərinə düşür. Oyuna ailə üzvləri ilə gələn icraşı direktor Elnur Camalxanov, eləcə də Müşahidə Şurasının sədr müavini İslam Abbasov 90 dəqiqə bitən kimi aradan çıxmışdılar, komanda ilə maraqlanmırdılar. Görünür, onları yalnız maaş kartından çıxaracaqları pul maraqlandırır.
“Kəpəz”in baş məşqçisi Yunis Hüseynov isə olayları sakitcə izləyirdi. O, bu azarkeşləri tanımaq, nədn şikayət etdiklərini öyrənmək istədiyi üçün kənara çəkilmədiyini bildirdi. Yunis bəy azarkeşlərin ardıcıl məğlubiyyətlərə görə narazılığını təbii qarşılayırdı, lakin ona da maraqlı idi: niyə onar məhz indi, onun gəlişindən sonra belə fəallaşıb?
AĞA